Ibitero by’ikoranabuhanga byahombeje Afurika miliyari zirenga $3.5 mu 2017

Yanditswe na Evariste Nsengimana
Kuya 1 Gicurasi 2018 saa 01:00
Yasuwe :
0 0

Ikigo cy’Ikoranabuhanga gitanga inama ku bikorwa by’Ubucuruzi muri Afurika (Serianu), cyatangaje ko ibigo birenga 90% bikora ubushabitsi kuri uyu mugabane bidafite ubushobozi bwo gukumira ibitero by’ikoranabuhanga bigabwaho.

Raporo cyise ‘The Africa Cyber Security’ igaragaza ko mu 2017, Umugabane wa Afurika wahombye miliyari zirenga 3,5 z’amadolari ya Amerika, binyuze mu bujura mu by’ikoranabuhanga, imibare yavuye kuri miliyari zirenga ebyiri z’amadolari mu 2016.

Serianu isobanura ko umubare munini wabyo byifashisha gusa amadolari atagera ku bihumbi 10 ku mwaka mu bikorwa by’ubwirinzi bw’ubujura bw’ikoranabuhanga kandi ko ari make atabifasha ubwo uko bikwiye. Ibyo bikaba ngo biterwa n’amikoro make n’ikoranabuhanga riciriritse byifashisha mu guhangana n’icyo kibazo.

Iyo raporo igaragaza ko mu 2017, ibigo by’ubucuruzi byigenga n’ibya Leta birenga kuri 95% byo muri Afurika, kimwe cyakoresheje amadolari atarenga 1,500 muri ubwo bwirinzi.

Umuyobozi Mukuru wa Serianu, William Makatiani, yavuze ko abakora ubucuruzi buciriritse benshi barajwe ishinga no kubaka ubwirinzi bw’ibanze nkuko The East African yabitangaje.

Iyo raporo itangaje ibi mu gihe abahanga n’inararibonye mu guhangana n’ibitero by’ikoranabuhanga muri Afurika benshi bahawe akazi n’ibigo bikomeye nyuma y’igitero cya Ransomware, kimwe mu bikomeye byibasira ibikoresho by’ikoranabuhanga mu gihe gishize.

Serianu ivuga ko mu Karere ka Afurika y’Uburasirazuba, gafite abahanga mu gukumira ibyo bitero batagera ku 2,500; Kenya yahombye miliyoni zisaga $210 mu 2017 zivuye kuri miliyoni $171 mu 2016; Tanzania yahombye miliyoni $99 ivuye kuri $85 mu 2016; Uganda yahombye $67 ivuye kuri $35, mu gihe muri Afurika hose Nigeria ariyo yashegeshwe cyane n’igihombo cy’asaga miliyoni $649.

Avuga ku gitero cy’ikoranabuhanga cyagabwe kuri Kaminuza ya Makerere muri Uganda, Minisitiri w’Ingabo, Raychelle Omamo, yavuze ko ibigo byinshi nta bushobozi bifite bwo kwirindira umutekano, ko hakenewe ingamba zihamye n’imikoranire hagati y’ibihugu.

Kuri ubu Kenya yashyizeho ibihano bikarishye ku muntu uhamwe n’icyo cyaha, birimo gufungwa imyaka igera kuri 20 cyangwa gutanga amande y’ibihumbi $200.

Iyo raporo igaragaza ko banki n’ibigo by’ubucuruzi byo mu bihugu 10 bya Afurika byakozweho ubushakashatsi, byahombye byibuze miliyoni $248 mu 2017 mu gihe Leta zahombye izisaga $204, abakora ubucuruzi bwo kuri internet bahombye miliyoni $173, abahererekanya amafaranga kuri telefoni bahombye miliyoni $140 mu gihe ibigo by’itumanaho byahombye miliyoni $119.

Ibigo bikomeye muri EAC byibasiwe n’ibitero by’ikoranabuhanga umwaka ushize harimo icy’Imisoro n’Amahoro cya Kenya cyibwe miliyoni zisaga $40, Kaminuza ya Makerere muri Uganda aho amazina y’abanyeshuri basaga 50 yasibwe n’abantu batazwi ku rutonde rw’abo yagombaga guha impamyabumenyi.

Bimwe mu byo iyo raporo yashyize mu majwi mu biha umurindi ibitero by’ikoranabuhanga harimo amakuru y’ibihuha, igasaba za Leta n’abakoresha imbuga nkoranyambaga kubyirinda.

Sosiyete ikora ibijyanye n’Umutekano w’Ikoranabuhanga, Karspesky, yagaragaje ko mu 2016, sosiyete zatakaje nibura amadolari 879 582 zisana ibyangijwe n’ibitero by’ikoranabuhanga; yashyize u Rwanda ku mwanya wa 78 mu bihugu byugarijwe n’ibitero by’ikoranabuhanga ku Isi. Kenya niyo iza mu myanya y’imbere muri Afurika y’Uburasirazuba kuko iri ku mwanya wa 59, Uganda ku wa 79 naho Tanzania iri ku wa 64.

Inama Mpuzamahanga y’iminsi ibiri yiga ku mutekano w’ikoranabuhanga izwi nka ‘Cloud Security Summit’, yateraniye i Kigali muri Werurwe 2018, yagaragarijwemo ko Isi ihangayikishijwe n’ibitero bikorerwa mu ikoranabuhanga kurusha ibindi.

Minisitiri w’Ikoranabuhanga n’Itumanaho, Jean de Dieu Rurangirwa, yavuze ko nta mahitamo agihari ku batuye Isi ku kuba bakoresha ikoranabuhanga cyangwa batarikoresha kuko ryamaze kuganza, ahubwo icyangombwa ari ukumenya uko barikoresha.

Umwaka ushize, ubujura bwifashisha ikoranabuhanga bwahombeje Isi miliyari zigera 600 z’amadolari. Byitezwe ko nihadafatwa ingamba zikomeye ubwo bujura buzaba bumaze guhombya Isi tiliyari esheshatu mu mwaka wa 2021.

Ibitero by’Ikoranabuhanga byahombeje Afurika miliyari zirenga $3.5 mu 2017

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza