Hakenewe ubufatanye mu kubungabunga umutungo kamere muri EAC - Dr Caleb

Hakenewe ubufatanye mu kubungabunga umutungo kamere muri EAC - Dr Caleb


Yanditswe kuya 28-01-2013 - Saa 16:12' na Ange de la Victoire Dusabemungu

Guhera kuri uyu wa 28 Mutarama, 2013 kugeza kuwa 1 Gashyantare 2013 i Kigali hateraniye inama ihuje impuguke mu bidukikije ziturutse mu bihugu bigize umuryango w’Afurika y’Iburasirazuba(EAC), ikaba igamije kurebera hamwe imihindagurikire y’ibihe n’imicungire y’umutungo kamere n’ibidukikije biherereye muri aka karere.

Iyi nama izakurikirwa n’iy’abaminisitiri bafite mu nshingano zabo ibijyanye n’umutungo kamere n’ibidukikije ku wa 1 Gashyantare 2013.

Afungura iyo nama, Dr. Caleb Wegoro, ushinzwe ibidukikije n’umutungo kamere muri EAC, yasobanuye ko ibihugu byo mu karere bigomba kugira ubufatanye mu kubungabunga ibidukikije n’umutungo kamere, kuko nta cyagerwaho ibihugu biramutse bidafatanyije.

Dr. Caleb Wegoro, Ushinzwe ibijyanye ibidukikije n'umutungo kamere muri EAC aganira n'itangazamakuru

Wegoro yagize ati”Iyo igihugu kimwe gihuye n’ingaruka mbi zitewe n’imicungire mibi y’ibidukikije biba uruhererekane no mu bindi bihugu ingaruka zikageramo. Kubera ko duhuriye mu muryango umwe w’ibihugu ni na yo mpamvu tugomba gukorera hamwe duteza imbere umutungo kamere n’ibidukikije byo mu karere”.

Urikijwe Wegoro akomeza avuga ko hakurikijwe umuvuduko w’abaturage n’imiturire, mu minsi iri imbere isi izaba ituwe n’abasaga miliyari 12. Ibyo akavuga ko haramutse habayeho kudafata neza ibidukikije n’umutungo kamere byazagira ingaruka, hakabura ibitunga abo baturage n’abazabakomokaho.

Umuyobozi wungirije muri REMA, Collette Ruhamya

Umuyobozi wungirije mu Kigo cy’Igihugu gishinzwe ibidukikije mu Rwanda (REMA), Collette Ruhamya, yatangarije abanyamakuru ko mu Rwanda hashyizweho politiki zitandukanye zo kubungabunga ibidukikije n’umutungo kamere muri rusange.

Abajijwe ku kibazo cy’ikoreshwa ry’ifumbire mvaruganda ikunze kuvugwa ko yangiza ubutaka, Ruhamya yavuze ko kugeza ubu mu Rwanda hataraboneka ingaruka z’ikoreshwa ry’iyo fumbire, ko ahubwo igikenewe ari ugushaka uko iyo yakoreshwa neza nyuma hakazarebwa uburyo yazasimburwa n’ifumbire y’imborera.

Mu bindi iyi nama izibandaho harimo gusuzuma uko imicungire y’umutungo kamere n’ibidukikije bihagaze, ingaruka z’imihindagurikire y’ibihe, ndetse no gutegura imishinga ijyanye no gukomeza guteza imbere urwego rw’umutungo kamere mu karere k’Afurika y’Iburasirazuba.

Amafoto/Steven Ndizeye

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO