Buffett yaguze indi migabane miliyoni 75 muri Apple

Yanditswe na Mukaneza M.Ange
Kuya 5 Gicurasi 2018 saa 02:36
Yasuwe :
0 0

Sosiyete Berkshire Hathaway y’umuherwe Warren Buffet yaguze indi migabane miliyoni 75 mu ruganda rukora ibikoresho by’ikoranabuhanga rwa Apple.

Iyi migabane yaguzwe mu gihembwe cya mbere, yiyongera ku yindi miliyoni 165.3 Berkishire isanzwe ifite muri Apple.

Nk’uko CNBC yabyanditse, Umuyobozi mukuru wa Apple, Tim , yatangaje ko bishimiye kuba Warren na Sosiyete ye ya Berkishire ari bamwe mu banyamigabane b’ingenzi b’uru ruganda.

Yagize ati “Ku giti cyane, iteka nahoze nshima imikorere ya Warren, kandi nkishimira icyerecyezo n’inama ze.”

Kugeza ku wa Kane, umugabane wa Apple umwe waguraga 176.89 by’amadolari, bivuze ko imigabane ya Berkshire iza ku mwanya wa gatatu mu kugiramo imigabane myinshi nyuma ya Vanguard na BlackRock yari ifite agaciro ka miliyari 42.5 z’amadolari.

Buffet watangaje ibijyanye no kugura indi migabane muri Apple mu ijoro ryo kuwa gatatu, umunsi umwe ngo inama y’abanyamigabane ibihumbi 40 ba Berkshire ibe, yavuze ko uru ruganda ruhagaze neza kandi rukomeje kwinjiza amafaranga menshi.

Uyu muherwe yavuze ko kuri uyu wa gatandatu aribwo baza kugaragaza uko umutungo wa Berkshire afitemo imigabane isaga 38% uhagaze, ndetse n’ibigo 10 binini ifitemo imigabane; iyi raporo yitezweho kugaragaza uburyo iki kigo gishyize imbaraga mu gushora muri Apple.

Muri iki cyumweru Apple yatangaje ko mu mezi atatu ya mbere ya 2018 yabonye inyungu ya miliyari 13.8 z’amadolari, ikaba yariyongereyeho 25% ugereranyije n’uko byari bihagaze igihe nk’iki mu 2017.

Warren Buffet, se wa Howard Buffet uzwi cyane mu Rwanda kubera ibikorwa byo kuhira mu karere ka Kirehe, afite umutungo ubarirwa muri miliyari 84 z’amadolari. Ni uwa gatatu mu baherwe ku isi nyuma ya Jeff Besoz washinze Amazon na Bill Gates wa Microsoft.

Umuherwe Warren Buffet yatangaje ko sosiyete ye ya Berkshire Hathaway yaguze indi migabane muri Apple

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza