Yeyote, indi ntambwe mu gucuruza muzika nyarwanda ku ruhando mpuzamahanga

Yanditswe na Umwali Zhuri
Kuya 3 Gicurasi 2017 saa 03:41
Yasuwe :
0 0

Muzika nyarwanda imaze iminsi iri mu ndorerwamo z’abashaka impinduka kugira ngo itangire ibe ifunguro rihoraho ku bayikora aho kuba ingirakamaro mu magambo, niyo mpamvu mu minsi ishize byatangajwe ko umuntu wese ucuranga mu ruhame indirimbo z’Abanyarwanda agiye kuzajya azishyura.

Ikoranabuhanga muri iki gihe rimaze gufata indi ntera ndetse abahanzi basigaye baryifashisha nk’uburyo bwo kwinjiza agatubutse. Ibi bizwi neza na Jay Z uherutse gushora miliyoni z’amadolari 56.2 muri Tidal akayigura n’abanya- Suède hanyuma agahamo abahanzi batandukanye barimo Rihanna, Kanye West, Usher n’abandi imigabane ingana na 3%.

Kuri uru rubuga ubu hamaze kugeraho indirimbo miliyoni 46 na video 192,000. Indirimbo nyinshi z’abahanzi bakomeye, za album nshya,… zigera kuri Tidal mbere y’uko zijya ahandi tumenyereye nko kuri YouTube na iTunes. Ingero ziheruka ni nka Album ya Usher yise Hard II Love cyangwa Anti ya Rihanna cyangwa se indirimbo ya Tiwa Savage na Wizkid bo muri Nigeria aho iyo bise ‘Bad’ yamaze iminsi itatu kuri Tidal abiyandikishije kuri uru rubuga aribo bayibona mbere y’uko igera ku bandi.

Ibi nibyo bigiye kuzajya biba ku ndirimbo z’abanyarwanda ku buryo zigera ku ruhando mpuzamahanga mu buryo bugezweho ndetse ba nyirazo bakabona amafaranga. Urugero nko kuri Tidal, kugira ngo umuntu abashe kureba indirimbo cyangwa kuyumva, bimusaba kwiyandikisha akishyura amadolari ya Amerika 9.99 akayumva mu buryo busanzwe cyangwa se akishyura $19.99 akayumva ifite umwimerere wo ku rwego rwo hejuru ibizwi nka HiFi (quality high fidelity).

Aya ntabwo ari amafaranga ajya mu mufuka wa Jay Z cyangwa se abandi bafite imbuga nk’izi ahubwo aragaruka akajya kuri konti y’umuhanzi yibereye mu bushyuhe bw’amashuka, muri make atabizi.

‘Yeyote’ mu ishusho yo kwitwa iTunes nyarwanda

Mu 2015 nibwo abasore babiri b’Abanyarwanda baba muri Leta Zunze Ubumwe za Amerika, bashyize ahagaragara porogaramu yo muri telefoni ngendanwa ifasha abahanzi ba muzika kumenyekanisha ibihangano byabo igafasha n’abakunzi babo kubibona mu buryo bworoshye.

Niba ufite smartphone ikoresha android cyangwa iOS washakisha iyo porogramu kuri Google Play cyangwa Apple store ukayibona ku buntu ukayishyira muri telefoni yawe ubundi ukiyandikisha ugatangira kuryoherwa n’uruvange rwa muzika nyarwanda y’ubwoko bwose.

Kuva iyi porogaramu yashyirwa ahagaragara, abahanzi barenga 400 b’Abanyarwanda basinyanye amasezerano na Yeyote Music Ltd, ikompanyi iyigenzura iyi porogaramu. Maginga aya, iyi porogaramu imaze gutungwa muri telefoni zikoresha android zisaga ibihumbi bitanu.

Abashinze uru rubuga batangaza ko mu ntangiriro za Kamena uyu mwaka, bazatangira icyiciro cya kabiri cyo kugeza iyi porogaramu ku rundi rwego.

Yeyote igaragaraho indirimbo z'Abanyarwanda gusa

Mu kiganiro IGIHE yagiranye n’ushinzwe ubucuruzi n’itangazamakuru muri Yeyote Music Ltd, Vainqueur Niyotwagira, yavuze ko iki cyiciro gikubiyemo kuvugurura ndetse no kunoza serivisi iyi porogaramu itanga ku buryo ihura n’ibyifuzo by’abayikoresha.

Ati “ Mu ntangiriro za Kamena, Yeyote izinjira mu cyiciro cya kabiri cyo gahunda yacu ijyanye no gukora ku buryo igaragara n’uko yakorohera umuntu wese mu kuyikoresha, hari kandi gahunda ikomeye yo kuyimenyekanisha kuri benshi kugira ngo abayikoresha biyongere. Icyo turi kurebaho cyane ni uburyo Yeyote yatanga umusaruro.”

Niyotwagira yakomeje avuga ko nyuma yo kumenyekanisha iyi porogaramu, Yeyote Music Ltd irateganya ko mu mpera z’uyu mwaka izakurikizaho gutangiza icyiciro cya gatatu cya gahunda yayo, aho hateganyijwe imurika rya serivisi nshya zishyurwa zirimo uburyo abantu bazajya bishyura bakumva indirimbo no mu gihe nta internet bafite kuri telefoni zabo, ndetse n’izindi. Ibi bikazakorwa mu buryo busanzwe nk’aho umuntu afata ifatabuguzi ry’icyumweru, ukwezi cyangwa se n’umwaka.

Amafaranga azajya avamo azakusanywa na Yeyote Music Ltd hanyuma agabanywe abahanzi hakurikijwe uko ibihangano byabo bikunzwe kandi byumvwa (ibizwi nka royalty fees).

Kuri Yeyote, abantu kandi bazabasha kumva indirimbo zatoranyijwe n’aba Dj bakomeye mu Rwanda basabwe kwishyura cyangwa se iyo serivisi bayibonere ubuntu.

Ushinzwe ubucuruzi n’itangazamakuru muri Yeyote Music Ltd, Vainqueur Niyotwagira

Uko Yeyote igaragara


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza