Nissan yashyize hanze imodoka nshya ikoreshwa n’amashanyarazi

Yanditswe na Mfitumukiza Moïse
Kuya 6 Nzeri 2017 saa 05:15
Yasuwe :
0 0

Uruganda rwo mu Buyapani rukora imodoka rwa Nissan rwashyize hanze indi modoka ikoreshwa n’amashanyarazi, ishobora kurufasha guhangana n’izindi zimaze kumenyekana kuri iri soko.

Nissan ifite icyicaro i Nishi-ku mu Mujyi wa Yokohama mu 2010 nibwo yashyize hanze imodoka ya mbere ikoresha umuriro w’amashanyarazi yiswe Nissan Leaf ndetse izisaga 280,000 zikaba zarahise zigurwa.

Kuri uyu wa kabiri, uru ruganda rwashyize hanze imodoka ivuguruye irusha ubushobozi iyari isanzwe ihari. Iyi modoka ishobora kugenda kilometero zisaga 370 itarashiramo umuriro, ikaba irusha 40km iyari yarakozwe mbere yayo.

Irindi vugurura ryakozwe muri iyi modoka ni ukongeramo ikoranabuhanga rigezweho mu mitwarire no kuyiha isura igaragara neza.

Iyi modoka izagurishwa £22,220(asaga miliyoni 24 z’amafaranga y’u Rwanda) nk’uko Nissan yabitangaje, izatangira gucuruzwa mu Buyapani mu Ukwakira, naho mu bindi bihugu ikaba izahagera mu ntangiriro z’umwaka utaha.

BBC dukesha iyi nkuru yanditse ko ubuyobozi bw’uru ruganda bwatangaje ko ruzakora n’indi ihenze, inayirusha ubushobozi mu mwaka utaha.

Imodoka zikoresha amashanyarazi zikomeje kuzamura ihangana mu gukora hagati ya sosiyete zikora imodoka ndetse iyi yakozwe ikaba yitezweho guhanganira isoko n’izindi modoka zikoranye iri koranabuhanga nka Volkswagen e-Golf, BMW i3 na Hyundai Iconiq.

Nubwo imodoka zikoresha amashanyarazi zikomeje gushorwamo akayabo, ziracyari ku rugero rwo hasi mu kugurwa ku masoko.

Mu mwaka ushize wa 2016, habarurwaga imodoka zisaga miliyoni ebyiri zikoresha amashanyarazi ku isi hose, mu gihe izirenga miliyoni 80 arizo zagurishijwe hirya no hino nkuko International Energy Agency yabigaragaje.

U Bushinwa burifuza ko nibura mu 2025, imodoka imwe muri eshanu zo muri iki gihugu izaba ikoresha umuriro w’amashanyarazi mu rwego rwo guhangana n’ihumana ry’ikirere riterwa n’ibinyabiziga, cyane ko iki gihugu aricyo cya mbere kigura imodoka nyinshi ku isi.

Nissan yashyize hanze imodoka nshya ikoreshwa n'amashanyarazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza