U Rwanda rwahawe miliyoni 32.8$ zo guhangana n’imihindagurikire y’ibihe

Yanditswe na Cyprien Niyomwungeri
Kuya 10 Werurwe 2018 saa 05:48
Yasuwe :
0 1

Ikigega gifasha mu guhangana n’ihindagurika ry’ibihe ‘Green Climate Fund’ (GCF), cyahaye u Rwanda impano ya miliyoni 32.8 z’amadolari, ni ukuvuga miliyari zirenga 28 z’amafaranga y’u Rwanda, zo gufasha abaturage bakennye bo mu Karere ka Gicumbi guhangana n’imihindagurikire y’ibihe.

Uyu mushinga uzabarizwa mu kigega gitera inkunga imishinga yita ku bidukikije mu Rwanda (Fonerwa), ugamije gutunganya igishanga cya Muvumba, kongera ubushobozi bw’abaturage mu gutunganya amashyamba ndetse no gufasha abahinzi bato gukora ubuhinzi buhangana n’ihindagurika ry’ibihe.

Uzakorera mu mirenge icyenda y’Akarere ka Gicumbi ari yo Kaniga, Rubaya, Cyumba, Rushaki, Shangasha, Mukarange, Manyagiro, Byumba na Bwisige. Uzafasha abatuye ahantu haba inkangu n’imyuzure gutura mu buryo buhangana n’imihindagurikire y’ibihe kandi wite ku baturage bakennye cyane badafite ubushobozi.

Abaturage bazigishwa uburyo burambye bwo kubungabunga amashyamba, imiturire igezweho, uburyo bwo gutunganya ibishanga n’ibindi, hanyuma buzajye no gukoreshwa mu gihugu hose.

Biteganyijwe ko mu myaka itandatu uyu mushinga uzafasha abaturage kugabanya imyuka ihumanya (CO2), ingana na toni 273,720. Uzagera ku baturage 150,000 ugirire akamaro abarenga 380,000 muri rusange.

Uretse izi miliyoni 32.8 z’amadolari, Ikigega cyo kubungabunga ibidukikije mu Rwanda (RGF), kizatangamo ibihumbi 147 z’amadolari ndetse n’Akarere ka Gicumbi gatange ibihumbi 107 $ naho umuryango ‘The Wood Foundation’ utange 105,964 $.

Ibiro by'Akarere ka Gicumbi kazakoreshwamo miliyoni 32.8 $ zo guhangana n’imihindagurikire y’ibihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza