Ibyo wasigarana kuri ’Transform Africa’ yakoranyirije abarenga 4000 mu rwa Gasabo

Yanditswe na Cyprien Niyomwungeri, Rabbi Malo Umucunguzi
Kuya 18 Gicurasi 2017 saa 07:54
Yasuwe :
0 0

U Rwanda rwongeye kwerekana ko ari igicumbi cy’ikoranabuhanga muri Afurika, rwakira Inama Mpuzamahanga yiga ku ikoreshwa ry’ikoranabuhanga mu kwihutisha amajyambere n’ubukungu by’uyu mugabane ‘Transform Africa 2017’, yabaye kuva ku wa 10 -12 Gicurasi 2017 mu nyubako ihebuje ya Kigali Convention Centre.

Kuva 2013, bibaye inshuro ya gatatu Transform Africa yakirirwa mu Rwanda, aho kuri iyi nshuro abagera ku 4000 baturutse mu bihugu 81 baganiriye ku ngamba zatuma Afurika yibona mu mpinduramatwara ya kane, by’umwihariko hatezwa imbere imijyi binyuze mu ikoranabuhanga no guhanga udushya.

Uwavuga ko iyi nama yari ubudasa ntiyaba yibeshye kuko niyo yitabiriwe n’abantu benshi ugereranyije n’izabanje nyamara kuyinjiramo byarasabaga kubanza kwishyura amadolari ya Amerika ari hagati ya 200 na 500, ibintu bitabagaho mu za mbere zitabiriwe n’abagera ku 2000 na 2500 gusa.

Ikoranabuhanga ryo mu rwego rwo hejuru, robot zishobora gukura benshi ku mugati, umwihariko w’abagore mu ikoranabuhanga, ibiganiro bishamaje ku ikoranabuhanga, imurikabikorwa, amasezerano anyuranye n’ibindi byose byitezweho guhindura amateka ya Afurika biri mu byaranze inama y’i Kigali.

Ikoranabuhanga ridasanzwe

Ibigo Mpuzamahanga nk’ibyo muri Koreya y’Epfo, u Burusiya, u Buyapani, Estonia n’iby’imbere mu gihugu byakataje mu ikoranabuhanga byaserukanye ishema mu nama ya Transform Africa 2017 bimurika ibyo bikora.

Kuva ku koza moto, kohererezanya amafaranga, gufasha mu itumanaho no koroshya ingendo, kugera ku ma-robot ashobora gukoreshwa haba mu gusubiza ubwenge ku gihe cyangwa ubusemuzi, ni uruhurirane rw’ikoranabuhanga wasangaga muri Kigali Convention Centre.

Abanyarwanda bakoze uburyo bwo koza moto hifashishijwe imashini mu buryo buzwi nka ‘PiKIWASH’, abanyeshuri bo muri Sinhgad Technical Education Society (STES Rwanda), bakora ipombo itera umuti ndetse ba rwiyemezamirimo biyemeza kubashoramo imari, hadasigaye uburyo busanzwe nka MERGIMS mu kohereza amafaranga n’ubundi.

Hari nk’Abanya-Koreya bakoze uburyo bushobora gufasha abapiganira amasoko ya leta, aho umuntu azinjizamo ibyo asabwa byose, kimwe n’abandi bari guhatanira isoko, ubundi imashini ikirwariza ikerekana uwaritsindiye.

Umuyobozi mu ruganda Korea Information Certificate Authority Inc, Jong Min Choi, yabwiye IGIHE ko bo bamaze kubaka ikoranabuhanga rishobora gukoreshwa mu gutera kashe ku rupapuro rwa PDF cyangwa abahatanira amasoko bakabona ikoranabuhanga ritanga imikorere izira uburiganya.

‘Robot’ zimaze kugira ubushobozi buhambaye

Ikigo Hancom kimaze kwamamara ku Isi mu ikoranabuhanga rihambaye, ni kimwe mu byagaragaje ibyo gikora muri Transform Africa 2017, ndetse ugasanga bamwe batumva neza uko babigezeho.

Ushinzwe iterambere ry’ubucuruzi ku rwego mpuzamahaga, Jun Jung, yasobanuye ko bakoze robot isemura, aho uyibwira ururimi wumva ikagusubiza mu rundi ukeneye, mu gihe wumva utarusobanukiwe. Mbere yo kugusubiza ibanza kumwenyura yaba itumvise ikijima mu maso nk’umuntu ubabaye ikabona kugusubirishamo.

Jung yabwiye IGIHE ati “Iri koranabuhanga ni naryo tuzakoresha mu gusemura mu mikino Olempiki yo mu gihe cy’ubukonje izabera muri PyeongChang mu 2018.”

Uretse ibyo bafite n’irindi koranabuhanga bakoresha nko mu gufasha abantu gusubira mu buzima busanzwe, nk’aho ‘Tv Screen’ iba iri imbere yawe, bakakwambika ibintu mu maso bigufasha kureba neza, bakaba bakina n’amashusho y’amafi agenda mu mazi ukabona neza uri mu Nyanja, bakagusaba nko gufata amafi cyangwa kuyarasa.

Ni ikoranabuhanga ngo ryifashishwa ahanini nko mu gufasha abantu kugorora ingingo zabo cyangwa kongera kwitekerezaho, aho kwifashisha amasomo nk’uko mu bihugu bimwe babikora, ibintu ngo usanga birambira abantu.

Hanerekanwe robot ishobora gufasha umuntu gukina umupira w’amaguru, kandi igihe cyayo cyo gutera ntihushe ndetse yaba iguye ikabasha kwibyutsa n’ubwo iba ikozwe mu byuma bisanzwe.

Umwihariko w’abagore mu ikoranabuhanga

Ubushakashatsi bwakozwe n’Umuryango World Wide Web Foundation, bukamurikwa bwa mbere mu nama ya Transform Africa 2015, bwerekanye ko 50% by’abagore bo muri Afurika yo munsi y’ubutayu bwa Sahara batagera kuri internet. Muri rusange abagabo bakaba ari bo bayikoresha cyane.

Nubwo iki cyuho cyanigaragaje muri iyi nama aho abayitabiriye 30% bari abagore, ku nshuro ya mbere abagore bagenewe ibiganiro byihariye bigamije kurebera hamwe uruhare rwabo mu iterambere ry’ikoranabuhanga, ndetse abakobwa bahize abandi mu guhanga udushya barashimirwa mu irushanwa rya Ms Geek Africa.

Ibiganiro bishamaje ku ikoranabuhanga

Inama ya Transfrom Africa 2017, yitabiriwe n’abakuru b’ibihugu batanu, Visi Perezida, ba Minisitiri w’Intebe, abayobozi b’imijyi yo ku Isi yose bagera kuri 300, abashakashatsi, abahanga mu ikoranabuhanga, abayobozi b’ibigo n’abandi.

Ibyumba binini by’inama bya Kigali Convention Centre byarakoreshejwe bitewe n’uko inama zashoboraga kuba ari nyinshi mu gihe kimwe.

Itangazamakuru ntiryibagiranye

Itangazamakuru nk’urwego rukomeye mu gufasha abaturage kwibona muri gahunda zitandukanye, ryatekerejweho rigenerwa umwanya wihariye (Media room), wisanzuye kandi urimo ibyangombwa byose birifasha gukora akazi neza kandi vuba nkuko byifuzwa.

Internet inyaruka ya 4G, gufashwa kubona abayobozi bo kuganira ku nsanganyamatsiko z’inama, indangururamajwi n’insakazamashusho zahujwe n’iziri mu cyumba cy’inama ku buryo bakurikiriraniragamo inama yose nk’abibereye mu cyumba cyayo, kandi batanahagaritse akazi kabo ko kuyitangaho amakuru.

Mu byumba byari byateganyirijwe itangazamakuru, byari bifite ibikoresho byose nkenerwa mu kazi karyo, twavuga aho kwifatira amajwi, aho gutangira ibiganiro (interviews) n’ibindi.

Amasezerano anyuranye yarasinywe

Inama ya Transform Africa 2017 yaberaga i Kigali, yageze ku musozo hasinywe amasezerano y’ubufatanye, ay’ubucuruzi afite agaciro k’agera muri miliyoni 100 z’amadolari ya Amerika.

Iyi nama yasize u Rwanda rumurikiye Afurika igishushanyo cy’uburyo rwifuza uko imijyi igezweho yaba imeze. Ibi byatumye hari amasezerano ya miliyoni $ 50 asinywa mu gutangira kugishyira mu bikorwa.

Abakuru b'ibihugu batandukanye bitabiriye iyi nama
Uwavuga ko iyi nama yari ubudasa ntiyaba yibeshye kuko niyo yitabiriwe n’abantu benshi ugereranyije n’izabanje nyamara kuyinjiramo byarasabaga kubanza kwishyura amadolari ya Amerika ari hagati ya 200 na 500, ibintu bitabagaho mu za mbere zitabiriwe n’abagera ku 2000 na 2500 gusa
Inama ya Transform Africa 2017 yaberaga i Kigali, yageze ku musozo hasinywe amasezerano y’ubufatanye, ay’ubucuruzi afite agaciro k’agera muri miliyoni 100 z’amadolari ya Amerika
Muri iyi nama ku nshuro ya mbere abagore bagenewe ibiganiro byihariye bigamije kurebera hamwe uruhare rwabo mu iterambere ry’ikoranabuhanga, ndetse abakobwa bahize abandi mu guhanga udushya barashimirwa mu irushanwa rya Ms Geek Africa
Benshi basigaranye urwibutso rukomeye batazibagiwa
Hari ibice bitandukanye byo kumurikiramo ibikorwa bijyanye n'ikoranabuhanga

Amafoto: Rwanda Gov


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza