U Rwanda rwasabye amahanga kwemeza byihuse amavugurura ya Kigali ku myuka ihumanya ikirere

Yanditswe na Rabbi Malo Umucunguzi
Kuya 19 Nzeri 2017 saa 01:35
Yasuwe :
0 0

Minisitiri w’Ibidukikije, Dr Vincent Biruta, yasabye amahanga kwihutisha kwemeza burundu amavugurura yakorewe i Kigali ku masezerano ya Montreal, agena uburyo bwo kugabanya ikorwa n’ikoreshwa ry’imyuka ya ‘Hydrofluorocarbons (HFCs) igira uruhare runini mu izamuka ry’ubushyuhe bw’Isi.

Ni mu nama yabereye i New York kuri uyu wa Mbere, yitabirwa n’abaminisitiri barebana n’ibidukikije ba Canada, u Bufaransa, Costa Rica n’abandi bayobozi ku rwego rw’Umuryango w’Abibumbye, igamije gushishikariza ibihugu kwemeza ibyavugururiwe i Kigali kuwa 15 Ukwakira 2016.

Abahanga bagaragaza ko guhagarika ikora n’ikoreshwa ry’iyi myuka ya HFCs ahanini yifashishwa mu byuma bikonjesha, bishobora kugabanya dogere 0.5 ku mpuzandengo y’izamuka ry’ubushyuhe bw’Isi.

Minisitiri Biruta yavuze ko hakenewe nibura ko ibihugu 20 byemeza burundu ayo masezerano mbere y’inama itaha izabera muri Canada mu Ugushyingo, kugira ngo ayo masezerano azatangire gukurikizwa kuwa 1 Mutarama 2019 nk’uko byemeranyijweho.

Yagize ati “Twahuriye hamwe ngo dushimangire ubushake bwacu ku mavugura ya Kigali kandi dusabe ibindi bihugu kwihutisha kuyemeza burundu. Mu kubikora, turaba dutanze ubutumwa bukomeye ko Isi ishyize hamwe mu kurangiza ikoreshwa rya Hydrofluorocarbons no kurengera ikirere cyacu.”

Dr Biruta yavuze ko mu gushyira mu bikorwa ayo masezerano hamwe no kwifashisha ingufu zitangiza ibidukikije, intego ishobora kurenga kugabanya dogere 0.5 ikagera kuri dogere imwe.

Hasobanurwa ko byaba ari n’intambwe itewe mu gushyira mu bikorwa amasezerano ya Paris yemejwe mu 2015, agena ingamba zo gukumira izamuka ry’igipimo mpuzandengo cy’ubushyuhe bw’Isi, kikaguma hasi ya 2°C, intego ikaba ko kigera hasi ya 1.5°C kugeza mu 2100, nk’uko byahoze mbere y’umwaduko w’inganda,.

Biruta yakomeje agira ati “Kwemeza burundu aya mavugurura mu buryo bwihuse bifite n’inyungu ku bihugu, nk’inkunga igenewe ibikiri mu nzira y’amajyambere.”

Yasabye abafatabyabikorwa muri iyo gahunda kuzuza uruhare rwabo mu gushyigikira ishyirwaho ry’ikigega kizafasha ibihugu bidafite amikoro yo guhita bishyira mu bikorwa ivanwaho rya HFCs.

Muri aya masezerano ibihugu bikize birimo ibyo ku mugabane w’u Burayi, Leta Zunze Ubumwe za Amerika n’ibindi bizatangira guhagarika ikoreshwa ry’ibyuma bikonjesha bisohora HFCs kugeza ku 10% mu 2019.

Ibihugu biri mu nzira y’amajyambere nk’u Bushinwa, ibyo muri Amerika y’Amajyepfo n’ibindi bizatangira kugabanya ikoreshwa ry’ibi byuma mu 2024. Ibindi bihugu birimo u Buhinde, Pakistan, Iran, Iraq bizagabanya ikoreshwa ry’ibyuma bikonjesha mu 2028.

Minisitiri Biruta yavuze ko kwemeza burundu aya mavugurura biri mu gusigira Isi nziza ibisekuru biri imbere, ariko biri no mu gufasha cyane ibihugu byatangiye guhura n’ibibazo bishingiye ku gushyuha k’umubumbe.

Kugeza ubu amaze kwemezwa burundu n’ibihugu birimo u Rwanda, Mali, Leta zishyize hamwe za Macaronesia, Ibirwa bya Marshall, Palau na Norvege. Iyi nama yasojwe Canada, Mexico na Costa Rica bitangaje ko biri mu rugendo rwo kuyemeza burundu.

Minisitiri w’Ibidukikije, Dr Vincent Biruta i New York mu nama yiga ku mavugurura ya Kigali ku byuka bihumanya ikirere

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza