Academic Bridge yahembewe guteza imbere ikoranabuhanga mu burezi bw’u Rwanda

Yanditswe na Uwishyaka Jean Louis
Kuya 28 Ugushyingo 2016 saa 08:45
Yasuwe :
0 0

Ikigo Academic Bridge gifasha amashuri yo mu Rwanda gukusanya amakuru arebana n’abanyeshuri n’abarimu, cyegukanye igihembo gikesha guteza imbere uburezi hakoreshejwe ikoranabuhanga gitangwa n’Ikigo Mpuzamahanga cy’Ikoranabuhanga mu itumanaho (ITU).

Iki gihembo cyitwa ‘Thematic Award Winner Education’, Academic Bridge yagihawe ku itariki ya 18 Ugushyingo 2016, mu birori byabereye mu mujyi wa Bangkok muri Thailand.

Umuyobozi Mukuru wa Academic Bridge, Mariam Muganga ari na we wakiriye iki gihembo, yavuze ko bagihawe kubera ko ikigo cyabo cyagaragaje impinduka mu muryango nyarwanda.

Ati” Ni irushanwa rifunguye ku bihugu byose. Ubundi ITU ireba udushya wazanye ndetse bakanareba niba hari impinduka zageze ku bakoresha serivisi z’icyo kigo, ibi byose uba ugomba kubigaragaza igihe wiyandikisha.”

Muganga akomeza avuga ko uretse iki gihembo, banahawe irindi shimwe rigaragaza ko bakora neza, ibi byose agahamya ko bizatuma barushaho kumenyekana no kwizerwa n’ibigo by’amashuri bikenera gukorana na Academic Bridge.

Nk’uko bisobanurwa na Muganga, Academic Bridge ngo ifasha ibigo by’amashuri kugira urubuga bakusanyirizaho amakuru atandukanye ajyanye n’umunyeshuri, umwarimu, gukora indangamanota, kugenzura amasomero ndetse n’ababyeyi bakabasha kumenya uko abana babo bari kwitwara ku ishuri.

Iki kigo cyatangiye gukora neza muri Nzeri 2015, uyu mwaka w’amashuri ukaba urangiye bakorana n’ibigo 13, gusa ngo hari n’ibindi 20 bamaze kugirana amasezerano yo gutangira gukorana umwaka utaha.

Uretse ibi bihembo byahawe Academic Bridge hari n’ibindi byatanzwe mu byiciro bitandukanye birimo ubuzima, cyegukanwe n’abo muri Koreya, icy’imiyoborere cyahawe abaturutse muri Sudani, icyo kurwanya ibiza cyahawe Mastercard ndetse n’ikindi kigenewe ibigo by’ubucuruzi bito n’ibiciriritse cyatwawe n’Abanyakenya.

Ubwo yatangaga ibi bihembo, Umunyamabanga Nshingwabikorwa wa ITU, Houlin Zhao, yavuze ko bizatuma ababihawe barushaho kwagura ibikorwa byabo bityo bagatanga umusanzu mu kugeza isi ku bukungu bushingiye ku ikoranabuhanga.

Muganga n'Umunyamabanga Nshingwabikorwa wa ITU,Houlin Zhao
Muganga Mariam avuga ko ikigo cyabo cyahembewe kuba cyaragaragaje impinduka mu muryango nyarwanda
Abantu batandukanye baturutse hirya no hino ku Isi bahembwe mu byiciro binyuranye

[email protected]


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza