Ingendo abagenzi bakoze bifashishije ikarita ziyongereyeho miliyoni 21 mu 2018

Yanditswe na Akayezu Jean de Dieu
Kuya 15 Mutarama 2019 saa 10:22
Yasuwe :
0 0

Ikigo AC Group cyatangaje ko inshuro abagenzi bakojeje amakarita y’ingendo ku byuma byabigenewe, zavuye kuri miliyoni 66 mu 2017 zigera kuri miliyoni 87 mu mwaka ushize wa 2018.

Ni imibare igaragaza uko abagenzi bakoresha imodoka rusange bakomeza kwiyongera, nyuma y’amavugurura Guverinoma yakoze mu rwego rwo gutwara abagenzi mu modoka rusange mu myaka ishize.

Mu 2013, nibwo Urwego ngenzuramikorere (RURA) n’Umujyi wa Kigali bagiranye amasezerano n’ibigo KBS, Royal Express na RFTC bitwara abagenzi mu Mujyi.

Aya masezerano yagenaga uduce ikigo kizajya gitwaramo abagenzi kandi kikubahiriza amabwiriza arimo kuba nta mugenzi ugomba gutegereza imodoka ku cyapa igihe kirenze iminota itanu.

Mu duce twatanzwe, KBS yahawe gukorera muri zone ya mbere irimo Remera, Kanombe, Kabeza, Nyarugunga, Rusororo (Kabuga), Masaka ndetse na Ndera

Mu 2018, nibwo ibi bigo byongerewe umwaka umwe nyuma y’aho amasezerano y’imyaka itanu yari yararangiye muri Nzeri 2018.

Mu Ukuboza 2018, Umuyobozi w’Umujyi wa Kigali wungirije ushinzwe iterambere ry’ubukungu, Busabizwa Parfait yabwiye IGIHE ko hari gahunda yo kongera imirongo mishya harimo ujya i Muyange, ukomeje Kicukiro, n’ujya I Masaka ndetse na Kanyinya.

Umwaka ushize kandi nibwo RURA yatangaje ko yagiranye amasezerano yo gukwirakwiza internet mu modoka n’Ikigo AC Group, gisanzwe gifite ikoranabuhanga ryifashishwa mu kwishyura amafaranga y’urugendo ukoresheje ikarita izwi nka Tap&Go.

Aya mavugurura yiyongera ku kwagura imihanda no kubaka inzu zagenewe abagenzi bategereje imodoka zizaba zirimo televiziyo n’uburyo umugenzi ashobora kumenya aho imodoka ategereje igeze.

Izi nzu zijyanye n’Umushinga wa Smart City ugamije kugira Kigali umujyi ukoresha ikoranabuhanga rigezweho. Zizaba zirimo intebe zo kwicaraho, televiziyo, icyuma abagenzi bifashisha bashyira amafaranga ku ikarita, Tap & Go, ibyuma bitanga umwuka, inyuma kandi hazaba hari n’ubwiherero.

Abakora ingendo bakoresheje amakarita bariyongereye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza