Abatunze Samsung Galaxy Note 7 zavuzweho guturika basabwe kuzizimya

Yanditswe na Uwishyaka Jean Louis
Kuya 11 Ukwakira 2016 saa 09:36
Yasuwe : XX
0

Mu gihe hakomeje iperereza kuri telefoni ya Samsung Galaxy Note 7 iherutse gushya, uruganda ruzikora rwasabye abazitunze hirya no hino ku isi kuba bazijimije.

Muri Nzeri 2016 nibwo uruganda rwa Samsung, rwasabye ko Sumsung Galaxy Note 7 zigera kuri miliyoni 2.5 zari zaramaze kugurishwa zasubizwa ku ruganda nyuma y’uko rwakiriye ibirego by’abantu bagaragaza ko batiri zazo ziri guturika.

N’ubwo Samsung yari yarijeje abakiliya bayo ko telefoni zamaze gusimbuzwa izo nta kibazo zizongera kugira, hari amakuru avuga ko nazo zikomeje gushya.

BBC dukesha iyi nkuru ivuga ko hari umuntu umwe ukomoka muri Leta ya Kentucky uherutse gutangaza ko yabyutse mu gitondo asanga telefoni yari atunze yo mu bwoko bwa Samsung Galaxy Note 7 nshya iri gucumba umwotsi.

Ibi kandi byanakurikiwe n’indege muri Leta Zunze Ubumwe za Amerika iherutse kugwa igitaraganya nyuma y’uko telefoni y’ubwo bwoko y’umuntu wari uyirimo itangiye gucumba umwotsi.

Ibi byahise bituma uruganda rwa Samsung, ruherereye muri Koreya y’Epfo rusaba abatunze izi telefoni kuzizimya ndetse n’abazicuruza bakaba babihagaritse mu gihe iperereza rikomeje.

Samsung yagize iti "Bitewe n’uko umutekano w’abakiliya bacu ari wo dushyira imbere, Sumsung irasaba abacuruza izi telefoni ku Isi kubihagarika mu gihe iperereza rikomeje. Abakiliya bacu bafite Galaxy Note 7 za mbere ndetse n’izazisimbuye, barasabwa kuzizimya no guhagarika kuzikoresha."

Ibinyamakuru byo muri Koreya y’Epfo, bitangaza ko uru ruganda rwahuye n’igihombo gikomeye ku buryo ngo bishobora kuruviramo guhagarika gucuruza Telefoni burundu.

Ibi abakiliya ba Samsung babisabwe mu gihe ikompanyi zitandukanye z’indege zirimo na RwandAir zamaze gukumira itwarwa rya Galaxy Note 7 mu ndege zazo.

Sumsung yasabye abazitunze kuba bazijimije mu gihe ikizikoraho iperereza
Izi Telefoni zatangiye gushya nkuko iyi byayigendekeye muri Singapore

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza