RDB yasobanuye icyatumye intare zitazitwa amazina nk’uko Perezida Kagame yabikomojeho

Yanditswe na Cyprien Niyomwungeri
Kuya 22 Kamena 2017 saa 06:47
Yasuwe :
0 0

Ikigo cy’Igihugu cy’Iterambere, RDB, cyatangaje ko umuhango wo Kwita Izina abana b’intare wari wakomojweho na Perezida Kagame umwaka ushize utazakorwa, ahubwo ko bahisemo kongerera ubushobozi Pariki y’Igihugu y’Akagera ikajya ku rwego rw’izifite inyamaswa eshanu zikomeye.

Mu muhango wo Kwita Izina abana b’ingagi ku nshuro ya 12, Perezida Paul Kagame yavuze ko mu minsi iri imbere hashobora kuzakorwa umuhango wo Kwita Izina abana b’intare zimaze imyaka ibiri zigaruwe mu gihugu nyuma yo kumara imyaka 15 zitaharangwa.

Yagize ati “Ariko gusubizaho intare muri Pariki y’Akagera, nategereje ko aza kongeraho [yavugaga Gatare wayoboraga RDB] ko bari hafi kudutumira kujya kwita izina. Mu bihe biri imbere tuzajya kwita Intare amazina. Ubwo nabyo ni indi ntambwe duteye.’’

Mu gikorwa cyo gusobanura ibijyanye no Kwita Izina ku nshuro ya 13 na gahunda ya Tembera u Rwanda cyabaye ku wa 21 Kamena, Umuyobozi ushinzwe ubukerarugendo no kubungabunga ibinyabuzima byo muri Pariki muri RDB, Belise Kaliza, yavuze ko icyo bahisemo ari ukongera inyamaswa zikomeye mu Akagera aho kwita Izina abana b’intare.

Yagize ati “Umwaka ushize twabonye amabwiriza yo kwita amazina intare ariko twasanze ibyo twakoze mu Birunga tutabikora mu Akagera. Icyo twakoze ni uko uyu mwaka Pariki y’Igihugu y’Akagera twayigize ‘Big Five’ bivuze ko twashyizemo za nyamaswa eshanu zikomeye.”

Yasobanuye ko icyitaweho ari ukureba icyaburaga kugira ngo pariki y’Akagera igire umwihariko wo kugira inyamaswa eshanu zikomeye, bagasanga ari ukugarura inkura z’umukara, aho muri uyu mwaka izigera kuri 18 zagejejwe muri iyi pariki zaherukagamo mu myaka 10 ishize.

Nyuma yo kugarura inkura, Pariki y’Akagera yagiye mu rwego rwa Big Five, ni ukuvuga pariki zifite inyamaswa eshanu zikomeye muri Afurika arizo intare, inzovu, imbogo, inkura n’ingwe. Byatumye kandi u Rwanda rwiyongera ku bihugu nka Afurika y’Epfo, Tanzania, Kenya na Botswana bifite izo nyamaswa.

Nyuma y’imyaka igera kuri 15 intare zaracitse mu Rwanda hagati mu 2015, ikigo RDB cyagejeje mu gihugu intare zirindwi zazanwe nk’impano yaturutse muri Afurika y’Epfo, zirimo eshanu z’ingore. Izi Ntare zagiye zibyara, abana bazo akaba aribo bagombaga guhabwa amazina.

Muri Gicurasi umwaka ushize imwe mu Ntare zashyizwe mu Akagera yiswe Shema yabyaye ibyana bitatu.

Umuyobozi ushinzwe ubukerarugendo no kubungabunga ibinyabuzima byo muri Pariki muri RDB, Belise Kaliza, yavuze ko icyo bahisemo ari ukongera inyamaswa zikomeye mu Akagera aho kwita Izina abana b’intare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza