Amerika yiyemeje gufasha ibihugu birimo n’u Rwanda guhangana n’abashimuta inyamaswa

Yanditswe na Jean Pierre Tuyisenge
Kuya 11 Nzeri 2017 saa 07:11
Yasuwe :
0 0

Leta Zunze Ubumwe za Amerika zitangaza ko zigiye gukomeza ubufatanye na za guverinona zo ku mugabane wa Afurika mu guhangana n’abakomeje gushimuta umubare munini w’inyamaswa.

Mu Kiganiro ku murongo wa telefoni IGIHE yagiranye n’Umuyobozi wungirije w’Ibiro bya Leta Zunze Ubumwe za Amerika bishinzwe kurwanya ibiyobyabwenge ku rwego mpuzamahanga no kumenyekanisha amategeko, Dan Foote, yavuze ko bagiye gukomeza ibyo bikorwa, bagakomeza amahugurwa ku kurwanya ba rushimusi.

Yagize ati “ Kugeza ubu muri Afurika dufite gahunda yihariye muri Kenya, Tanzania, Bitswana, Namibia na Afurika y’Epfo, turifuza kwagura imikorere muri Malawi na Zambia. Turi gukora ibikorwa byinshi mu karere ka Afurika u Rwanda ruherereyemo.”

Yongeyeho ati “ Dufite ikigo cyigisha amategeko mu Mujyi wa Gaborone, Botswana, aho duhugura mu mategeko n’abayobozi mu bucamanza baturuka hirya no hino muri Afurika, tukanatanga by’umwihariko amasomo y’uburyo bwihariye bwo gukora iperereza ku byaha byo gushimuta inyamaswa.”

Hashize iminsi nta makuru y’ishimutwa ry’inyamaswa yumvikana mu Rwanda bitewe n’ingamba guverinoma yagiye ishyiraho, gusa ubu bufasha burakenewe kugira ngo uwabihirahira atabwe muri yombi nta mpaka.

Ikiganiro IGIHE yagiranye na Dan Foote gikubiye mu bitegurwa na guverinoma ya Leta Zunze Ubumwe za Amerika aho ishami rishinzwe Afurika ritegura ikiganiro n’abanyamakuru bo ku mugabane wa Afurika bakaganira ku ngingo zitandukanye hifashishijwe telefoni mu cyitwa Africa Regional Media Hub Press Briefing.

Amerika itangaza ko itanga nibura miliyoni 50 z’amadolari yo guhangana n’ishimutwa ry’inyamaswa, asaga 50% yayo akajya muri Afurika gusa. Umushinga wayo wa USAID kandi nawo ugira uruhare muri ibyo bikorwa.

Amerika igaragaza ko ishimutwa ry’inyamaswa muri Afurika rihangayikishije kuko ngo usibye no kwica inyamaswa cyangwa kwangiza ibidukikije ngo bihombya za guverinoma. Ikavuga ko izakomeza gufatanya na Afurika guhanga nabyo.

Hashize iminsi kandi humvikana iyicwa ry’inzovu hagamijwe gutwara amahembe yazo, n’andi moko atandukanye y’inyamaswa, Amerika ivuga ko abazishimuta bibinjiriza nibura miliyoni 40 z’amadolari ku mwaka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza