Neza Nice Fabrice yavuye imuzi ubujura bw’ikoranabuhanga no kumviriza abantu kuri telefoni

Yanditswe na Umwali Zhuri
Kuya 1 Gicurasi 2017 saa 01:51
Yasuwe :
3 0

Abakunze kumva radiyo Salus kuva mu myaka yayo ya mbere ubwo yasaga n’iyigaruriye imitima y’Abanyarwanda biganjemo abajijutse n’abandi bashaka kumenya ibijyanye n’ikoranabuhanga, bazi cyane izina Neza Nice Fabrice nk’umwe mu bakoraga ikiganiro Salus Quiz.

Uyu musore ni umwe mu batangiranye na Radio Salus mu minsi ya mbere aho yari ashinzwe ibijyanye na tekiniki yayo ariko yanyuzagamo akava ku buhanga bw’ibyuma agakora ibiganiro byungura ubumenyi abakurikiraga iyi radiyo abasobanurira ibintu bitandukanye bijyanye n’ikoranabuhanga.

Ni umwe mu bantu bigaruriye imitima ya benshi ndetse abakoranye nawe kuri iyi radiyo bakunda gukomoza ku buhanga bwe mu bijyanye n’ikoranabuhanga ku buryo hambere aha hari abajyaga batebya bakavuga ko yari afite ikoranabuhanga ryamubashishaga kuba yazimya ibyuma by’iyi radiyo kandi we yibereye i Nyabugogo muri Gare ari mu nzira ajya i Ruhande.

Ubu ntabwo agikora kuri Radio Salus ariko ni umuntu wakurikiranye cyane ibijyanye n’ikoranabuhanga mu masomo ye ahanini ajyanye n’ubwirinzi bwo kuri internet (network security).

Kimwe mu bibazo bijyanye n’ikoranabuhanga gikomeje gushyushya imitwe y’abakomeye n’aboroheje muri iki gihe ni ikijyanye n’abajura bifashisha ikoranabuhanga, abazwi nk’aba ‘hackers’. Ibiheruka hano mu Rwanda ni ibijyanye n’abajura b’ikoranabuhanga bayobeje amafaranga leta yari yoherereje abanyeshuri biga muri Kaminuza muri Nigeria ntiyabageraho ahubwo benengango bo kuri internet bakayatera imirwi.

Mu kiganiro na Flash TV, Neza yavuye imuzi uko abajura mu ikoranabuhanga biba abantu yaba binyuze kuri internet, anakomoza ku bijyanye n’ibijya bivugwa ko telefoni z’abantu zumvirizwa n’uburyo bikorwa.

Neza yavuze ko kugira ngo umuntu yibwe amafaranga kuri banki n’abajura bakoresheje ikoranabuhanga ahanini usanga nawe aba yarabigizemo uruhare atabizi nk’aho abafasha kubona amakuru yose amwerekeyeho ku buryo agera igihe cyo kujya gukura cyangwa kohereza amafaranga kuri konti nabo babibonye, yakohereza bakayayobya ataragera aho agiye.

Atanga urugero rw’uburyo abantu muri iki gihe bifashisha imbuga nkoranyambaga bagashyira ahagaragara amakuru aberekeyeho, aho bakora, umubare w’abana, itariki z’amavuko n’ibindi. Ngo ibi ni bimwe mubyo abajura bifashishije ikoranabuhanga baheraho mu gihe bashaka kwiba umuntu.

Ati “Umunsi ukurikiyeho nkaba ngiye kuri Instagram nshyizeho amafoto y’abana banjye n’itariki bavukiyeho. Akenshi ijambo ry’ibanga (Password) abantu bakoresha ni itariki y’ubukwe, itariki abana bavukiyeho, amazina y’abana… ako nako [umujura: hacker] akakabika. Ku buryo amakuru menshi y’ibanze nitwe tuyatanga.”

Neza akomeza asobanura ko muri ubu buryo umujura mu ikoranabuhanga akoresha amenya amakuru agendanye n’uwo ashaka kwiba, ‘ashobora kumenya icyo nkunda, akaba aricyo kintu ampa’.

Aha yatanze urugero ku byigeze kuba kuri televiziyo y’Abafaransa, TV5, ubwo mu 2015 yinjirirwaga n’abajura bo mu bihugu by’Abarabu.

Yagize ati “ Batangiye gushyiraho ibiganiro kandi badahari. Uko byagenze ni uko hari umunyamakuru wakurikiranaga inkuru z’ibintu byaberaga mu bihugu by’Abarabu, umuntu amwandikira amubwira ko amufitiye inkuru ishyushye […] amwoherereza inyandiko kuri skype amubwira ngo ‘fungura amafoto ari aha ngaha’ ariko uwo muntu yari yashyizemo porogaramu zituma ahita yinjira mu ikoranabuhanga rya Televiziyo agahita ayigenzura byose.”

“Mbere y’uko umu-hacker yinjira, ikintu cya mbere abanza gukora ni ugushaka amakuru iyo amaze kuyabona [...], reka duhere ku ijambo ry’ibanga [password]. Aba afite amagambo y’ibanga menshi yabonye noneho akaza kuyagerageza.”

Neza Nice Fabrice ni umwe mu bazobereye ibijyanye n’ubwirinzi bwo kuri internet

WhatApp yaba yizewe?

Neza yasobanuye ko iyo umuntu afashe telefoni ye igezweho (Smartphone) irimo porogaramu ya WhatsApp akoherereza mugenzi we ubutumwa, bugenda bukagera ku bubiko (server) y’uru rubuga (WhatsApp) aho ziri hose mu bihugu bitandukanye nko mu Bwongereza, muri Leta Zunze Ubumwe za Amerika n’ahandi.

Yakomeje agira ati “ Iyo igezeyo ijya kureba wa muntu wandikiye, ikayimwoherereza. Iyo wohereje WhatsApp yawe hakagenda agakoni kamwe, ubwo ubutumwa buba bugeze mu bubiko bwa WhatsApp, hagenda agakoni ka kabiri iba ikubwiye ngo nyihaye wa muntu, yayireba tukaba ubururu.”

“ Bo bavuga ko iyo amaze kuyireba bayisiba iwabo, ariko ntawe ubizi. Igihe ikihagera (message) bashobora kuyifata (copy) bakayibika. Birumvikana ko nubwo ubu WhatsApp ivuga ko yakoze uburyo bwo guha umutekano ubutumwa kuva kuri wowe kugera kuri njyewe, ivuga ko yabikoze kugira ngo Amerika itinjira muri telefoni z’abantu ariko n’ubundi iragenda ikajya mu bubiko bwabo.”

Yatanze urugero rw’umuntu woherereje ikintu mugenzi we kiri mu gikarito, undi akajya kugikura muri cya gikarito kandi bombi atari icyabo. Ati “ Ny’iri gikarito ashobora kuba munsi afitemo umwobo areberamo ikirimo. Ibyo byumvikane ko biroroshye kuba ba nyiri WhatsApp bashobora kubireba. Ni kimwe na Facebook”.

Neza Nice Fabrice yagiriye inama abakoresha imbuga za internet ko bakwiye kwitondera ibyo bashyizeho kuko ibintu byagezeho bitajya bihava kabone nubwo wabisiba ute.

Ku bijyanye n’ubutumwa busanzwe bwoherezwa kuri telefoni , Neza yasobanuye ko ho umuntu yavuga ko umutekano wabwo wizewe kurusha ibyo kuri internet. Ati “ Ho byibura niyo hagira n’umuntu utanga ubwo butumwa, ni Umunyarwanda uri hano ku bubiko bwabo (MTN, Tigo , Airtel) buri hano mu Rwanda naho ibindi bijya kuri internet ntibishoboka.”

Uko kumviriza amatelefoni bikorwa

Mu minsi ishize Donald Trump usigaye ayobora Amerika yavuze ko ubwo yari mu bikorwa byo kwiyamamaza, Obama wari Perezida icyo gihe yategetse ko telefoni y’uyu mugabo yumvirizwa.

Neza asobanura ko kumviriza telefoni birimo uburyo bwinshi ndetse hari n’ubugenwa n’amategeko nk’aho iyo inzego z’umutekano cyangwa Guverinoma ikeneye kumva ibyo umuntu runaka avuga kuri telefoni, ifite uburenganzira bwo kujya mu kigo cy’itumanaho ikakibwira ko nimero y’umuntu runaka uvugana na mugenzi we kanaka kibabwira ibyo baba bavugana.

Ati “ Kuko amajwi yacu ariho anyura, barabikora n’amajwi rwose bakaba bayatanga.”

Uburyo bundi bukoreshwa mu kumviriza telefoni, ngo bwo bukoreshwa n’abajura (hacker) ahanini bitewe n’ubwoko bwa telefoni umuntu atunze.

Ati “Telefoni yawe ya Android ufite, porogaramu zose zirimo umuntu wese ufite ubushobozi ashobora kuyumva kubera ko na porogaramu ukoresha uvuga uyisibye ntiwabasha guhamagara”

“Bivuze ngo iyo uri guhamagara, uba uri guhamagara ukoresheje iyo telefoni yawe, iyo ukupye ugasubira gukoresha internet […] niba hari umujura (hacker) winjiye muri telefoni yawe ukavuga hari porogaramu yashyizemo ifata ibyo uvuga ugakupa ugasubira ku gukoresha internet ihita ibimwoherereza kuko abantu benshi tuba dufite internet.”

Ku bantu bafite telefoni zitarimo internet, Neza avuga ko kugira ngo bumvirizwe ho bisaba ko umujura yinjirira ikoranabuhanga ry’ikigo cy’itumanaho uwo muntu akoresha, naho ikindi gishobora ngo byasaba ikoranabuhanga ryo ku rwego rwo hejuru rinatwara umurengera ryifashisha satellites kuko ‘ziba zifite ubushobozi bwo kureba kuri metero imwe cyangwa ebyiri z’umuntu bashaka’.

Mu nama atanga, yavuze ko hakwiye ubukangurambanga abantu bakamenya ko ibyo bashyira ku mbuga nkoranyamabanga rimwe na rimwe bitanga amakuru atari ngombwa yatuma abajura biba.

Yakomeje avuga ko nk’uko hari abasirikare bashinzwe umutekano ku mipaka, hakwiye n’ubwirinzi bukomeye hagatozwa abantu b’abahanga bazobereye mu ikoranabuhanga bashobora kuba baburizamo ibitero nk’ibi by’ikoranabuhanga.

Ku batunze telefoni, ngo nibura rimwe mu kwezi bakwiye kujya bazisubiza uko baziguze (factory reset) ku buryo niba hari ikintu cyagiyemo batazi bagisiba bakongera bagasubizamo za porogaramu zarimo nyuma.

Neza Nice Fabrice mu kiganiro n’Umunyamakuru wa Flash TV, Karangwa Vital

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza