BTN TV yatangiye ibiganiro iha umwihariko ibihangano Nyafurika

Yanditswe na Rabbi Malo Umucunguzi
Kuya 15 Gashyantare 2017 saa 07:33
Yasuwe :
1 0

BTN TV (Big Television Network) ni televiziyo imaze ibyumweru bitatu igaragarira Abanyarwanda, ikaba yanatangije ibiganiro bizibanda ku kwerekana ibikorwa by’Abanyarwanda n’Abanyafurika muri rusange, hagamijwe kwerekana ubushobozi bukomeye bifitemo.

BTN TV ni umwe mu mishinga y’ikigo Big Concept Management kitari gishya mu bijyanye n’ikoreshwa ry’amashusho mu Rwanda, rikaba ishoramari ry’Umunyarwanda ukiri muto, Ahmed Pacifique.

Gusa ngo uyu mushinga usa n’uwakerewe ho gato biturutse ku gutinda kubona umurongo wo gukoreraho ku bigo biyitanga nka RBA na Startimes, hakaba hashize ibyumweru bitatu BTN TV isakaza amashusho, ariko kuri uyu wa mbere nibwo yatangije urukurikirane ruhoraho rw’ibiganiro.

Ahmed ati “Muri ibyo byumweru bitatu twari mu igerageza ariko dufite n’ibiganiro twagiye dufata mbere, inkuru ndende, ibiganiro n’abantu, umuziki… ariko kuwa Mbere nibwo twavuga ko ibiganiro twabitangije ku buryo uvuga ngo kuri iyi saha wasangaho iki kiganiro.”

“Ubu dufite imyidagaduro nk’umuziki kandi umuziki twibandaho ni uw’Abanyarwanda n’Abanyafurika gusa, nibyo biba kuri televiziyo yacu.”

Ibyo ngo bivuze ko kugira ngo uzasangeho nk’indirimbo y’umuhanzi nka Chris Brown wenyine bitazashoboka, keretse naririmbana n’Umunyarwanda cyangwa Umunyafurika.

Yakomeje agira ati “N’amafilimi tuzibanda ku y’umuco nyafurika, amafilimi nyarwanda, ku bijyanye no guteza imbere Afurika muri rusange, tukerekana ko n’abanyafurika dushoboye.”

“Ku biganiro dufite iby’iyobokamana, ubucuruzi, iby’ubuzima… nk’akarusho ni uko nk’iminsi itatu mu cyumweru, dufite isaha yose hakinwa indirimbo z’abagore b’abahanzi b’Abanyafurika, kuko usanga bisa n’aho abantu batazi ko bahari.”

Kuri BTN TV kandi abantu bazajya basangaho ibiganiro by’abana byigisha nko gusoma, kubara, bitewe n’imyaka yabo.

Harimo n’igice cyagenewe iyobokamana, cyane ko ibiganiro bitangira saa kumi n’imwe bikagera saa sita z’ijoro, igihe gisigaye kigaharirwa umuziki, ariko isaha ya mbere ya saa kumi n’imwe yagenewe amasengesho kandi amadini yose agahabwa umwanya.

Ahmed yakomeje agira ati “Kuri BTN TV, amajwi, amashusho, uhita ubona ari ibintu bitandukanye. Hari n’abantu hano bataremera ko ari na televiziyo iri mu Rwanda. Ni ukugaragaza ko n’Abanyarwanda dushobora gukora ibyiza.”

Iyi televiziyo ishobora kugaragara kuri chaine ya 126 kuri Star Times, ndetse ishobora no kugaragara kuri MTN TV, mu minsi mike ikazaba irebwa mu buryo bwa ‘live stream’ unyuze ku rubuga rwayo.

BTN TV ifite ubushobozi bwo gukora ibiganiro mu buryo bwa ‘Live’ ahantu hatanu hatandukanye, icyarimwe.

Kugeza ubu televiziyo 23 zimaze kubona uburenganzira bwo gukorera mu Rwanda. Muri izo izatangiye gukora zirimo RTV (Television Rwanda), Royal TV, Family TV, Contact TV, TV1, TV 10, Goodrich TV, Clouds TV, Flash TV, Isango TV ndetse na Authentic TV.

Uko muri Studio za BTN hameze

Imbere muri studio za BTN TV hateye amabengeza
Amatara agezweho akoreshwa iyo hafatwa amashusho by'umwihariko mu masaha ya nijoro cyangwa mu gihe hari urumuri ruke
Studio ya BTN TV yubatse ku buryo bugezweho ku rwego mpuzamahanga
Televiziyo ya BTN ifite camera zigezweho zifata amashusho yo ku rwego rwo hejuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza