Leta y’u Burusiya yafunze ikoreshwa ry’urubuga rwa Telegram

Yanditswe na Mukaneza M.Ange
Kuya 13 Mata 2018 saa 01:38
Yasuwe :
0 0

Nyuma yo kunanirwa kumvikana ku bijyanye no kugenzura amakuru ahererekanywa hagati y’abakoresha urubuga rwa Telegram, Leta y’u Burusiya yafunze ikoreshwa ryarwo.

Nk’uko bitangazwa n’Ibiro Ntaramakuru by’Abarusiya, Tass; Ikigo gishinzwe kugenzura ibijyanye n’itumanaho mu Burusiya, Roskomnadzor cyari cyasabye Telegram gutanga urufunguzo rwo kwinjira mu butumwa bw’abakoresha uru rubuga bitarenze itariki ya 4 Mata 2018.

Ni nyuma y’uko Ikigo gishinzwe umutekano mu Burusiya, FSB gisabye guhabwa ubu burenganzira, kugira ngo kibashe gukumira ibitero by’iterabwoba bishobora kugabwa muri iki gihugu mu bihe biri imbere.

Ubuyobozi bwa Telegram ariko bwavuze ko uburyo yubatse nta nzira n’imwe ihari yo kwinjira mu butumwa bwafunzwe n’abakoresha uru rubuga (encrypted messages).

Umunyamategeko wa Telegram, Pavel Chikov, yavuze ko gusaba kwinjira mu butumwa bw’abakoresha uru rubuga binyuranyije n’Itegeko Nshinga kandi bidashoboka ko bubahiriza ubusabe bwa FSB.

Mu 2013 nibwo Pavel Dourov yatangije urubuga rwa Telegram mu Burusiya, rusanzwe rufite umwihariko w’uko amakuru ahererekanywa aba ariho urufunguzo, ku buryo uwo atagenewe bitamworohera kuyafungura.

Kuva mu myaka yashize u Burusiya bwagiye bushinja uru rubuga rukoreshwa n’abagera kuri miliyoni 200 biganjemo Abarusiya n’abo mu Burasirazuba kwifashishwa n’abiyahuzi mu gutegura no gukora ibikorwa by’iterabwoba hirya no hino ku Isi.

Leta y’u Burusiya yafunze ikoreshwa ry’urubuga rwa Telegram

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza