KtRN yashoye miliyoni 10 z’amadorali mu kuvugurura umuyoboro wa 4G

Yanditswe na Habimana James
Kuya 2 Ukuboza 2019 saa 06:58
Yasuwe :
0 0

Ikigo gisakaza umuyoboro wa 4G mu Rwanda, KT Rwanda Networks (KtRN) cyashoye miliyoni 10 z’amadorali ya Amerika muri gahunda yo kongera ingufu internet ya 4G no kurushaho gutanga serivisi nziza ku bayikoresha.

Mu gihe ibyifuzo by’abakiliya byiyongera, abakoresha internet ya 4G bahuye n’ibibazo bitandukanye by’uburyo igendamo byatumye biba ngombwa ko harebwa uko yahabwa ingufu ku bayikoresha.

KtRN ko yashoye izo mbaraga mu kuvugurura uyu muyoboro mu Mujyi wa Kigali n’indi mijyi itandatu yunganira uwa Kigali irimo Musanze, Huye, Muhanga, Nyagatare, Rusizi na Rubavu.

Iki kigo kivuga ko “Muri iyi minsi, ibyifuzo by’abakiliya byariyongereye, abakoresha internet ya 4G bagenda bagaragaza ikibazo cy’uyu muyoboro, ibi bituma hatekerezwa uko wahabwa ingufu hagamijwe kuzuza ibyifuzo by’abayikoresha mu gihugu.”

Iyi gahunda yateguwe mu byiciro bibiri, birimo icyo kuvugurura uburyo bw’itumanaho n’icyo guha ingufu umuyoboro ya LTE+ muri Kigali n’imijyi iyunganira. Biteganyijwe ko izatangira ku wa 15 Ukuboza 2019 igasozwa muri Werurwe 2020.

Muri Mutarama uyu mwaka, KtRN ku bufatanye n’abafatanyabikorwa bayo, yashyizeho amapaki adasanzwe ya 4G agenewe abakoresha telefoni zigezweho za ‘smartphones’ mu gihugu, intego ikaba yari ukuyibagezaho mu buryo buhendutse.

Iki kigo kivuga ko abagenerwabikorwa mu minsi mike batangira kugerwaho na internet ya 4G yihuta kandi ihendutsemu ntego yayo yo kugeza umuyoboro mugari wa internet kuri bose.

Umuyobozi Mukuru wa KtRN, Daeheak AN, yagize ati “Dukomeje guharanira kunoza ubwiza bwa internet ya (4G LTE+) kandi ku giciro gihendutse. Ibi ni byo bizatuma iterambere ry’ikoranabuhanga ryiyongera mu buzima bw’abaturage b’igihugu cyacu, hanaboneke amahirwe mu bucuruzi buto bugitangira, bijyanye n’icyerekezo cyacu.”

Internet yihuta (Broadband) muri smartphones yagaragaje ko iri mu mwanya mwiza wo kwihutisha guhanga udushya mu ikoranabuhanga no gufasha abatangira imishinga mu Rwanda.

Mu Rwanda 4G yatangijwe mu 2014, ubu 95% by’igihugu bigerwaho n’umuyoboro wa murandasi yihuta mu gihe mu gihugu hose hagera 4G.

Umuyobozi Mukuru wa KtRN, Daeheak AN, yavuze ko ikigo kizakomeza guharanira kunoza ubwiza bwa internet ya (4G LTE+) ku giciro gito

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza