RRA yatangije porogaramu izagenzura imikorere myiza y’ibikoresho remezo by’ikoranabuhanga

Yanditswe na Mukaneza M.Ange
Kuya 16 Gashyantare 2017 saa 11:43
Yasuwe : XX
0

Ikigo cy’Igihugu cy’Imisoro n’Amahoro, RRA cyatangije porogaramu izakoreshwa mu kugenzura no gukurikirana imikorere myiza y’ibikoresho remezo by’ikoranabuhanga kugira ngo ahagaragaye ikibazo gihite gikemurwa mu maguru mashya.

Iyi porogaramu yitwa ‘Early Warning and Control System, EWACS ’yamuritswe kuri uyu wa Kane tariki ya 16 Gashyantare 2017; yakozwe n’ ikigo cyitwa Korea Trade Network, ku nkunga ya Leta ya Korea ibinyujije mu Kigo cyayo gishinzwe iterambere mpuzamahanga, KOICA.

Komiseri mukuru wa RRA, Richard Tusabe yavuze ko EWACS izagira uruhare mu gukomeza kunoza serivisi zihabwa abagana iki kigo hakoreshejwe ikoranabuhanga kuko izajya ibereka ahashobora kuvuka ibibazo bigakemurwa hakiri kare.

Ati” Icyo ije kudufasha ni ukugira ngo ihuze ikoranabuhanga ryose dukoresha. Ubungubu iraduha ishusho ry’ikoranabuhanga, aho dukorera hose mu gihugu. Ushobora kubona uko serivisi ziri gutangwa wicaye aha. “

Izatuma Ikigo cy’Igihugu gishinzwe imisoro n’Amahoro kibasha kugenzura ikoranabuhanga ryose gikoresha, hirindwa ibibazo byose bishobora kuvuka ndetse no kumenya ubundi buryo bwiza bunogeye abasoreshwa bwakoreshwa.

Tusabe kandi yavuze ko bafatanyije na KOICA bari gukora irindi koranabuhanga rizatuma RRA ibasha kugenzura uburyo ibicuruzwa biva mu bubiko bw’abacuruzi (Upgraded EBM); iri koranabuhanga rikaba ryitezweho gukemura ikibazo cy’abanyerezaga umusoro ku nyongeragaciro (TVA), hagaragazwa ibicuruzwa umuntu yaranguye, ibyo yacuruje n’ibyo asigaje mu bubiko.

Umuyobozi wa KOICA mu Rwanda, Hyeong Lae Cho, yagaragaje ko iri koranabuhanga ari umusingi wo gushyigikira RRA mu bikorwa byayo bigamije kuzamura ubukungu bw’igihugu hagamijwe iterambere ry’u Rwanda.

Ambasaderi wa Korea mu Rwanda, Kim Eung-joong yavuze ko gufasha RRA kubona iri koranabuhanga biri mu bikorwa by’iterambere igihugu cye cyiyemeje gukorana n’u Rwanda.

Ati” KOICA ikora ibikorwa byinshi by’iterambere birimo uburezi, ikoranabuhaganga, n’iterambere ry’icyaro. Uyu ni umwe mu mishinga yatangiye gutanga umusaruro tubonye. Ndatekereza ko iyi ari impano nziza abaturage ba Korea bahaye u Rwanda.”

Biteganyijwe ko umushinga w’iri koranabuhanga n’ibikorwa bijyanye no guhugura abakozi muri serivisi z’imisoro na za gasutamo, uzarangira utwaye hafi miliyoni esheshatu z’amadorali.

Ubwo porogaramu izagenzura ikoranabuhanga rya RRA yashyirwaga ahagaragara
Iyi porogaramu izafasha kumenya ahari ibibazo bihite bikemurwa hakiri kare
Ambasaderi wa Korea mu Rwanda, Kim Eung-joong yavuze ko gufasha RRA kubona iri koranabuhanga biri mu bikorwa by’iterambere igihugu cye cyiyemeje gukorana n’u Rwanda
Ubwo iyi porogaramu yamurikwaga
Ambasaderi wa Korea mu Rwanda, Kim Eung-joong (ibumoso) na Komiseri Mukuru wa RRA, Tusabe Richard
Ambasaderi wa Korea mu Rwanda, Kim Eung-joong amaze guhabwa impano

angel@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza