U Rwanda rwahawe inkunga ya miliyari 3 Frw azifashishwa mu gutera amashyamba

Yanditswe na Jean Pierre Tuyisenge
Kuya 6 Gashyantare 2018 saa 07:42
Yasuwe :
0 0

U Rwanda rwabonye inkunga y’amafaranga asaga miliyari 3.7 Frw aje azarufasha mu gutera amashyamba n’imikoreshereze myiza y’ibicanwa bikomoka ku biti ndetse no kongera ubuziranenge bw’imbuto zayo.

Iyi nkunga yatanzwe n’ikigega cyo mu bihugu bya Danemark, Finlande, Islande, Norvège na Suède (NDF), gitera inkunga imishinga igamije guteza imbere ibidukikije, ikazifashishwa mu gushyira mu bikorwa umushinga ugamije guteza imbere ibicanwa bikomoka ku biti.

Iyi nkunga ya NDF izahabwa u Rwanda inyuze muri Banki y’Isi, ikaba iziyongera ku bikorwa by’Umushinga ugamije kugarura ishusho kamere y’Amashyamba no kuyabungabunga (LAFREC) usanzwe ushyirwa mu bikorwa n’Ikigo cy’Igihugu cyo kubungabunga ibidukikije (REMA).

REMA yatangaje ko bimwe mu bikorwa bizaterwa inkunga binyuze muri uwo mushinga mushya harimo kuvugurura no gutera amashyamba mashya, kongera ubuziranenge bw’imbuto z’amashyamba, guteza imbere imikoreshereze myiza y’ibicanwa bituruka ku biti ndetse no gukwirakwiza uburyo bushya bwo gutanga ingufu zifashishwa mu nganda z’icyayi no mu ngo.

Umuyobozi Mukuru wa REMA, Eng.Coletha Ruhamya, yavuze ko uwo mushinga uzanagira uruhare mu guteza imbere ubuhinzi buvuguruye bw’amashyamba bikazibanda mu bice bikikije Pariki y’Igihugu ya Gishwati-Mukura.

Yagize ati “Uzateza imbere amashyamba ndetse n’abayafite muri utwo duce bazareba uko bayacunga neza; hakazabamo no kwigisha abakora amakara bakazayakora neza kandi bikazabaha umusaruro uhagije, ukazanunganira ukuntu twakora indi nyigo yatuma tubona ibisimbura ibicanwa bitari ibikomoka ku biti.”

Umuyobozi wari uhagarariye NDF, Martina Jagerhorn, yavuze ko bahisemo gutera inkunga u Rwanda mu kurufasha guhangana n’imihindagurikire y’ikirere.

Yagize ati “Tumaze iminsi twiga ku mihindagurikire y’ikirere mu Rwanda, ngo turebe icyakorwa kugira ngo rugire ubudahangarwa, dushingiye rero ku bikorwa bya LAFREC tuzakomeza gushyigikira u Rwanda mu guhangana n’ihindagurika ry’ikirere.”

Biteganyijwe ko uyu mushinga uzanafasha mu kongerera ubushobozi amakoperative atunganya, akanacuruza amakara mu rwego rwo kuyafasha kurushaho kuyakora mu buryo burambye, kongera ubuziranenge n’ubwiza bw’amakara ndetse no gushaka amasoko.

Ibindi bikorwa birimo kongerera ubushobozi Ikigo cy’Igihugu cy’Imbuto z’amashyamba ndetse no gufasha inganda zitunganya icyayi n’abandi baturage kubona ibindi bicanwa bitangiza ibidukikije, bakwifashisha mu mirimo yabo ya buri munsi.

Uyu musnhinga utangiye mu 2018 uzasoza ibikorwa byawo mu 2019.

Minisitiri w'Ibidukikije, Dr. Biruta Vincent
Umuyobozi Mukuru wa REMA, Coletha Ruhamya
Umuyobozi Mukuru w'Ikigo gishinzwe ubutaka n'amashyamba, Prime Ngabonziza yasinyanye amasezerano n'Umuyobozi Mukuru wa REMA, Coletha Ruhamya yo gushyira mu bikorwa umushinga wo gutera amashyamba
Umuyobozi uhagarariye Banki y'Isi mu Rwanda, Yasser El-Gamal

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza