Ibiteye amatsiko kuri iPhone uruganda rwa Apple rugiye gushyira ku isoko

Yanditswe na Dusabimana Aimable
Kuya 21 Werurwe 2017 saa 11:01
Yasuwe :
2 0

Buri gihe uko hasohotse telefoni cyangwa igikoresho gishya cy’ikoranabuhanga cyakozwe n’uruganda rwa Apple, abaguzi baba ari urujya n’uruza ku maduka yayo akomeye hirya no hino ku Isi.

Kuri ubu amatsiko ni menshi ku bategereje ubwoko bushya bwa telefoni yo mu bwoko bwa iPhone iri hafi kujya ku isoko, ndetse hari abatangiye gutegura uburyo bwo kuyigura mu gihe hataranatangazwa ibiyerekeyeho.

Byitezwe ko iPhone ikurikira izasohoka muri Nzeri uyu mwaka bijyanye n’igihe uruganda rwa Apple rukunze gushyirira ku mugaragaro telefoni z’ubu bwoko, dore ko iPhone 7 iheruka yashyizwe ku isoko ku itariki 16 Nzeri 2016.

Telefoni yakozwe na Apple izasohoka itegerejweho kuzana porogaramu nshya, isura nshya, by’umwihariko ikwiye kuzaba iri ku rwego rushyikira cyangwa ruri hejuru y’urwa iPhone 7 iheruka, mu rwego rwo kwakira abaguzi bari batunze iyo yaciye ibintu mu mpera za 2016 hirya no hino ku Isi.

Haracyari urujijo ku izina rizahabwa telefoni izakurikira iPhone 7 mu zakozwe na Apple cyane ko hari abavuga ko ishobora kuzagenerwa inyito ijyanye n’ibihe irimo byo kwizihiza imyaka 10 ishize zisohoka igahita yitwa iPhone 10 cyangwa iPhone X.

Ibi ariko ntibikuraho ko uru ruganda iyo rwasohoye telefoni igakundwa ikurikiye ruhita ruyiha inyito ijyanye n’iyo yabanje, urugero rwa vuba ni kuri iPhone 6 aho izakurikiyeho zahise zibatizwa iPhone 6s, ari naho bamwe bahera bakeka ko telefoni ikurikira ya Apple izitwa iPhone 7s cyangwa se ikaba iPhone 8.

Ikinyamakuru cyitwa 9to5Mac gikurikiranira bya hafi amakuru aturuka mu ruganda rwa Apple, kivuga ko hatagize igihinduka kuri gahunda yarwo igomba gusohora ubwoko butatu bwa iPhone nshya mu rwego rwo kwizihiza imyaka icumi ishize zisohoka.

Iki kinyamakuru gitangaza ko hari iz’ubwoko bushya bwitwa iPhone 7s zizaba ari nto ugereranyije n’izindi zizasohoka, kuko zo zizaba zifite igipimo cya (4.7-inch), mu gihe iyitwa iPhone 7s Plus na iPhone 8 bizaba bifite (5.5-inch).

Ikindi kinyamakuru cyitwa Fast Company cyo kivuga ko iPhone 8 izaba ari gaheza kuko izaba ifite ibipimo bingana na (5.8-inch), ikazaba igura $1000, akabakaba ibihumbi 800 mu mafaranga y’u Rwanda ku kiranguzo.

Hari amakuru avuga ko ubwoko bushya bwa telefoni buri gukorwa na Apple buzaba bufite ikirahuri cyitwa OLED gifite umwihariko wo kwerekana amashusho mu mabara abereye ijisho, kizanatuma hatanakoreshwa umuriro mwinshi.

iPhone 7 igiye gukurikizwa ifite uburemere bw’amagarama 138, ikaba ijyamo sim card babanje kuyikata hagendewe ku ngano isanzwe. Ifite ububiko bwihariye (RAM) bungana na Gigabyte (GB) 2 n’ububiko umuntu ashyiraho ibintu ashaka nk’amafoto n’amashusho bungana na GB 256.

Yarangwaga na camera y’inyuma ifite ubushobozi bwo gufata ifoto ya ‘Mega Pixels’ 12, naho camera y’imbere ikagira MP 7 mu gihe nka iPhone 6 yari ifite esheshatu. Ifite ubushobozi bwo gufungishwa igikumwe, gukora amasaha 14 iri gukoresha umurongo wa 3G, n’amasaha 40 iri gukina umuziki gusa.

Iboneka mu mabara atanu arimo umukara werurutse, uwijimye, umuringa, zahabu n’iroza rijya kuba umuhondo, zikanatandukanywa n’ingano y’ububiko zifite, kuko hari ifite GB 32, iya GB 128 n’iya GB 256.

Uruganda rwa Apple rugiye gushyira hanze indi telefoni yo mu bwoko bwa iPhone benshi bategereje n'amatsiko

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza