Ibikwiye kwitonderwa igihe umuntu agiye guhahira kuri internet

Yanditswe na Mukaneza M.Ange
Kuya 20 Werurwe 2017 saa 04:26
Yasuwe :
0 0

Nubwo guhahira kuri internet ari umuco wamaze kwimakazwa hirya no hino ku Isi, mu Rwanda ntibiritabirwa cyane kuko uretse kuba benshi batazi uko bikorwa, hari n’impungenge z’aho bakwiye kugarukira bizera imbuga zihahirwaho.

Mu Rwanda hagaragara imbuga nyinshi zitandukanye umuntu ashobora guhahiraho zirimo Jumia, Grocewheel, Murukali n’izindi nyinshi zivuka umunsi ku munsi.

Iyo witegereje izi mbuga zose ariko usanga kuzihahiraho bitagoye, kuko umuntu aba afite amahirwe yo kuba yabonana n’umucuruzi aguriye, akaba yamwishyura mu ntoki cyangwa akoresheje telefoni igendanwa.

Ibi bitandukanye cyane no guhahira ku zindi mbuga mpuzamahanga nka Alibaba na Amazon, kuko umuntu yishyura akoresheje ikarita ye ya banki, ndetse bikaba bitakorohera kumenya uwo ugiye guhahira koko, ari nayo mpamvu igihe ugiye kubikora ugomba kwitwararika.

Twifashishije imbuga zitandukanye zirimo CNET, twabakusanyirije bimwe mu byo umuntu akurikiza igihe agiye guhahira kuri internet ndetse n’ibyo akwiye kurushaho kwitondera.

Uko guhahira kuri internet bikorwa

Kimwe n’uko mu bisanzwe umuntu abanza kumenya aho ari bukure igicuruzwa yifuza kugura ndetse akenshi ugasanga arifuza kumenya ahari ibyiza kandi bidahenze, ni na ko bigenda igihe wifuza guhaha ukoresheje internet.

Igihe utazi urubuga ruriho icyo wifuza kugura, ushobora kwifashisha amashakiro yo kuri internet; urugero nka Google, ukandikamo izina ry’icyo wifuza kugura, iyo ari ikintu kizwi bakwereka imbuga nyinshi zitandukanye wagisangaho.

Nyuma yo kugera ku rubuga, soma amakuru atandukanye arebana na cya gicuruzwa arimo igiciro, igihe cyakorewe, aho cyakorewe, iduka giherereyemo niba ari gishya cyangwa cyarakoze n’ibindi bitandukanye.

Biba byiza kandi iyo usomye ibintu bitandukanye byagiye bivugwa n’abakiguze (reviews), kuko akenshi usangamo andi makuru menshi yerekeye igicuruzwa, umucuruzi aba atarashyizeho.

Nyuma yo gusoma amakuru arebana n’igicuruzwa, ureba ibijyanye n’uburyo bukoreshwa mu kwishyura, ikiguzi cyo kukugezaho ibyo waguze, iminsi bitwara, niba ushobora kugisubizayo, niba wishyura kikugezeho n’ibindi.

Iyo umaze kureba ibyo byose, ureba ku ruhande aho bakwereka niba ushobora kugura ako kanya (Buy Now), cyangwa ushyira mu gisa n’agatebo (Add to Cart), ibi ubikora igihe wifuza kugura ibicuruzwa byinshi bitandukanye.

Nyuma yo guhitamo uburyo bwo kugura, bahita bakujyana ku rupapuro rukurikiyeho, ugahitamo ibijyanye n’uburyo icyo ugiye kugura kizakugeraho.

Iyo ukomeje kuri paji ikurikiyeho, bakwereka ibijyanye no kwishyura, ahari uburyo bwinshi ushobora gukoresha ndetse bunagaraga mu Rwanda nka MasterCard, Visa Card, Paypal n’ubundi.

Bitewe n’uburyo ukoresha, bagusaba gushyiramo amakuru atandukanye ndetse n’umubare w’amafaranga wifuza kwishyura. Hari ubwo wohererezwa na banki yawe, ijambo ry’ibanga wifashisha wemeza ubwishyu.

Imibare itandukanye iba ku ikarita yawe ya ATM, by’umwihariko itatu igaragara inyuma n’imwe mu by’ingenzi bikenewe ngo ubashe guhaha, bityo ukaba ukwiye kwitwararika ntugire uwo uyereka.

Nyuma yo kuzuza ibisabwa, bahita baguha ubutumwa bukubwira ko wamaze gutumiza icyo wifuza kugura.

Imbuga zitandukanye urugero nka Amazon usanga zigusaba kubanza kwiyandikisha, kugira ngo ubashe kugira ikintu ugura.

Bimwe mu byo ukwiye kwitaho

Uko ikoranabuhanga rigenda ritera imbere, ni ko n’abatari bake bagenda biga amayeri bakoresha kugira ngo bacucure abantu.

Niyo mpamvu iyo bigeze mu guhaha umuntu akoresheje internet, hakwiye kubaho kwitwararika dore ko akenshi uba watanze amakuru arebana na konti yawe ya banki. Ikindi ushobora kwishyura ugategereza ko igicuruzwa kikugeraho ugaheba.

Mbere yo kugira icyo ugura, banza urebe niba urubuga rwa internet ugiye kwifashisha rufite umutekano uhagije, ibi ubibwirwa n’akamenyetso k’ingufuri ifunze, kaba kari imbere y’ahajya izina ry’urubuga.

Mu gihe wamaze gushima igicuruzwa, ni byiza ko ubanza kureba uwagishyizeho, imyirondoro, nimero ya telefoni n’aho akorera.

Irinde kandi gutanga amakuru atari ngombwa nk’itariki y’amavuko na nimero y’ubwishingizi, kuko byorohera ubujura mu by’ikoranabuhanga kuba bakwiba umwirondoro wawe.

Ntukishyure utabanje gusoma ibijyanye no kuba wasubizayo igicuruzwa, igihe usanze cyarangiritse cyangwa se atari cyo wishyuye.

Mu gihe ugiye guhahira kuri internet kandi irinde gukoresha umuyoboro (network), cyangwa mudasobwa bihurirwaho n’abantu benshi, kuko nabyo byorohera abajura mu by’ikoranabuhanga kuba bakwiba amakuru akwerekeyeho.

Abantu barimo bahahira kuri internet(Ifoto yakuwe kuri internet)

[email protected]


Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza