Ishuri rya Sinhgad ryagobotse abagizweho ingaruka n’icibwa ry’ibyapa bya ‘analogue’ i Kigali

Yanditswe na Tombola Felicie
Kuya 13 Gashyantare 2017 saa 11:36
Yasuwe : XX
0

Abanyarwanda bavuga ko ’uwabuze umuranga yaheze mwa nyina’, bituma kwamamaza bitwara amafaranga menshi mu bigo bitandukanye byaba ibya Leta ndetse n’iby’abikorera.

Bitewe n’aho u Rwanda rugeze mu iterambere kwamamaza mu buryo butajyanye n’igihe byaraciwe mu mujyi wa Kigali kuko biteza umwanda bigatuma isura y’umujyi itagaragara neza.

Umujyi wa Kigali uherutse gushyira mu bikorwa amabwiriza yasohotse mu igazeti ya leta yo kuwa 17 Ukwakira 2016 yo gukuraho ibyapa byamamaza ku karubanda mu mujyi wose igihe atari ibya ‘Electronic’ ibyihindukiza (Tri-Vision) n’ibiyobora abantu.

Mu gushaka igisubizo cyafasha abagizweho ingaruka n’ubwo buryo bwo kwamamaza budateye imbere, abanyeshuri biga muri Kaminuza ya Sinhgad yigisha ikoranabuhanga batangije uburyo bwo gukora ibyapa by’ikoranabuhanga ku buryo butamara umuriro kandi bugezweho.

Simbi Arsène, umunyeshuri wiga mu mwaka wa kane mu bijyanye n’amashanyarazi (Electrical Engeering) mu ishuri rikuru rya ‘Sinhgad Technical Education Society’ yagize ati “ Turi abanyeshuri batandatu bishyize hamwe mu guhimba imirimo binyuze mu guhanga udushya dutandukanye tuba dukorerwa hano muri kaminuza.”

“‘Led sign board’ ni ibyapa by’ikoranabuhanga twatangiye gukora bikoresha udutara dutoya kandi bitamara amashanyarazi kuko bikoresha umuriro muke cyane.”

Simbi avuga ko bajya gutekereza gukora ibyo byapa babanje bagasuzuma bagasanga nta hantu bikorerwa mu Rwanda , ababifite babitumiza hanze ndetse bakabona ko ari ibintu bikenewe dore ko ibyapa bisanzwe kugira ngo byake nijoro bikenera kuba bizengurutswe n’amatara menshi kandi atwara umuriro.

Ati “Twabanje kureba ibyiza by’ibyapa bigezweho Leta yifuza ,dusanga uretse isuku bitanakoresha umuriro mwinshi.

Naguha nk’urugero, nk’icyapa twari dusanzwe dufite hano ku ishuri cyari kirimo amatara atandatu mo imbere kugira ngo na nijoro kibashe kugaragara , twasanze ku mwaka cyaratwaraga ibihumbi 146 ariko icyapa cy’ikoranabuhanga twakoze cyo kizatwara amafaraga ibihumbi 7500 gusa ku mwaka.”

Abanyeshuri bo mu ishuri rikuru rya Sinhgad bavuga ko kugira ngo icyapa kiboneke ibikenerwa byinshi biboneka ku masoko yo mu Rwanda uretse bikeya bishobora gutumizwa mu mahanga .

Ibyapa bikorwa n'abanyeshuri bo muri Kaminuza ya Singhad Technical Education Society

Umutoni Natacha na we ari mubakora ibyapa by’ikoranabuhanga ati “Ibyapa by’ikoranabuhanga dukora birahendutse ntabwo igiciro cyabyo gihwanye n’uwatumije icyapa mu Bushinwa cyangwa ahandi kuko amafaranga agitangwaho ngo kigere mu Rwanda aba ari menshi kandi nta n’ikintu ashobora kugihinduraho ariko twebwe agize icyo atishimira twahita tubikosora.”

Turifuza kuba uruganda rugemura ibi byapa n’ahandi

Natacha ati “Usanga nk’i Burundi, Congo n’ahandi na bo bagifite ibyapa bitajyanye n’iterambere, biriya bimara umuriro.

Turifuza gukora cyane tukaba uruganda rugaba amashami ku buryo no mu bindi bihugu twazagezayo ibi byapa.”

Abanyeshuri bavuga ko kugira ngo ibyapa by’ikoranabuhanga biboneke atari akazi k’umuntu umwe kuko hari abashushanya (designers) bakerekana uko icyapa kizaba kimeze.

Hari abashinzwe kureba ingano y’amashyanyarazi kizakenera n’abize ibijyanye na mudasobwa bakora ibijyanye na ‘animation’ kugira ngo amagambo ajye agenda yiyandikamo adahagarara.

Icyapa bakoreye ishuri ryabo kizajya gitwara umuriro w'ibihumbi birindwi ku mwaka

Nshunguye Justin, umwarimu muri kaminuza ya Sinhgad yavuze ko nk’umurezi bashishikariza abanyeshuri kwihatira gushyira mu bikorwa ibyo biga kurenza uko babifata mu mutwe gusa.

Ati “Abanyeshuri bacu tubasaba gushyira mu bikorwa ibyo biga ni yo mpamvu hano uhasanga amatsinda atandukanye aba yaregeze ku bikorwa bifatika kandi bisubiza ibibazo by’abaturage.Nk’ibi byapa by’ikoranabuhanga bakoze batangiye kubona amafaranga kuko bamwe batangiye kubaha isoko.”

Nzitonda Kiyengo, Umuyobozi wa Kaminuza ya Sinhgad Technical Education Society atangaza ko ibyo abanyeshuri bakora bafashijwe n’ikigo cyabo ari ibintu byiza ndetse ko abamaze kubikoresha batabishidikanyaho, gusa ngo aho bakomanze usanga bagishidikanya.

Ati “Abanyarwanda usanga batagirira icyizere abandi banyarwanda , ahubwo ubona kugira ngo babyemere ari nk’uko wagenda witwaje umuzungu cyangwa undi muntu w’umunyamahanga.Iyo ubabwiye ko ari abanyarwanda babikora rwose usanga bacitse intege bataranabona ibyiza bakora.”

Uyu muyobozi akangurira inzego zose kwizera no guteza imbere ibikorerwa mu Rwanda kuko ibikorwa byivugira kurenza amagambo bashaka kubwirwa n’abanyamahanga.

Kwandika abanyeshuri bashya muri kaminuza ya Sinhgad, iherere mu karere ka Kicukiro birakomeje kuko umwaka w’amashuri bazawutangira tariki ya 6 Werurwe 2017.

Inkuru bifitanye isano: Umujyi wa Kigali washwishurije abafite ibyapa byamamaza basabaga kwihanganirwa amezi 18

Iki cyapa kugira ngo kibone nijoro cytwara ibihumbi 140 ku mwaka
Ibyapa bitandukanye bikorwa n'abanyeshuri ndetse bakaba baratangiye kubona abakiliya
Kaminuza iherereye Kicukiro ahateganya n'ishuri ryisumbuye rya Kagarama
Ni ibyapa bijyanye n'igihe kandi bikorerwa mu Rwanda
Udutara dukoreshwa dutwra umuriro muke cyane
Aba banyeshuri bafite intego yo gukora ibikorwa byabo bikambuka imipaka

tombola@igihe.com


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza