Gukoresha Facebook byabaye ubuntu ku bakoresha internet ya Tigo

Yanditswe na Rabbi Malo Umucunguzi
Kuya 26 Mata 2017 saa 03:26
Yasuwe :
0 0

Ntibikiri ngombwa ko uba ufite amafaranga kuri sim card yawe ya Tigo ngo ubashe kumenyekanisha ibyo ukora, kuganira n’inshuti cyangwa kumenya aho Isi igeze wifashishije urubuga nkoranyambaga rwa Facebook.

Imbuga nkoranyambaga zimaze guhindukira bamwe uburyo bwo kumenyesha abandi ibyo bakora, umucuruzi agahanahana ibitekerezo n’abakiliya be nk’uko bigenda ku muntu uganira n’inshuti ze mu buzima bwa buri munsi.

Kuva saa sita z’ijoro kuri uyu wa 26 Mata 2017, ku bakoresha umurongo wa Tigo Rwanda bashaka gusura Facebook ni ubuntu. Ni gahunda itangijwe ku bufatanye n’uru rubuga rwatangiye kuwa 4 Gashyantare 2004, ubu rusurwa n’abarenga miliyari 1.86 mu kwezi.

Umuyobozi Ushinzwe ubucuruzi muri Tigo Rwanda, Yaw Ankoma Agyapong, yabwiye itangazamakuru ko intego yo gutangiza ubu buryo buzwi nka Facebook Flex ari ukurushaho gufasha Abanyarwanda gukoresha internet, bakanayibyaza amafaranga cyane cyane nko mu gukoresha Facebook.

Yagize ati “Ubu buryo bushya dutangije bwa Facebook Flex, burafasha abakiliya bacu kuri telefoni yaba abakoresha Android cyangwa IOS kuri Apple, upfa kuba uri gukoresha internet ya Tigo, uratangira gukoresha Facebook ku buntu.”

Uko bikorwa

Facebook Flex ntabwo ituma ubasha kureba amafoto abantu batandukanye bashyira ku nkuta zabo za Facebook, ariko iyo wandikirana n’umuntu bwo ubasha kumwoherereza ifoto, akayibona nawe akaba yagusubiza indi.

Bisaba kujya kuri internet ya telefoni yawe ukayifungura, nta mafaranga bigusaba cyangwa ngo ube warafashe ifatabuguzi rya internet, ahubwo ni ukuba Sim Card yawe ya Tigo iri gukoresha internet ya 2G cyangwa 3G, haba kuri ‘browser’ cyangwa Facebook App.

Didier Mutabazi ukora muri Tigo Rwanda yasobanuye ko iyo umaze gufungura facebook.com cyangwa Facebook App ku bayikoresha kuri Smart Phone, uhita ubona uburyo bubiri, niba ukoresha ubw’ubuntu cyangwa ubwo kwishyura ari nabwo butuma ubona amafoto, ugakanda gukomeza (continue).

Iyo ushatse kureba amafoto ukanda aho byanditse (See Photos) ukabona ubutumwa bugusaba kubihitamo, wabyemeza ukishyura internet nk’uko bisanzwe. Iyo ushaka kugaruka muri Facebook y’ubuntu ukanda aho byanditse (Go to free).”

Yakomeje agira ati “Facebook iraha amahirwe abakiliya bacu gukoresha Facebook igihe cyose, bashyiraho ibintu ku nkuta zabo za Facebook, bakunda ibyo abandi banditse, banatanga ibitekerezo ku byo inshuti zabo zikora kuri Facebook.”

Abashya n’abadaheruka kuri Facebook bahawe umwihariko

Yaw Agyapong yavuze ko umuntu ukoresha Tigo mu Rwanda ariko atarafunguza konti ya Facebook, ashobora kubikora agahabwa ukwezi kose ayikoresha ku buntu kandi areba amafoto n’amashusho ndetse akaba yabisangiza inshuti.

Yagize ati ”Uje kuri Facebook uzabasha kuyikoresha mu minsi 30 ya mbere ku buntu. Ugashyiraho amafoto, amashusho, gutanga ibitekerezo, nta mpungenge zo kwishyura internet.”

“Niba uri umuntu nanone ufite konti ya Facebook ukaba umaze nibura iminsi 30 utarayikoresha, ni ukuvuga mu kwezi gushize cyangwa kuzamura, ushobora kugaruka ukayikoresha ukwezi kose kandi ku buntu, ubundi ukaryoherwa n’ibyiza bya Facebook Flex.”

Ubu buryo busanzwe bukoreshwa ku mirongo ya Tigo Senegal na Tigo Chad, ntibukunda iyo umuntu atangiye gukoresha umunara wo mu kindi gihugu (roaming) cyangwa kuri kuri Sim Card ya Tigo ikoresha 4G.

Kugeza ubu mu Rwanda hari abakoresha internet kuri telefoni basaga miliyoni enye, ikaba ikoreshwa ku gipimo cya 36%, intego ikaba gukomeza kuzamura iyi mibare.

Umuyobozi Ushinzwe ubucuruzi muri Tigo Rwanda, Yaw Ankoma Agyapong
Umukozi muri Tigo Rwanda, Didier Mutabazi (ibumoso); Umuyobozi Ushinzwe ubucuruzi muri Tigo Rwanda, Yaw Ankoma Agyapong (ibumoso) n’Ushinzwe serivisi zidashingiye ku majwi muri Tigo Rwanda, Claude Kongolo
Ushinzwe itangazamakuru muri Tigo Rwanda, Sunny Ntayombya

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza