Alibaba igiye gushora akayabo mu kubaka ikigo cy’ubushakashatsi kizayishyira ku isonga mu ikoranabuhanga

Yanditswe na Mfitumukiza Moïse
Kuya 13 Ukwakira 2017 saa 08:23
Yasuwe :
0 0

Ikompanyi ikora ibijyanye n’ubucuruzi bwo kuri internet "Alibaba Group", igiye gushora akayabo ka miliyari 15 z’amadolari ya Amerika azakoreshwa mu myaka itatu mu kubaka urwego rukomeye rw’ubushakashatsi ku isi no kurushaho guhanga udushya mu ikoranabuhanga.

Alibaba ihanganye ku isoko n’andi makompanyi arimo Tencent Holdings Limited na yo ikorera ubucuruzi kuri internet, Baidu Inc. ADR n’izindi zikorera mu Bushinwa n’ahandi.

CNN yanditse ko mu mushinga mushya, Alibaba iri gushakisha abashakashatsi 100 bazayifasha mu ntego yihaye yo guhaza abakiliya bagera kuri miliyari ebyiri, guhanga imirimo mishya irenga miliyoni 100 bitarenze 2036 binyuze muri Alibaba DAMO Academy.

DAMO Academy (Discovery, Adventure, Momentum and Outlook), izayoborwa n’Ushinzwe Ikoranabuhanga muri Alibaba Group, Jeff Zhang, aho biteganyijwe ko izatangirana no gufungura laboratwari mu mijyi irindwi itandukanye irimo Beijing na Hangzhou yo mu Bushinwa, San Mateo na Bellevue yo muri Amerika, Moscow mu Burusiya, Tel Aviv wo muri Israel no muri Singapore.

Ubushakashatsi buzibanda ku kubika amakuru, umutekano wo kuri internet no guhuza ubumenyi bwa muntu n’ubw’imashini.

Abagize ikipe ngishwanama ya Damo Academy barimo abarimu b’inzobere bo muri kaminuza zikomeye nka Havard, MIT, The University of Washington, Columbia University, Beijing Institute of Technology, Pekin University na Zhejiang University.

Alibaba ihanganye n’ibindi bigo bikomeye birimo Amazon, ikora ubucuruzi bwo kuri internet, iyi iheruka gushora asaga miliyari 16 z’amadolari ya Amerika mu bikorwa by’ikoranabuhanga mu mwaka ushize.

Ihanganye kandi n’ibigo byinshi bibarizwa muri Silicon Valley, ikibaya giherereye muri San Francisco gicumbikiye amakompanyi y’ikoranabuhanga akomeye ku isi arimo Amazon, Google, Visa, Apple, Facebook n’ayandi.

Umuherwe Jack Ma washinze Alibaba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza