Hatashywe ibikorwaremezo bizoroshya itumanaho, amakuru atabanje gusohoka mu gihugu

Yanditswe na Kanamugire Emmanuel
Kuya 8 Ugushyingo 2016 saa 04:23
Yasuwe : XX
0

Mu rwego rwo kurushaho koroshya itumanaho rikorerwa kuri Internet, Leta y’u Rwanda yashyizeho ibikorwaremezo bizafasha guhererekanya amakuru ku bakoresha imirongo itandukanye bitabaye ngombwa ko asohoka mu gihugu.

Ibi bikorwaremezo bizwi nka Rwanda Internet Exchange point (RINEX), byashyizweho ku bufatanye n’Umuryango w’Ubumwe bw’Afurika byatashywe kuri uyu wa 8 Ugushyingo 2016.

Umuyobozi w’ikigo cy’igihugu gishinzwe guteza imbere ikoranabuhanga rishingiye kuri Internet (RICTA), Ghislain Nkeramugaba yavuze ko ubusanzwe iyo umuntu yajyaga koherereza mugenzi we bakoresha Internet y’imirongo y’itumanaho itandukanye, byasabaga ko abanza kunyura hanze y’igihugu kugira ngo abashe kumugeraho.

Ati” RINEX ihari kugira ngo ayo makuru atambuke mu buryo bwihuse. Iramutse idahari ntibivuze y’uko tutahana amakuru mu Rwanda ariko byahenda, uburyo abantu babona serivisi byari mu buryo butinze kandi butari bwiza ku mufatabuguzi wa nyuma.”

Minisitiri w’Ikoranabuhanga n’Urubyiruko, Jean Philbert Nsengimana yavuze ko iyo abantu bahanahana amakuru agaca kure cyangwa hanze y’igihugu bigira ingaruka ku mafaranga yishyurwa.

Ati” Uyu munsi kugira ngo wohereze Mbps (megabyte/isegonda) imwe hanze, iyo ufashe umurongo ufite ubugari bwa Mbps tuwugura amadorali 100. Twahoze tubaza, batuwbwiye ko iriya RINEX ifite umurongo wagutse ukubye iyo megabyte inshuro 1500.”

Yakomeje avuga ko iyi RINEX iramutse idahari, buri kwezi hajya hishyurwa amadorali arenga ibihumbi 150, mu gihe ayaguze ibyuma bizifashishwa ari amadorali ibihumbi 180.

Ati” Navuga ko harimo n’umutekano kuko burya iyo amakuru aciye ahandi, ntumenya aho aciye icyo bayakorera. Bashobora kuyabika, n’ubwo waba washyizemo urufunguzo narwo bakarukwiba bakabifungura bakakumenyera amakuru.”

Umuyobozi ushinzwe ibikorwaremezo n’ingufu muri AU, Dr Elham Ibrahim yavuze ko ibihugu 32 bya Afurika aribyo bimaze kugira ibikorwaremezo bituma amakuru ahererekanwa bitabaye ngombwa ko ava mu gihugu.

Ibrahim yavuze ko iyi RINEX izagabanya umwanya byatwaraga kugira ngo ube wakora ikintu runaka kuri Internet, bityo bikihutisha itangwa serivisi mu mabanki n’ibigo bitandukanye ndetse n’umutekano udasigaye.

RINEX yatangiye gukora mu 2004; icyo gihe yari ihuriweho n’ibigo bicuruza Internet bigera kuri bibiri, nyuma yo kugenda byiyongera ubu ifite n’ubushobozi bwo guhuza imirongo y’itumanaho mu bihugu bya Afurika y’iburasirazuba.

Umuyobozi wa Ricta, Ghislain Nkeramugaba n'Umuyobozi ushinzwe ibikorwaremezo n'ingufu muri AU, Dr Elham Ibrahim

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza