Uburyo wakoresha wirindamo inkuba

Yanditswe na IGIHE
Kuya 11 Ukwakira 2017 saa 07:44
Yasuwe :
0 0

Muri iyi minsi mu Karere u Rwanda ruherereyemo, cyane cyane igice cy’Iburengerazuba bw’igihugu, haragaragara ibihe bidasanzwe by’imvura nyinshi ivanze n’imirabyo n’imiyaga ndetse n’inkuba.

Ibi bishobora gutera imyuzure n’inkangu ndetse hari aho inkuba zigenda zihitana ubuzima bw’abantu n’ubw’amatungo. Urugero ni kuwa Mbere tariki ya 9 Ukwakira, aho mu Karere ka Rusizi, mu Murenge wa Bweyeye abantu barindwi bari mu rusengero bakubiswe n’inkuba maze umwe ahita yitaba Imana; na none mu Karere ka Nyamagabe, mu Murenge wa Kitabi, kuri uyu wa kabiri tariki ya 10 Ukwakira, abantu umunani basoromaga icyayi bakubiswe n’inkuba umwe yitaba Imana.

Inkuba ni uruhurirane rw’ingufu zihurira mu kirere maze ikubitana ryazo rigatanga izindi ngufu zo mu bwoko bw’amashanyarazi; aribyo twumva cyangwa tubona bikubita nk’inkuba n’imirabyo. Ibi nibyo bikomeretsa cyangwa bikica uwo bihuye nawe.

Ariko hari uburyo twakwitwara kugira ngo tugabanye ubukana n’ingaruka bishobora kutugiraho. Mu gihe hagwa imvura ivanze n’inkuba n’imirabyo abaturage basabwa ibi bikurukira: kwirinda kugama munsi y’igiti kiri cyonyine, Kwirinda kugama ahantu hari inzu za telefoni rusange, ku misozi hejuru, kuko ibyo byose byagira uruhare mu gukubitwa n’inkuba; kwirinda gukorakora no gutwara ibintu bizwiho gutwara umuriro vuba ni ukuvuga ibyuma binyuranye nk’amakanya, umutaka, fer à béton n’ibindi mu gihe ibyo byuma bisumba umutwe w’ubitwaye.

Igihe uri mu modoka; ibuka gufunga ibirahure byose, wirinda gukorakora (gushyira intoki) mu madirishya arimo ibyuma bya grillage, kwirinda kuba hafi cyangwa gukorakora ahantu hari za senyenge cyangwa se ibindi bikoresho bikoze mu byuma.

Niba wumvise inkuba uri mu ishyamba, ibyiza ni ukuguma hagati ukirinda kujya mu nkengero zaryo. Kwirinda koga, kuguma cyangwa kugenda mu mazi mu gihe cy’inkuba. Abana bakabuzwa gukinira mu bidendezi by’amazi; kwirinda gukandagira mu mazi mu nzu ukoropa cyangwa umesa.

Kwirinda gukoresha ibyuma bizamuka mu nyubako z’amagorofa aribyo bita Ascenseur (lift) igihe cy’imirabyo n’inkuba. Kwirinda gukoresha ibintu byose bikoresha amashanyarazi mu gihe utizeye neza ko inyubako yawe ifite “akarindankuba” (paratonnerre). Kwirinda kuryama hasi ku butaka kuko byakurura gukubitwa n’inkuba. Niba uri ku igare cyangwa kuri moto, ibyiza ni ukubivaho kuko bishobora gutuma inkuba igukubita.

Kurinda ibikoresho bikoreshwa n’amashanyarazi ni ngombwa kwifashishwa ibyuma byabugenewe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza