U Burusiya: Abakoresha internet mu ihurizo nyuma y’itegeko rishya

Yanditswe na Mfitumukiza Moïse
Kuya 30 Ukwakira 2017 saa 08:57
Yasuwe :
0 0

Abakoresha internet mu Burusiya bahanagayikishijwe n’Itegeko rishya riha Leta uburenganzira bwo kugenzura ibyo abaturage b’iki gihugu bakorera kuri internet, hagamijwe kurwanya ibikorwa bibangamira umutekano w’igihugu.

Abacuruza internet z’ibanga (VPNs), basabwe gufunga imbuga zashyirwa ku rutonde rw’izitemewe muri iki gihugu.

VPNs zifasha umuntu kuba yasura imbuga zitemewe mu gihugu runaka aho zihindura aho uherereye, ukagaragara nk’uri mu kindi gihugu.

Umuyobozi mu kigo cyo muri Amerika, Electronic Frontier Foundation, Eva Galperin yabwiye AFP ko iri tegeko rigamije guca intege abanyamakuru n’abatavuga rumwe na leta.

Muri uku kwezi, urubuga nkoranyambaga rwa Telegram rwafatiwe ibihano n’ikigo Roskomnadzor kigenzura iby’itumanaho n’ihererekanyamakuru, aho rushinjwa kuba rutaribaruje muri iki kigo ndetse no kuba rudaha inzego z’ubutasi amakuru yerekeranye n’ibyo abarukoresha baganira.

Biteganyijwe ko guhera mu mwaka utaha wa 2018, imbuga zose zizaba zibaruwe muri Roskomnadzor zigomba kujya zibika amakuru y’Abarusiya imbere mu gihugu.

Mu Cyumweru gishize abadepite bemeje umushinga w’Itegeko riha uburenganzira Intumwa Nkuru ya Leta bwo kugaragaza imbuga za internet zitemewe.
Harold Li, umuyobozi wungirije wa sosiyete ExpressVPN International yavuze ko yizeye ko abacuruza VPN muri iki gihugu batazubahiriza aya mategeko, bitewe n’uko abangamira uburenganzira bwa muntu.

Yagize ati “VPN zikoreshwa mu kubika amabanga y’abazikoresha, no guha abantu uburenganzira bwo kuvuga. Aya mabwiriza ni igitero kigabwe ku burenganzira bw’abakoresha internet.”

Sosiyete nka Zenmate na Private Internet Access zisanzwe zifasha mu gukoresha VPN, zatangaje ko zitazafunga imbuga Leta izaba yagaragaje nk’izitemewe.

Itegeko rigenzura ibyo abantu bakorera kuri internet ryatekerejweho nyuma y’imyigaragambyo ikomeye yabaye hagati ya 2011 na 2012 yamagana intsinzi ya Perezida Putin aho yashinjwaga n’abo batavuga rumwe kwiba amajwi.

Inkubiri yo gushyira mu bikorwa iri tegeko ije mu gihe iki gihugu cyitegura amatora y’Umukuru w’Igihugu muri Werurwe umwaka utaha, ashobora kugumisha Perezida Vladimir Putin ku buyobozi kugeza mu mwaka wa 2024.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza