Kwamamaza

U Rwanda rwahawe kuyobora Komisiyo ishinzwe amashyamba muri Afurika yo Hagati

Yanditswe kuya 29-11-2016 saa 17:42' na Ntakirutimana Deus


U Rwanda rwahawe kuyobora Komisiyo ishinzwe kwita ku mashyamba muri Afurika yo Hagati(Commission des Forêts d’Afrique Centrale-COMIFAC), abawugize bakaba bizera ko imiyoborere myiza irangwa mu Rwanda izawuteza imbere.

U Rwanda rwahawe ubwo buyobozi rusimbura u Burundi, ku wa Kabiri tariki ya 29 Ugushyingo 2016, mu nama rusange ya 9 irimo kubera i Kigali ihuje abagize iyo komisiyo barimo abaminisiti bafite aho bahuriye n’imicungire y’amashyamba mu bihugu bya Congo, Gabon n’u Rwanda.

Umuhuzabikorwa wa COMIFAC, Mbitikon Raymond yavuze ko amashyamba acyangizwa n’ibikorwa bya muntu, birimo kuyatema bayashakamo inkwi n’ibindi.

Ati « Ibyo byose bikorerwa amashyamba ku buryo hadashyizweho politiki ihamye yo kuyabungabunga, hagakomeza ubwo buryo budakwiye, amashyamba ashobora gushiraho. »

Gusa ngo nubwo itemwa ryayo ridakanganye agereranyije no ku yindi migabane irimo Aziya n’Amerika y’Epfo ngo na byo ntibikwiye, ahubwo ngo yagombye gusarurwa mu buryo bukurikije amategeko.

Mbitoken yashimiye u Rwanda izo nshingano rwahawe arusaba gukomeza guteza imbere uwo muryango, ukemura ibibazo bitandukanye ufite.

Umuyobozi w’Ishami ry’Amashyamba mu Kigo cy’igihugu cy’Umutungo kamere akaba n’Umuhuzabikorwa wa COMIFAC mu Rwanda,Mutaganda Amini yavuze ko u Rwanda rugiye kwifashisha imiyoborere yarwo ishimwa mu kuwuzanzamura.

Ati « Nk’u Rwanda icyo tugiye kwitabira cyane ni uko komisiyo yakongera kunaguka, twagiye tubona ko ifite ibibazo byinshi birimo iby’ubuyobozi.»

« Bazi neza ko hari ikizakorwa kuko mu Rwanda hari ubuyobozi buhamye bufite ireme nk’uko bagiye babivuga. Tugiye gufasha dushyiremo uburyo bwa politiki mu gihe hatorwa n’abazakora mu buryo bwa tekiniki.

Ufite imishinga myinshi uzakora ni ugushyiramo ubuyobozi bwiza gusumba uko bwari bumeze. »

Yakomeje avuga ko u Rwanda rugiye kuyobora ibindi bihugu mu gufasha kugena imigambi no kumenya ibizakorwa. Rukazakomeza gukangurira abakuru b’ibihugu bigize uwo muryango gukomeza gushyigikira imigendekere myiza ya COMIFAC.

U Rwanda kandi ruzafatanya n’ubuyobozi bushinzwe tekiniki y’uwo muryango nabwo bugomba gushyirwaho.

Minisitiri w’Umutungo Kamere, Vincent Biruta yavuze ko u Rwanda ruzakomeza guteza imbere politiki yo gutera amashyamba ku buryo muri 2018 ubuso ateyeho buzaba bugeze kuri 30%, azafasha kurinda imisozi ngo idatwarwa n’isuri n’ibindi. Kugeza ubu aya mashyamba yatewe ku buso bungana na 29.6%.

Comifac yashinzwe muri 2005,ubwo abakuru b’ibihugu bahuriraga mu nama yabereye muri Congo biyemeza no kubungabunga amashyamba nka kimwe mu bifatiye runini isi bashyiraho komisiyo imwe bahuriyeho ireba uburyo yabungwabungwa, bashyiraho ingamba zo kuyitaho no kubona ubushobozi bwo gutuma akomeza kubungabungwa.

Iyi komisiyo yafashije u Rwanda gutera no gusana amashyamba yari yarononekaye mu ntara y’Amajyepfo.

Abitabiriye iyi nama ubwo bari mu biganiro
U Rwanda ruhagarariwe na Minisitiri w'Umutungokamere, Vincent Biruta, ashyikirizwa ububasha bwo kuyobora iyi Komisiyo
Abaminisitiri batandukanye bo mu bihugu bya Afurika yo Hagati mu gihe cy'ibiganiro
Abayobozi bitabiriye iyi nama mu ifoto rusange

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved