Uburyo bwo kwinjira mu gihugu hakoreshejwe ikoranabuhanga bwatashywe ku mugaragaro

Kuri uyu wa Gatanu tariki ya 18 Gicurasi, ku kibuga cy’indege cya Kigali hatangijwe ku mugaragaro uburyo bushya bwo kwinjira mu gihugu hakoreshejwe ikoranabuhanga, ku banyarwanda bava hanze bashaka kwinjira mu gihugu, uburyo bwiswe “Automated Passenger Clearance System”, (APCS).

Uyu muhango wo gutangiza ubu buryo bushya witabiriwe na minisitiri mu biro bya perezida wa Repubulika, Madam Venantie Tugireyezu, wavuze ko bishimije cyane kubona u Rwanda nk’intangarugero mu ikoranabuhanga mu karere Ruhereryemo, ari na rwo rubaye urwa mbere mu gukoresha ubu buryo bugezweho.

Avuga ku kamaro bizagirira igihugu gukoresha iri koranabuhanga yagize ati : “Ubu buryo bwiza bwo kugenzura abinjira buzadufasha mu kunoza imikorere, kuko buzafasha mu kugabanya umwanya abagenzi batakazaga bategereje guteza kashe mu byangombwa byabo, bityo bitume akazi kihuta.”

Ubusanzwe ubu buryo bwo kugenzura abagenzi hakoreshejwe ikoranabuhanga ntiburasakara henshi ku isi, gusa bwiganje mu bihugu birimo ibyo mu Burayi, Amerika na Aziya. Sosiyete yacuruje ubu buryo ku kigo cy’igihugu gishinzwe abinjira n’abasohoka ni iyo muri Portugal.

Nk’uko Ange Sebutege ukuriye servisi z’itangazamakuru n’itumanaho mu buyobozi bw’abinjira n’abasohoka, abivuga, abantu bemerewe gukoresha ubu buryo bushya bwa APCS, ni abenegihugu b’u Rwanda bazajya baba bariyandikishije kandi basanzwe bafite inzandiko z’abajya mu mahanga, bakaba banafite indangamuntu y’u Rwanda.

Akomeza avuga ko mu minsi iri imbere, n’abanyamahanga bafite uruhushya rwo gutura mu Rwanda bazongerwa muri ubu buryo, batangire nabo babukoreshe.

Dore uko ubu uburyo bukoreshwamo

Umugenzi wamaze kwiyandikisha mu buryo bwagenywe, yegera amarembo ya APCS, agashyira urwandiko rw’inzira (Passport), ku ipaji iriho umwirondoro we, akahashyira ahabugenewe kuri ibi byuma byo kwinjiriramo, ubundi umuryango ubanza w’aya marembo ukifungura, yamara gutambuka n’umuzigo we, umuryango ukongera ukifunga.

Iyo amaze kwinjira mu muryango wa mbere, haba hasigaye undi muryango, wifungura ari uko ashyize igikumwe cye ahabugenewe, maze uwo nawo ukifungura, umugenzi agahita asohoka, uyu muryango nawo ukongera ukifunga.

Aho ni igihe nta kibazo kibayeho cyo kugira ibya ngombwa bitari ibyawe, kuko ibi byuma aho bitandukaniye no gukoresha abantu mu kugenzura ni uko byo bitibeshya ku mwirondoro w’umuntu, cyangwa ifoto. Nyiri ibyangombwa niwe wenyine ubasha kuba yabikoresha, kuko iyo bidahuye umuryango udafunguka.

Minisitiri Venantie Tugireyezu afungura ku mugaragaro ibikorwa bya APCS

Minisitiri w’urubyiruko na ICT Nsengimana Jean Philbert ubwo yari avuye mu ruzinduko rw’akazi yakoresheje ubu buryo aranabushima

Minisitiri muri perezidansi Venantie Tugireyezu yerekwa uburyo kwiyandikisha bikorwamo

Amarembo akoresha ikoranabuhanga mu igenzura ni uko ateye

Aho bashyira urwandiko rw’inzira muri ibi byuma