Abashakashatsi baratabariza udusimba tuguruka turi mu marembera

Yanditswe na Mfitumukiza Moïse
Kuya 22 Ukwakira 2017 saa 11:55
Yasuwe :
0 0

Abashakashatsi baratabariza udukoko tuguruka bavuga ko hatagizwe igikorwa ibi binyabuzima byakwibagirana ku isi mu minsi ya vuba ndetse bigashyira n’ibindi binyabuzima bitandukanye mu kaga.

Mu bushakashatsi bwakorewe mu duce turenga 60 dutandukanye tw’u Budage, byagaragaye ko udukoko tuguruka tumaze kugabanukaho 75% mu myaka 30 ishize ndetse impamvu nyamukuru ibitera ikaba itazwi.

Aba bashakashatsi bavuga ko kugabanuka kw’ibi binyabuzima bidaturuka ku kirebe bibamo, ubutaka, cyangwa imiterere y’agace bibamo, ikaba ariyo mpamvu bataramenya impamvu nyamukuru bigabanuka umusubizo.

Dr Hans de Kroon wari uhagarariye ubu bushakashatsi, yemeza ko bikwiye kurindwa ndetse bikitabwaho hagamijwe kubifasha kutazimira ku isi.

Yagize ati” Ntabwo tuzi impamvu nyakuri, ubu bushakashatsi bugaragaza ko ari ngombwa kugira gahunda nziza zo kwita kuri ibi binyabuzima, niyo mpamvu tugiye gukora ubushakashatsi bwimitse tukamenya impamvu nyamukuru itera ibi binyabuzima gukendera. Nibyo bidushishikaje."

Igitangaje kandi muri ubu bushakashatsi ni uko no mu bice byagenewe inyamaswa, ibi binyabuzima naho bigabanuka nk’uko aba bashakashatsi babigaragaje.

Kugabanyuka kw’ibi binyabuzima bifite ingaruka nyinshi mbi kuko umubare munini wabyo ni ibiribwa na bimwe mu bifasha ibimera kororoka.

Dr Lynn Dicks, umwarimu muri Kaminuza ya East Anglia mu Bwongereza, yabwiye BBC dukesha iyi nkuru ko niba koko ibi binyabuzima biri kugabanuka kuri iyi ntera, iki kibazo cyaba ari icyo kwitabwaho nta kuzuyaza.

Yavuze ati" Udukoko tuguruka dufite akamaro gakomeye mu mibereho y’ibindi binyabuzima biri ku isi, umubare watwo ni ingenzi cyane."

Ubu bushakashatsi bwakorewe ku dukoko dutandukanye turimo inzuki n’ibinyugunyugu, aho hifashishijwe ibyanya 63 byo mu Budage bibamo ibinyabuzima bitandukanye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza