‘Drones’ zikoreshwa mu Rwanda mu bitanga icyizere ku iterambere ry’ikoranabuhanga muri Afurika

Yanditswe na Mukaneza M.Ange
Kuya 17 Mata 2017 saa 01:47
Yasuwe :
0 0

Mu gihe Afurika ikomeje urugamba rw’iterambere rishingiye ku ikoranabuhanga, Ikigo ngenzuramikorere, PwC, cyifashishije urugero rwa ‘Drones’ zikoreshwa n’u Rwancda mu kugeza amaraso hirya no hino mu mavuriro, kigaragaza ko hari icyizere ko bizagerwaho.

Mu Ukwakira 2016, nibwo ku bufatanye na Sosiyete y’Abanyamerika, Zipline, u Rwanda rwatangiye kugeza amaraso hirya no hino ku mavuriro hakoreshejwe Drones.

Mu kiganiro yagiranye na RFI, Umuyobozi muri PwC ushinzwe ibijyanye n’imari muri Afurika, Pierre-Antoine Balu yagaragaje ko hari imishinga myinshi y’ikoranabuhanga ikomeje kuzana impinduka mu mibereho y’Abanyafurika.

Ati “Ingero ni nyinshi, nka Drones ziri gukoreshwa uyu munsi n’u Rwanda mu kujyana imiti mu duce twitaruye; ntibiri mu rwego rwo kugabanya ikiguzi gusa ahubwo no kuvura abantu mu gihe gito gishoboka.”

Yakomeje agaragaza ibindi bikorwa cyane cyane bishingiye ku kohererezanya amafaranga hakoreshejwe telefoni igendanwa, aho yatanze urugero kuri M-Pesa ikoreshwa muri Kenya.

Balu kandi yanavuze ko uburyo umubare w’Abanyafurika bakoresha telefoni na Internet ugenda wiyongera, bitanga icyizere ko mu 2020, batandatu mu 10 bazaba batunze ‘smartphone’.

Ati “Tugendeye ku mibare yacu, dusanga mu myaka itanu ishize umubare w’abakoresha telefoni muri Afurika wariyongereye ku kigero cya 344%. Muri 2020 turateganya ko abanyafurika bari hagati ya batanu na batandatu mu 10 bazaba bafite smartphone.”

Yongeyeho ko kandi icyizere ku iterambere ry’ikoranabuhanga muri Afurika, gishingirwa ku kuba mu 2016 agera kuri miliyoni 160 z’amadolari yashowe mu mishinga ijyanye na ryo. Ni mu gihe ugereranyije n’abatuye u Buhinde usanga bwo bwarashoye agera kuri miliyari enye z’amadolari.

Nubwo muri Afurika hakiri ikibazo cyo kubona amafaranga yo gushora muri iyi mishinga, ba nyirayo bagahitamo kujya gukorera muri Amerika n’i Burayi, PwC igaragaza ko kizakemurwa no gushyira imbere ubufatanye hagati y’abikorera n’ibigo by’imari.

Perezida Kagame ubwo yatangizaga ibikorwa bya Drones zitwara amaraso

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza