Horyou yateguye iserukiramuco ryo kuzamura imibereho ya Sosiyete

Yanditswe na Philbert Girinema
Kuya 12 Gicurasi 2015 saa 10:37
Yasuwe :
0 0

Mu gihe cy’iminsi 12, urubuga nkoranyambaga ruhuza abazamura imibereho ya Sosiyete rufite icyicaro i Geneve mu Busuwisi, Horyou, rwateguye gahunda yo kwizihiza ibyiza rwagezeho binyuze mu iserukiramuco ry’ubugeni, umuco n’ibindi bitandukanye.

Iri serukiramuco rikazanasuzumirwamo imishinga ihindura imibereho ya muntu n’ibimukikije.

Horyou (basoma ‘oyu’) ni urubuga nkoranyambaga rwashinzwe muri Mata umwaka wa 2012, ruhuza imiryango itegamiye kuri Leta, abantu ku giti cyabo n’abanyamuryango bahoraho.

Uru rubuga rwifashisha murandasi (Internet) mu guhindura ubuzima bwa sosiyete muri rusange, aho abarukoresha baganira ku mishinga itandukanye bafite, hanyuma imiryango imwe n’imwe ikaba yabafasha kuyitera inkunga z’amafaranga kugirango ibashe gukorwa.

Horyou ifata internet nk’igikoresha cyo guhuza abantu bagasangira ubunararibonye, inyungu rusange, guhuza umugambi ku kwamagana ikibazo runaka cyibasiriye abantu benshi, kuganira ku mishinga n’ibindi.

Horyou yateguye gahunda y’iminsi itanu aho abazitabira icyo gikorwa bazaganira ku bintu bitandukanye ndetse bakanahuriza hamwe ijwi mu rwego rwo kumvikanisha umuco wo guharanira ibyiza biteza imbere umuntu.

Iki gikorwa kizabera ahitwa Grand Hotel mu Bufaransa, kizitabirwa n’ibitangazamakuru, imiryango itegamiye kuri Leta; izahuriza hamwe imbaraga mu gutambutsa ubutumwa bwo gufashanya no kugirirana icyizere ; hifashishijwe amafilimi.

Mu minsi 12 kizamara, hateganijwemo iminsi itanu izatangirana n’itariki ya 17 Gicurasi izaganirirwamo ibikorwa binyuranye birimo kurinda no kubungabunga isi n’ibinyabuzima, uburezi kuri bose, kongerera abagore imbaraga, guhanga udushya tugamije iterambere no guhangana n’ibibazo by’imihindagurikire y’ibihe.

Hazanabaho umwanya wo kumurika imishinga n’ibikorwa bitandukanye bigamije guteza imbere imibereho ya muntu.

Buri gikorwa cyabaye, Horyou izajya igicisha ku mbuga zayo, zaba nkoranyambaga ndetse n’urubuga rwa Internet, Horyou TV, ibitangazamakuru bigera kuri mirongo itanu bitandukanye bizafatanya nayo ndetse n’abandi bafatanyabikorwa ku nzego zitandukanye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza