Umunyeshuri muri IPRC Kigali yahanze uburyo bwo gukoresha WhatsApp mu guhamagara nimero zisanzwe

Yanditswe na Rabbi Malo Umucunguzi
Kuya 27 Nzeri 2017 saa 10:59
Yasuwe :
9 3

Mugenzi Deodate wiga mu mwaka wa Gatatu muri IPRC Kigali, amaze gukora byinshi mu ikoranabuhanga rigezweho, aho yanagerageje uburyo yifashishije WhatsApp ashobora guhamagara indi nimero isanzwe, agakoresha internet ya telefoni aho kuba amafaranga.

Mugenzi w’imyaka 25 ni umusore wabashije kwihangira imirimo ayihangira n’abandi bagenzi be bigana n’abo mu yandi mashuri bagera kuri 32, bafatanya mu mirimo akora yaba gushyira internet mu nyubako, kubaka imbuga za internet, serivisi za camera n’ibindi.

Mu kiganiro na IGIHE, yavuze ko uburyo bwo gukoresha WhatsApp ahamagara telefoni zisanzwe zitajyamo WhatsApp buzafasha benshi cyane abahamagara mu mahanga, nubwo ari umushinga atarashyira hanze.

Yagize ati “Nari mfite umuntu wabaga muri Amerika afite mama uba mu Mutara, akampamagara kuri WhatsApp ngo nzajye kumumurebera mutize telefoni bavugane. Noneho nza kureba kujya mu Mutara buri munsi, nza kureba ukuntu nakora nkahuza uriya muntu uri muri Amerika akoresha WhatsApp adakoresha ama-unite asanzwe, akabasha kuvugana na mama we utagira WhatsApp.”

Yakomeje agira ati “Naje kubikora, ubu mama we afite telefoni isanzwe itari smartphone, amuhamagara akoresheje WhatsApp bakabasha kuvugana nta mafaranga bitwaye.”

Buruse yamubereye ishoramari

Mugenzi avuga ko yagiye yitegereza cyane imbuga nkoranyambaga nka Facebook na Skype akibaza cyane uburyo ubutumwa umuntu yandika bugenda, agakunda kujya mu isomero rya Ambasade ya Amerika ngo akoreshe internet uko bishoboka, kuko nta mafaranga yagiraga yo kuyibonera.

Niho yanabonye ibitabo bishobora kumufasha ku ngingo zose afiteho amatsiko, mu mashuri yisumbuye akaba yarigaga imibare, ubugenge n’ubumenyi mu bya mudasobwa (MPCs).

Arangije amashuri yisumbuye, yinjiye kaminuza ariko amafaranga ya buruse abanza gutinda, baza kuyamuha ari amezi atatu ahita abasha kugura mudasobwa.

Yagize ati “Nahise ntekereza ayo 75000Frw icyo nayamaza kandi nkeneye mudasobwa, mpita nyigura nubwo nta bushobozi bundi yari ifite.”

Ubushobozi bwe yabugerageje ubwo hatorwaga Miss Rwanda ikamba rikegukanwa na Akiwacu Colombe, aho ngo yamukoreye uburyo bwo kumwamamaza ku ikoranabuhanga, ndetse akomeza gukoresha imbaraga mu ikoranabuhanga yaba iry’ibikoresho bisanzwe n’irya Porogaramu.

Ibyo kandi ngo byajyanye n’uko yifashishaga ikigo Klab gifasha ba rwiyemezamirimo bato mu ikoranabuhanga, ibintu byamutwaye imbaraga mu gihe atari afite ubushobozi bwo gukora ingendo uko abishoboye.

Yakomeje agira ati “Naremeraga nkava Kicukiro n’amaguru nkagera Kacyiru nkaza kugaruka nagiye kumva ibiganiro byabatumirwa babaga baje Klab.”

Amaze gukunda ikoranabuhanga nibwo yaje kwinjira cyane mu bijyanye no gushyira internet mu nzu, kubaka imbuga za internet, ariko aza gusanga ibyiza ari uko yagira abantu bakorana bakazajya bagirana inama bagahanga udushya.

Yakomeje agira ati “Magingo aya tugera muri 32, duhura na byinshi mu kazi bitwereka ko mu Rwanda akazi gahari mu ikoranabuhanga kandi urubyiruko rwumva ko ibyo bize nta kamaro kandi ko ntacyo bazi ariko baba babizi ahubwo icyo babura ni ukwigirira icyizere kuko amasomo ni amwe.”

Avuga ko ubu agerageza guhuza amasomo n’akazi, ku buryo yubatse imikorere ituma abasha gukorera umukiliya ibyo yamusabye bitabaye ngombwa ko ava aho ari.

Avuga ko amaze gutanga serivisi z’ikoranabuhanga nko mu nyubako ya Pro-Femmes/Twese hamwe i Gahanga, ndetse akaba akomeje gutanga umusanzu mu kubaka igihugu afasha abana bato b’imyaka umunani mu kubakundisha gukora porogaramu zitandukanye, no kubaka imbuga za internet.

Avuga ko urubyiruko rukwiye kwitinyuka rukagerageza ibyo rutekereza rugendeye ku biriho nka telefoni zigezweho na mudasobwa, yitangaho urugero ko amaze kugira ubumenyi bumufasha nko gushyira mu nyubako yaba ari internet cyangwa camera za CCTV, kandi rugashakira amahirwe no mu bindi bice by’igihugu kuko imibereho itari muri Kigali gusa.

Mugenzi ari gutanga amahugurwa y'ikoranabuhanga yateguwe na Minisiteri y'Ikoranabuhanga. Aha yahuguraga urubyiruko rusaga 500
Mugenzi ni umunyeshuri mu mwaka wa gatatu muri IPRC Kigali. Arateganya kumurika ku mugaragaro uburyo bwo guhamagara nimero isanzwe ukoresheje WhatsApp

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza