2017 irasiga 92% by’u Rwanda bigejejwemo Internet ya 4G

Yanditswe na Uwishyaka Jean Louis
Kuya 8 Mutarama 2017 saa 08:44
Yasuwe :
0 0

Abacuruza internet yihuta ya 4G LTE batangaje ko bifuza kwagura ikoreshwa ryayo ku buryo umwaka wa 2017 uzarangira 92% by’igihugu byagejejwemo iri koranabuhanga.

Ibi byatangarijwe mu nama yahuje kompanyi ishinzwe gukwirakwiza internet ya 4G, Korea Telecom Rwanda Networks (KTRN) n’abayicuruza, bagamije kurebera hamwe ibyo bagezeho umwaka ushize n’uburyo bakomeza gutera intabwe.

Desire Ngabonziza, Umuyobozi muri KTRN, yavuze ko mu 2016 abiyandikishije bashaka gukoresha internet ya 4G biyongereyeho 200% ugereranyije n’umwaka washize (2015).

Ngabonziza yavuze ko ibikoresho binyuranye byakwirakwijwe hirya no hino mu 2016, bijyana no gufungura amashami mu turere turimo Musanze, Huye, Rusizi na Rubavu. Yavuze kandi ko bifuza kujyana ibikorwa byabo mu Ntara y’u Burasirazuba mu gihe cya vuba nkuko The New Times ibitangaza.

Ati “Ikibazo gikomeye dufite ni uko twibanze mu mijyi; mureke dukore ibishoboka byose twagurire ibikorwa byacu n’ahandi ku buryo nta mu fatabuguzi wacu uzakerenera serivisi zacu ngo arinde kuza i Kigali.”

Atangaza ko KTRN yashyizeho uburyo bwo kwagura ibikorwa byayo ihereye mu Mijyi yunganira Kigali.

KTRN kandi ifite intego yo gukorana byimbitse n’abafatanyabikorwa bayo mu rwego rwo gufasha abataragerwaho n’iyi internet yihuta kubageraho.

Charles Gahungu, Umuyobozi ushizwe ibya tekiniki muri KTRN, yagize ati “Mu myaka ishize twibanze cyane mu bice bituwe cyane kurusha ibindi, muri uyu mwaka tugiye gushyiramo ingufu ku buryo 92% izabageraho.”

Akomeza avuga ko intego ya mbere bafite muri uyu mwaka ari uko internet ya 4G igomba kugezwa ku biro byose by’imirenge, ibigo nderabizima, banki n’ahandi.

Umuyobozi mukuru wa KTRN, Han-Sung Yoon, yavuze ko bifashishije ibikorwa bageza ku banyarwanda, muri uyu mwaka abafatanyabikorwa babo bazabasha gutangiza ibikorwa byabo bwite bibateza imbere.

Ati “Uyu mwaka uzaba utandukanye n’ushize, urugero, umufatanyabikorwa wacu MTN yatangije uburyo bushya bwa MTN TV, igikorwa cyiza cyuzuzanya n’ibyo dukora.”

Internet ya 4G LTE yatangijwe mu Rwanda mu 2014, aho uwo mwaka 8% by’igihugu ari byo yagejejwemo, mu 2015 byarazamutse bigera kuri 17% mu gihe umwaka ushize byiyongereye bigera kuri 62%.

KTRN ivuga ko muri uyu mwaka abanyarwanda benshi bazaba bagerwaho na internet ya 4G

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza