Ni gute ibitero by’ikoranabuhanga bigabwa mu matora y’ibindi bihugu?

Yanditswe na Jean Luc K. Mugisha
Kuya 1 Mata 2017 saa 12:55
Yasuwe :
0 0

Hashize iminsi itari mike ibihugu bitandukanye bitangiye kurushaho kwikanga kwibwa amabanga, byakunze kuvugwa ariko hakaba abo bigora kubyumva; abandi ntibabyiteho rimwe na rimwe batekereza ko ntaho bahuriye na byo.

Umuvuduko mu ikoranabuhanga, ni ikimenyetso kidashidikanywaho cyerekana ko isi yinjiye mu bihe bishya kandi bidasanzwe.

Ni ibihe bisaba imyitwarire idasanzwe, gutekereza cyane, gukora cyane no kudasigara inyuma, kuko ahanini ubuzima bwa buri munsi buragenda burushaho gushingira ku ikoranabuhanga.

Mu gihe ibintu byinshi bishingiye ku ikoranabuhanga n’intambara zo muri ibi bihe zishingiye ku bitero by’ikoranabuhanga.

Aho ibi bitero bitandukaniye n’uburyo busanzwe ni uko akenshi, uwibasiwe abimenya hashize igihe cyangwa bikarangira atanamenye ibyamubayeho.

Iyi ntambara yaba yaratangiye ryari ? Kuki uko iminsi ihita iki kibazo kirushaho gufata indi ntera ? Ese bizarangira gute? Ibi byose, ni ibibazo byibazwa ariko bikagorana kubibonera ibisubizo.

Amerika yikomye u Burusiya mu matora y’umwaka ushize

Hashize iminsi, bamwe mu bayobozi bakomeye ba Leta Zunze Ubumwe za Amerika, bikoma igihugu cy’u Burusiya, bavuga ko cyagize uruhare rukomeye mu kugena ibyavuye mu matora yabaye umwaka ushize.

Ni ibintu byarakaje ubuyobozi bwa Perezida Obama, bigeza n’aho afata icyemezo cyo kwirukana Abadipolomate barenga 30 b’ i Moscou; mbere gato y’uko atanga ubutegetsi.

Ibi bitera benshi kwibaza ukuntu abahanga mu ikoranabuhanga muri Leta Zunze Ubumwe za Amerika, batabashije kubona hakiri kare ko amatora ashobora kwibasirwa n’ibitero biturutse hanze y’igihugu.

Hari n’abatekereza ko abo bahanga babimenye ariko bagasnaga bumwe mu buryo bwo kurwana iyi ntambara ari ukuba baretse kubishyira ahagaragara. Igishya ku by’iki gitero, ni uko noneho kivugwa mu matora y’umukuru w’igihugu cy’igihangange ku Isi.

Amatora yo mu Bufaransa na yo yinjiwemo

Nyuma y’amatora yo muri Leta Zunze Ubumwe za Amerika, na none u Burusiya bwashyizwe mu majwi ko bwinjiye mu yo mu Bufaransa.

Ibi byatangajwe n’ukuriye komisiyo y’iperereza muri Sena ya Amerika, ishinzwe gushyira ahagaragara uruhare rw’u Burusiya mu matora aheruka muri Leta Zunze Ubumwe za Amerika mu mpera z’umwaka ushize, bivugwa ko byongereye amahirwe Perezida Trump, watsinze amatora bitari byitezwe.

Ibihugu bitari bike byaribasiwe

Ibi bitandukanye n’ibyari bimenyerewe, aho abantu bumvaga ko ibigo bikomeye byibwe amabanga, amafaranga atagira ingano yibwe mu mabanki cyangwa yayobejwe bikarangira nta wumenye uko byegenze.

USA TODAY ivuga ko ibihugu bitari bike, byibasiwe n’ibitero by’ikoranabuhanga mu gihe gishize ariko ikibazo ntigihabwe intera gifite. Muri ibyo bihugu harimo Ukraine, Bulgaria, Estonia, u Budage, u Bufaransa na Australia.

Iki kinyamakuru kivuga ko ibi bitero byoherejwe n’abantu bari mu Burusiya ariko ntibigaragara niba ari ubuyobozi bwabibatumye.

Hannah Thoburn, umushakashatsi muri Hudson Institute, yabwiye iki kinyamakuru ko ibyo bitero, byari bigamije "guhindura intumbero y’ibihugu", hashingiwe ku gutangaza amakuru agonganisha abaturage. Ni amakuru yabaga yibwe muri mudasobwa ziri kuri internet.

Ibitero by’ikoranabuhanga byatangiye ryari?

USATODAY igaruka ku ijambo ry’Umukuru w’u Burusiya yavugiye mu nama yiga ku mutekano yabereye i Munich mu mwaka wa 2007. Muri iyi nama, uyu muyobozi yatangaje ko uburyo bwa Demokarasi USA ishaka gutegeka amahanga kugenderaho, guverinoma y’u Burusiya izabusubiza inyuma.

Ni muri uwo mwaka nk’uko iki kinyamakuru kibivuga, ibitero by’ikoranabuhanga byatangiye kwibasira ibihugu by’i Burengerazuba.

Mu byavuzwe cyane, hari ikibasiye ikinyamakuru Le Monde, nyuma yaho kibaye icya mbere mu kuvuga inkuru ishyira mu majwi ingabo z’u Burusiya mu burasirazuba bwa Ukraine.

Mu bindi byavuzwe, hari Warsaw Stock Exchange, isoko ry’imari muri Poland ryagabweho igitero, ndetse n’ahantu hagera kuri 36 hibwa amakuru.

Ikindi gitero kibasiye icyicaro gikuru cya NATO i Buluseli nk’uko Perezida Rosen Plevneliev yabitangarije BBC.

Muri ibi bitero, Inteko Ishinga Amategeko y’u Budage, Bundestag, ntiyasigaye inyuma kuko emails z’abayigize zinjiwemo. Mu bindi bigo byibasiwe muri iki gihugu harimo Ibiro bikuru birinda Iremezo ry’Itegeko Nshinga, Germany’s Federal Office for the Protection of the Constitution (BfV).

Aya makuru yakomeje guhakanwa n’abayobozi b’u Burusiya, nk’uko Guardian newspaper yabitangaje.

Kubigaragara, iki kibazo aho kugabanuka kirarushaho gufata indi ntera. Ni ikibazo gihangayikishije abayobozi bakuru ba Washington muri iki gihe.

Muri rusange, ni ikibazo bigoye kumenya uko cyarangizwa mu gihe havugwa kwibasirwa ku ibihugu birangaje ibindi mu nzego zitandukanye.

Ibi bibaye nyuma yaho ikinyamakuru The Wall Street Journal, giheruka gutunga agatoki Korea ya Ruguru kugaba igitero cy’ikoranabuhanga.

Muri iki gitero, hibwe miliyoni 81 USD muri Banki Nkuru ya Bangladesh, akuwe kuri konti y’ikigega cy’amadovise ya Leta ya Amerika.

Richard Ledget, umuyobozi wa NSA, yatangaje ko ari bintu bikomeye kubona Leta y’igihugu yiba banki. Ayo mafaranga bivugwa ko yabanje kuyoberezwa muri za Casino, nyuma aburirwa irengero burundu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244