Apple yazanye uburyo bushobora gufasha umuntu kugabanya igihe akoresha telefoni

Yanditswe na Rabbi Malo Umucunguzi
Kuya 5 Kamena 2018 saa 09:32
Yasuwe :
3 1

Uruganda ruri mu za mbere ku Isi mu gukora telefoni n’ibindi bikoresho by’ikoranabuhanga ku Isi, Apple, ruri kubaka ibintu bitandukanye bigomba kongerwa muri telefoni zarwo, bifasha umuntu kugena igihe amara akoresha telefoni cyangwa kugenzura uburyo ubutumwa bwisukiranya muri telefoni ye.

Muri iki gihe ikoranabuhanga rimaze gutera imbere, usanga hari abantu batakiruhuka uko bikwiye kuko baba bari muri telefoni, bandikirana n’abandi cyangwa bakurikirana ibiri kubera hirya no hino.

Kuri uyu wa Mbere nibwo habaye inama ikomeye y’abafite aho bahurira n’ibikorwa bya Apple, Worldwide Developer Conference, yabereye San Jose muri Leta ya California, maze bagezwaho imishinga itandukanye uruganda rufite.

Umuyobozi ushinzwe ibijyanye na porogaramu za Apple, Craig Federighi, yavuze ko uru ruganda rwatekereje byimbitse ku buryo abantu batwarwa n’ikoranabuhanga, bityo hari utuntu dutandukanye tugomba kongerwa mu ikoranabuhanga ryayo rishya rya iOS 12.

Uyu muyobozi yagize ati “Applications zimwe zisaba ko tuziha umwanya uhagije kurusha uko tubitekereza. Zitwingingira gukoresha telefoni zacu mu gihe twakabaye duhugiye ku bindi bintu. Bamwe muri twe byamaze nko kuba umuco, nta nubwo dushobora kumenya urwego tugezeho mu kurangara.”

Ibi ngo byatekerejweho nyuma y’uko umwe mu banyamigabane, Jana Partners, muri Mutarama yandikiye Apple asaba ko harebwa ikoranabuhanga ryafasha ababyeyi kugenzura iPhone z’abana babo no kureba uburyo ikoranabuhanga ry’iki kigo rigira ingaruka ku buzima bwo mu mutwe.

Federighi yavuze ko izi mpinduka zizafasha mu “guhagarika ibikurangaza, ushyire umutima kandi utekereze neza ku buryo uri gukoresha igihe cyawe.”

Harimo nk’uburyo bwiswe "Do Not Disturb during bedtime", buhagarika amajwi yose cyangwa uguhinda kwa telefoni nijoro, bukaba ari uburyo buvuguruye kuri "Do Not Disturb" isanzwe.

Apple yanashyizeho uburyo bwo kubara igihe, bushobora gufasha umuntu kugena ingano y’igihe runaka adakeneye kwakiramo ubutumwa bw’ibintu biri kuba (notifications), cyarangira bigasubira uko bisanzwe.

Abantu bakoresha iPhone kandi banahawe uburyo bashobora kwakiramo ubutumwa bw’ibintu biri kuba, bukaza mu matsinda bitewe n’icyo buvuga, ku buryo hari bumwe aba ashobora guhagarikira rimwe.

Apple inateganya ko inshuro imwe mu cyumweru izajya ifasha abakoresha iPhone cyangwa iPad, ikabereka igihe n’uburyo bari gukoreshamo ibyo bikoresho muri icyo cyumweru.

Ubwo buryo ngo buzafasha abantu kugena application bashobora gukoresha cyane n’igihe bakwiye kutarenza baziriho, ndetse ababyeyi bazaba bashobora kubona raporo z’ibikorwa bya telefoni z’abana babo.

Federighi yakomeje agira ati "Turatekereza ko iki ari ikintu gishobora gufasha imiryango kugera ku ntego zo kuringaniza uburyo bazikoresha."

Jana Partners yishimiye ubu buryo, ivuga ko nubwo izakomeza gusuzuma neza uburyo butanga umusaruro, “bisa n’intsinzi yeruye ku babyeyi n’imiryango.”

Hari ibindi bishya byatangajwe

Mu zindi mpinduka Apple yashyize ahagaragara, ni uko yavuguruye porogaramu ifasha mu gusura imbuga zitandukanye ya Safari, igafunga amayira yajyaga anyurwamo n’imbuga nka Facebook n’izindi, mu gukurikirana no kwiba amakuru y’abakoresha izo mbuga.

Federighi yavuze ko Safari izajya ibanza gusaba uburenganzira nyir’igikoresho, mbere yo kwemerera izi mbuga nkoranyambaga gukurikirana ibikorwa bye.

Uru ruganda kandi rwatangaje ko hari umushinga wo gufata porogaramu nyinshi zakoreshwaga muri iPhone zigatangira gukoreshwa muri mudasobwa za Mac.

Federighi yakomeje agira ati “Hari miliyoni nyinshi za applications zikoreshwa kuri iOS, kandi inyinshi muri zo zaba nziza cyane kuri Mac.”

Biteganywa ko iyi mikorere mishya izaba yatangiye kubyazwa umusaruro mu mwaka utaha wa 2019.

Apple irashaka gutangiza uburyo bushobora gufasha umuntu kugabanya igihe akoresha telefoni

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza