NASA igiye gukora indege igendera ku muvuduko uruta uw’ijwi

Yanditswe na Mukaneza M.Ange
Kuya 9 Mata 2018 saa 09:17
Yasuwe :
3 3

Ikigo cy’Abanyamerika gikora ubushakashatsi ku bumenyi bwo mu kirere n’isanzure (NASA), cyatangaje ko kigiye gukora indege ifite ubushobozi bwo kugendera ku muvuduko uruta uw’ijwi (supersonic craft), kandi ntihagire urusaku rwumvikana.

Iyi ndege igiye gukorwa nyuma y’uko izaherukaga ari iza Concorde zagenderaga ku muvuduko wa 2,180 km/h, ni ukuvuga hafi inshuro ebyiri ugereranyije n’ijwi rigendera ku wa 1,192 km/h.

Indege za Concorde zari zaratangiye gukoreshwa mu 1976 zaje gukurwa ku isoko mu 2003 nyuma y’ibibazo bitandukanye birimo n’ingaruka zaturutse ku mpanuka y’imwe muri zo yabaye mu 2000 igahitana abari bayirimo bose uko ari 109, ndetse n’abandi bane bari ku butaka.

Nk’uko CNN dukesha iyi nkuru yabyanditse, NASA igiye kuzana indege ishobora kuzajya itwara abagenzi kandi inyuze mu nzira y’indege zisanzwe. Yamaze guha isoko rya miliyoni 247.5 z’amadolari, ikigo cy’Abanyamerika Lockheed Martin.

Iki kigo cyahawe inshingano yo gukora no kugerageza iyi ndege yiswe X-plane cyangwa "Low-Boom Flight Demonstrator", no kuyishyikiriza ishami rya NASA rikora ubushakashatsi ku birebana n’indege (Flight Research Center), bitarenze umwaka wa 2021.

NASA ivuga ko yizeye ko iyi ndege izajya itwarwa n’umuntu izaba ifite ubushobozi bwo kwihuta kandi idasohora urusaku rubangamira abari ku Isi, ikazaba intangiriro yo gukora izishobora no gutwara abagenzi.

Yitaye cyane ku kijyanye n’urusaku kubera ko biri mu byagize ingaruka ku ndege za Concorde zari zarakozwe n’Abafaransa bafatanyije n’Abongereza.

Jaiwon Shin ushinzwe ibijyanye n’indege muri NASA yavuze ko ibanga bazakoresha ngo bakemure ikibazo cy’urusaku harimo imiterere ya X-Plane, aho izaba ifite uburebure bwa metero 29, intera ya metero icyenda hagati y’amababa yayo, ndetse n’ibiro ibihumbi 15 igihe yujujwemo amavuta ayifasha kuguruka.

Si NASA gusa ariko ifite umugambi wo kugarura ku isoko indege zihuta cyane kuko Ikigo gitwara abantu n’ibintu mu ndege cya Japan Airlines cyashoye miliyoni 10 z’amadolari mu mushinga nk’uriya wiswe Boom Technologies.

Ni mu gihe ikigo Spike Aerospace cyo gisa n’ikiri imbere y’abandi giteganya ko mu mpera z’uyu mwaka kizakora igeragezwa rya S-512 Supersonic Jet, nayo ifite umuvuduko uruta uw’ijwi.

Igishushanyo cy'indege ya X-plane igiye gukorwa na NASA izaba ifite umuvuduko uruta uw'ijwi
Indege ya Concorde yagenderaga ku muvuduko ukubye hafi inshuro ebyri uw'ijwi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza