Ikindi gikorwa cyo kurwanya ikoreshwa ry’amashashi

Ikindi gikorwa cyo kurwanya ikoreshwa ry’amashashi


Yanditswe kuya 25-01-2013 - Saa 15:26' na Emmanuel Kanamugire

Mu gihe u Rwanda rwiyemeje guca amashashi hagamijwe kurengera ibidukikije, ibikorwa by’umuganda usoza ukwezi kwa mbere kwa 2013 bizibanda ku gukusanya amashashi aho akigaragara; kugira ngo azajyanwe mu bubiko bwabugenewe hagamijwe kurengera ibidukikije, abaturage bafatanyije n’ubuyobozi bw’inzego z’ibanze bakaba basabwa kwitabira ibi bikorwa.

Umuyobozi w’ikigo cy’Igihugu cyo kubungabunga ibidukikije (REMA) Dr Mukankomeje Rose, avuga ko kugira ngo amashashi acike mu Rwanda bisaba ko buri muturarwanda yumva ko bimureba, inzego zose zikabigiramo uruhare.

Ati «Buri Munyarwanda niyumve ko kurwanya ikoreshwa ry’amashashi bimureba, inzego zose zibikangukire, Abanyarwanda babigire ibyabo batange amakuru y’aho ayo mashashi aherereye tuyakumire.»

Mukankomeje asaba kandi abaturage kumva ko kurwanya ikoreshwa ry’aya mashashi biri mu nyungu zabo, kuko akoze muri parasitiki (plastic) kandi afite ingaruka nyinshi harimo gutuma amazi y’imvura atabasha gucengera mu butaka n’umusaruro w’ubuhinzi ukagabanuka.

Amashashi kandi arekura imyuka ihumanya igihe atwitswe cyangwa akoreshejwe mu gupfundikira ibiryo biri ku ziko, n’izindi ngaruka mbi nyinshi. Abaturage rero barasabwa kuyirinda kugira ngo barusheho gutera imbere no kugira ubuzima bwiza.

Igikorwa cyo kurwanya amashashi kizakomeza gukorwa ku bufatanye bw’inzego zitandukanye, zirimo Polisi y’igihugu, Ikigo cy’igihugu gishinzwe imisoro n’amahoro ari na cyo kigenzura imipaka icaho amashashi yinjizwa mu gihugu, Ikigo cy’igihugu gishinzwe ubuziranenge, Minisiteri y’ubutegetsi bw’igihugu n’Ikigo cy’igihugu gishinzwe cyo kurengera ibidukikije.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO