Rwanda : Hasohotse porogaramu nshya “mirror 1.0” yo korohereza akazi abavunjayi

Rwanda : Hasohotse porogaramu nshya “mirror 1.0” yo korohereza akazi abavunjayi


Yanditswe kuya 24-01-2013 - Saa 15:58' na Mathias Hitimana

Sosiyete nyarwanda y’abikorera ku giti cyabo, Digital Creations, yasohoye porogaramu nshya, mirror 1.0, yorohereza ibiro by’abavunjayi (Forex Bureaux) n’abakiriya gukoresha ikoranabuhanga rya interineti muri serivise zo kuvunja no kuvunjisha.

Mu Rwanda politiki y’ikoranabuhanga igenda itezwa imbere, n’abikorera ku giti cyabo b’abahanga mu ikoranabuhanga barushaho gukataza mu guhanga udushya dufasha abantu benshi muri gahunda zitandukanye. Mirror 1.0 yamuritswe ku wa 17 Mutarama 2013, ubu iri kugeragezwa mu biro by’abavunjayi bitandukanye, Mu Mujyi wa Kigali yatangiye kugeragezwa na Gemod Forex Bureau, Dahabshil, Pacific Forex Bureau .

Umuyobozi w’agateganyo wa Digital Creations, Tuyishime Jean Bosco, aganira na IGIHE yatangaje ko mirror 1.0 izorohereza abayikoresha akazi, kuko niba ugiye kuvunjira umukiriya azanye amafaranga ashaka amayero cyangwa amadolari, ni ukwandika muri mudasobwa igahita itanga umubare w’atangwa nta byo kujya mu ikuba, cyangwa kugabanya.

Tuyishime avuga ko mirror 1.0 izafasha ibiro by’abavunjayi gukora akazi kabo neza, kuko iyo porogaramu imufasha kumenya ayagurishijwe, ayaguzwe n’inyungu bikamufasha gukora raporo.

Ikindi kandi, iyo porogaramu nshya ifasha umukozi uvunjira abakiriya (teller) n’umuyobozi wa forex bureau (manager) gutegura neza akazi ku munsi, kuko umuyobozi ayifashisha mu kugenera buri wese ayo aza gukoresha.

Ku bakiriya, bizaborohera kureba ku rubuga www.ratesmirror.com babone ibiciro by’ivunjisha kuri Forex Bureau ikoresha mirror 1.0, aho bari hose ku isi mbere yo kujya kuvunjisha, bahitemo forex iri ku giciro kitabahombya.

Muri iyi minsi ikoranabuhanga riri kugenda ritera imbere, mirror 1.0 ni igisubizo, kuko mu gihe umuyobozi (manager) wa Forex Bureau, na we aho ari hose ashobora kubona uko abakozi (tellers) bari kuvunjira abakiriya bari gukora, kandi nabo mu gihe hari amafaranga, amadolari, amayero, n’andi abashiranye bikagaragara, manager akamenya ayo umukozi runaka akeneye.

Umuyobozi w’agateganyo wa Digital Creations, Tuyishime Jean Bosco

Mirror 1.0 inakora no kuri telefone zigendanwa, n’ibindi bikoresho nka ipad, Samsung bisimbura mudasobwa , umuyobozi wa forex bureau akurikirana aho ari hose uko forex iri kugenda yunguka, n’uko akazi kari kugenda kinjiza.

Tuyishime avuga ko bataratangira kuyigurisha, ari ko mu gihe gito bizatangira, Forex Bureau iyikeneye ikishyura amafaranga y’u Rwanda ibihumbi 58 ku kwezi, bakaba bahawe na interineti y’ubuntu, cyangwa bakishyura ibihumbi 330 ku mwaka nta interineti bahawe, bakayishakira.

Nyuma y’ikiganiro n’umuyobozi wa Digital Creations, IGIHE yasuye bimwe mu biro by’abavunjayi batubwira uko babona mirror 1.0.

Rutayisire Jean Claude, umuyobozi w’ibiro bivunja amafaranga muri Gemod Forex ikorera mu Mujyi wa Kigali, avuga ko nubwo bakiri mu igerageza ry’iyo porogaramu nshya (mirror 1.0), abona hari byinshi izabafasaha mu kazi kabo ko kuvunja.

Rutayisire ati “Banki Nkuru y’u Rwanda hari amabwiriza iduha yo gutanga raporo y’icyumweru, iy’igihembwe n’iyu mwaka ; Nitumara kugirana amasezerano na ba nyiri porogaramu nshya, turabona izadufasha.”

Rutayisire avuga ko icyo yayibonyeho cyiza gitandukanye n’izindi bajyaga bakoresha ari uko iri kuri interineti, ibikozwe byose bikaba bibitse neza, kandi ikerekana ibyakozwe, amafaranga yaguzwe, ayagurishijwe n’inyungu mu kuvunja nta kubarisha utumashini tubara(calculators).


Bimwe wamenya kuri Digital Creations yakoze mirror 1.0

Digital Creations yashinzwe muri 2010 yandikishwa byemewe n’amategeko ku wa 29 Mutarama 2011 na Munyemana Ben afatanyije na Tuyishime Jean Bosco, ikaba ikora ibijyanye no guhanga udushya mu ikoranabuhanga.

Imwe mu ntego za Digital Creations ni ugutinyura abantu gukoresha ikoranabuhanga mu buzima bwabo bwa buri munsi, nk’uko Guverinoma y’u Rwanda idahwema kubibakangurira.

Ubu Digital Creations, igizwe n’itsinda ry’abantu batanu biyemeje kuzana impinduka bifashije ikoranabuhanga, harimo babiri bakora design n’abandi batatu bakora ibijyanye na programmation.

Digital Creations imaze gushyira hanze igikorwa cyayo cya mbere aricyo mirror 1.0, gusa abayobozi bayo bemeza ko mu minsi iri imbere bazakomeza guhanga izindi porogaramu zizajya zifasha benshi mu buzima bwa buri munsi.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO