Iby’ingenzi ngo utunge kandi ugendere mu modoka wirinde impanuka

Yanditswe na Karirima A. Ngarambe
Kuya 15 Ukuboza 2016 saa 07:47
Yasuwe :
0 0

Imodoka ni gikoresho gikenerwa cyane mu buzima bwa buri munsi kuva mu 1885 ubwo yahimbwaga, ariko nacyo ubwacyo gikenera kwitabwaho,ku buryo utabikoze aba ashyira ushyira ubuzima bwe mu kaga adasize n’ubw’abandi.

Gusa abahanga bagaragaza ko hari ibintu by’igenzi umuntu ashobora kwitaho cyane, bikamufasha gutunga imodoka ifite ubuziranenge kandi yizewe.

IGIHE yagiranye ikiganiro cyihariye na Ingénieur Mécanique Sylvain Druelle, Umufaransa utuye mu Bubiligi umaze imyaka 12 akorana n’ikigo gikorana ibirebana n’imodoka n’ibikoresho zikenera, Midas, agaragaza byinshi ku bijyanye n’ingingo zifasha kumenya gutunga no kugendera mu modoka yizewe n’ibijyana nabyo.

Druelle avuga ko gukorera imodoka ubugenzuzi buhoraho bifite akamario kanini mu kurinda uyikoresha, aho avuga ko imodoka yashyirwa mu bice bibiri, harimo ibijyanye n’umutekano wayo n’igice cy’uruhurirane rw’amapine.

Ati “Imodoka wayishyira mu bice bibiri. Igice cya mbere twagiha ibijyanye n’umutekano, icya kabiri twavuga ko ari moteri ituma imodoka igenda buri munsi mu buryo bunoze, iki gice twagishira mu cyo twakwita mpandeshatu (ni ukuvuga ibintu cyangwa utudomo dutatu difite aho duhurira).”

Druelle avuga ko mu bijyanye n’umutekano harimo ibituma imodoka igenda hasi, (ku buryo bivuzwe mu gifaransa harimo Suspension, les bras de suspension, amortisseurs,) hakaza n’igice cya kabiri cya mpandeshatu aricyo amapine.

Ati “Twibukiranye ko amapine uko ari ane ariyo akora ku butaka, ibi bikaba bivuze ngo iki gice cyonyine ni nko kurambika urupapuro hasi, ubiretse utyo ubuzima bwawe buba bumeze nkuburambitse mu muhanda.’’

“Birakenewe cyane ko ayo mapine uko ari ane aba yuzuye umwuka mu buryo bwemewe kandi buhagije ku gipimo cy’imodoka. Igice cya gatatu cya mpandeshatu ni amaferi. Kugenda mu modoka ni byiza ariko kandi utabasha kuyihagarika igihe ushakiye ni ikindi kibazo gikomeye, ni igice gikomeye cyane.”

Druelle avuga ko nk’iyo imodoka igeze mu igaraji, umukanishi w’umuhanga ibyo bintu ahita abirebaho.

Ku muntu uba ugiye gutunga imodoka atabimenyereye, Druelle avuga ko hari ibintu by’ingenzi aba akwiye kwitondera agahora agenzura, harimo kumenya niba ifite amapine meza, yujuje umwuka hagendewe ku bipimo byashyizweho, kandi umuntu akareba amapina meza aramba.

Ati “Imodoka kandi igomba kugira rasoro nziza, Rotules (ibituma imodoka ikata), kuko nibyo birinda impanuka bishyira umuntu mu mutekano, hanyuma ku bijyanye n’amaferi, hagomba kubaho ko ku mpande zose enye z’amapine feri ziba zimeze neza, bivuze ko niba igihande kimwe gifunga neza feri ikindi ntigikore imodoka usanga yigira aho ishaka, iburyo cyangwa ibumoso, ku buryo byatera impanuka.’’

“Hagomba rero kubaho ibyuma bigize feri bimeze neza kandi bisaba ko kugira ngo ibyo byose bikore neza ahava umuriro naho iba ikora neza nka ABS, ESP, ibyo ubisanga ku modoka zakozwe mu myaka 20 ishize. Bikaba rero bisaba koko guhora hakorwa isuzumwa n’ihindurwa ry’ibishaje rigenwa n’uruganda rwakoze imodoka.’’

Druelle yavuze ko igenzura ry’ubudakemwa bw’imodoka (contrôle technique) rikorwa ku bijyanye na ’système de sécurite’ n’ibijyanye n’amategeko y’ibiri ku modoka bikoreshwa mu muhanda, urugero niba amatara yaka neza kandi yemewe n’amategeko, niba imodoka ifunga neza amaferi ariko ntiyinjira cyane mubyo kureba niba ibikoresho byazo bishaje koko. Izareba niba amapine ashobora gukomeza kugenderwaho, ariko akenshi ntikubuza gukomeza kuyakoresha kereka koko yashize, izakubwira ko byaba byiza uyahinduye.

Naho mu igarje ho tukubwira ko ibyiza ari uguhindura ibyuma bishaje kuko ari ko kazi kacu no kubungabunga umutekano w’umukiriya ku buryo bwimbitse.

Druelle kandi yavuze ko umuntu uri muri mu Rwanda n’ahandi muri Afurika rwose ashobora gufungura igaraje rya Midas.

Ati "Agomba gufungura icyo bita “Master franchise” , akagira abakozi b’umwuga kugirango agendere ku mabwiriza ya Midas y’ubudakemwa mu mikorere no kwakira umukiriya, bisaba kuba kandi ufite amafaranga yo gutangiza iki gikorwa, ubundi nawe akaba yakwirakwiza igaraje rya Midas mu turere twose two mu Rwanda."

Druelle ni umuhanga mu bukanishi bw’imodoka kuko yakoze muri Group PSA (Peugeot & Citroën) imyaka 15, ubu akaba yikorera aho afite igaraji rifite abakozi bane nawe wa gatanu bose bafite ubumenyi buhambaye.

Druelle aganira n'Umunyamakuru wa IGIHE
Druelle yereka Umunyamakuru wa IGIHE uburyo imodoka ikorerwa isuzuma
Amapine arimo umwuka uhagije ni ingenzi ngo imodoka idakora impanuka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza