Yahoo yahinduye izina, umuyobozi wayo mukuru aregura

Yanditswe na Mukaneza M.Ange
Kuya 12 Mutarama 2017 saa 11:40
Yasuwe : XX
0

Nyuma y’aho Ikigo cy’Abanyamerika gikora ibijyanye n’ikoranabuhanga n’itumanaho, Verizon Communication, Inc gitangarije ko giteganya kugura byinshi mu bikorwa bya Yahoo, yatangaje ko igice cyayo kizahindura izina kikitwa ‘Altaba’.

Muri Nyakanga 2016 nibwo Verizon yatangaje umugambi wayo wo kugura Yahoo kuri miliyari 4.83 z’amadorali; akaba yari make ugereranyije na miliyari 44.6 z’amadorali Microsoft yashakaga gutanga mu 2008 ariko ba nyirayo bakayanga.

Nyuma ariko byaje kuvugwa ko Verizon ishobora kwisubiraho, kubera amakuru yavuzwe mu Ukuboza 2016 ko Yahoo yongeye kwinjirirwa mu mabanga.

Ubuyobozi bwa Yahoo buvuga ko amasezerano na Verizon naramuka ashyizwe mu bikorwa, igice kizasigara kigizwe na 15% bya Alibaba na 35.5% bya Yahoo Japan kizahindura izina kigatangira kwitwa ‘Altaba’, iyi ikazaba ari sosiyete yibanda ku gukora ishoramari gusa.

TechCrunch ivuga ko iri zina rishya rya ‘Altaba’ rifitanye isano na Altavista yakoreshwaga mu gushakisha ibintu kuri internet mu myaka ya 1990 n’urubuga rwa Alibaba rukora ubucuruzi.

Si uguhindura izina gusa bizabaho, kuko n’umubare w’abagize inama y’ubutegetsi uzagabanuka, aho mu bamaze kugaragaza ko bifuza kwegura harimo Marissa Meyer wari Umuyobozi Mukuru na David Filo uri mu bashinze Yahoo n’abandi bane.

Yahoo yari ikomeye kuva mu 1994 ubwo yashingwaga n’abanyeshuri bari barangije mu Ishami ry’amashanyarazi muri Kaminuza ya Stanford, Jerry Yang na David Filo, yagiye igwa mu bihombo bikomeye aho nko mu gihembwe cya mbere cya 2016 yahombye miliyoni 440 z’amadorali.

Ni mu gihe iyi sosiyete yigeze kugira agaciro ka miliyari zisaga 100 z’amadorali, mu 2015 yari yagize igihombo cya miliyari 4.4 z’amadorali.

Umuyobozi Mukuru wa Yahoo, Marissa Meyer yeguye ku mirimo ye mu gihe Sosiyete yari ahagarariye igiye guhindura izina ikitwa Altaba

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE