U Rwanda na Afurika y’Epfo byasinyanye amasezerano y’ubufatanye mu kurengera ibidukikije

Yanditswe na Cyprien Niyomwungeri
Kuya 19 Kamena 2017 saa 05:39
Yasuwe :
1 0

U Rwanda na Afurika y’Epfo byasinyanye amasezerano y’ubufatanye mu kurengera ibidukikije, binyuze mu guharanira ko inyamaswa zidakunda kuboneka zashira muri pariki no guteza imbere ubukerarugendo bw’ibihugu byombi bukabyara umusaruro uzabifasha kugera ku iterambere rirambye.

Aya masezerano yasinywe ku wa 16 Kamena hagati ya Minisitiri w’umutungo kamere, Dr.Vincent Biruta na Minisitiri ushinzwe ibidukikije muri Afurika y’Epfo, Dr.Edna Molewa, agamije kubungabunga urusobe rw’ibimera n’inyamaswa n’imikoreshereze myiza yabyo.

Minisitiri ushinzwe ibidukikije muri Afurika y’Epfo, ejo ku cyumweru yatangaje ko Abaminisitiri bombi bahuriye i Kigali bakaganira ku buryo bwo kurengera no guteza imbere ibidukikije n’akamaro kabyo ku buzima n’imibereho myiza y’abatuye ibihugu byombi.

Ibihugu byombi byemeranyije kurwanya icuruzwa ry’ibimera n’inyamaswa ridakurikije amategeko, ubwuzuzanye no guterana ingabo mu bitugu mu kurengera ibidukikije no kubyongera by’umwihariko bafatanya mu kugera ku ntego ya 17 y’intego z’iterambere rirambye (SDGs), zemejwe n’Umuryango w’Abibumbye muri Nzeri 2015.

Muri aya masezerano, Molewa, ashimangira ko u Rwanda na Afurika y’Epfo byumva neza ibibazo byugarije ibidukikije mu karere no ku Isi yose kandi binemera ko hakenewe kuboneka igisubizo kirambye binyuze mu bufatanye mpuzamahanga no guhuza imbaraga.

Yagize ati “Afurika y’Epfo n’u Rwanda byumva kimwe ko bifite inshingano zo guteza imbere ubufatanye mu birebana no kurengera ibidukikije n’ubwo kugera ku iterambere rya none n’ejo hazaza.”

U Rwanda na Afurika y’Epfo bisanganywe umubano ukomeye mu kurengera ibidukikije. Iki gihugu cyarufashije kugarura intare muri Pariki y’Igihugu y’Akagera zari zarazimiye ku mpamvu zigendanye na Jenoside yakorewe Abatutsi mu 1994.

Cyanaturutsemo inkura z’umukara zagejejwe muri Pariki y’Igihugu y’Akagera mu kwezi gushize nyuma y’uko zahaherukaga mu myaka 10 ishize, kikaba ari igikorwa kizazamura ubukerarugendo bwinjiriza igihugu amadovize.


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza