Minisitiri Nsengimana yasabye Abanyarwanda kubyaza amafaranga porogaramu za telefone

Yanditswe na Jean Pierre Tuyisenge
Kuya 15 Gashyantare 2017 saa 01:17
Yasuwe :
0 0

Minisitiri w’Urubyiruko n’Ikoranabuhanga, Jean Philbert Nsengimana, yasabye Abanyarwanda kumenya no kubyaza umusaruro w’amafaranga ibyo yise ibisubizo (Applications) zo muri telefoni, nyuma yo kubona ko ari bwo bucuruzi gusigaye bufite amafaranga menshi.

Yabivuze ubwo yatangizaga ku mugaragaro inama y’iminsi ibiri yiga uburyo abantu bashobora gukoresha applications bafite muri telefone zabo zikababyarira umusaruro ufatika.

Yavuze ko kugeza ubu ibigo bikomeye ku Isi bisigaye bifite amafaranga menshi ari ibikora ibijyanye n’ikoranabuhanga.

Yagize ati “Turagira ngo tuganire ku mahirwe adasanzwe ikoranabuhanga rimaze kuzana kugira ngo abantu bafite ibisubizo babibyaze amafaranga, ubu ngubu amasosiyete ari gukira cyane ni akora ibibyanye n’ikoranabuhanga rishingiye kuri telefone, urabona ko ayo masosiyete ari gusiga akora iby’indege n’acuruza imodoka.”

Minisitiri Nsengimana atanga urugero ko uyu munsi isosiyete ifite amahoteli 5000 ku Isi usanga irushwa amafaranga n’umuntu umwe ufite application irangira abantu aho babona ibyumba byo kuraramo.

Ni igitekerezo gishobora kugira umumaro kuko kugeza ubu Ubushakashatsi buherutse gukorwa n’Umuryango utegamiye kuri Leta ukorera mu Bwongereza, 0xfam, bwagaraje ko abaherwe umunani bakize kurusha abandi ku Isi bafite ubutunzi burenga ubwa kimwe cya kabiri (½) cy’abaturage bayituye.

Muri bo, hafi ya bose ubukire bwabo bushingiye ku byo bacuruza binyuze ku ikoranabuhanga.

Minisitiri Nsengimana yasabye ibigo byose byigenga n’ibitigenga gukora uko bishoboye bigakora applications zishyirwa muri telefoni kugira ngo barusheho kumenyekanisha ibikorwa byabo mu buryo bworoshye.

Yakanguriye n’abandi batunze telefone kujya babyaza umusaruro application bafitemo badahera mu kuziganiriramo ahubwo bazikoresha bagaragaza ibyo bakora ku buryo byongera umusaruro wabo.

Umunyamabanga ushinzwe ikoranabuhanga mu Muryango w’Ibihugu bikoresha urumimi rw’Icyongereza, (Common Wealth), Shola Taylor, yavuze ko kugeza ubu bigoye gutera imbere umuntu atifashishije ikoranabuhanga.

Yagize ati” Nimurebe uburyo mbere umuntu kugira ngo abashe gushora imari muri Afurika ari i Burayi byamusabaga kuzana ibiro mu bihugu hirya no hino, ariko ubu ukoresheje application imwe ikoresha internet muri telefone yawe, ushobora kubona abakiriya ku Isi yose utavuye aho uri.”

U Rwanda ruteganya gushyiraho ikigega kizajyamo miliyoni 100 z’amadolari ya Amerika kikazafasha abafite applications kuzishyira ku isoko. Ni ikigega kizatangira gukora muri Gicurasi uyu mwaka.

Minisitiri w'Urubyiruko n'Ikoranabuhanga, Jean Philbert Nsengimana
Umuyobozi ushinzwe Ikoranabuhanga muri Common Wealth, Lasantha De Alwis
Umuyobozi w'Akarere ka Afurika mu kigo mpuzamahanga cy'ikoranabuhanga n'itumanaho, ITU, Andrew Rugege na Minisitiri Nsengimana
Abitabiriye inama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza