Nokia igiye gusubiza ku isoko telefoni yakanyujijeho izwi nka ‘Bagorebeza’

Yanditswe na Umwali Zhuri
Kuya 15 Gashyantare 2017 saa 11:59
Yasuwe :
0 0

Nokia, Ikompanyi yo muri Finland ikora telefoni zigendanwa igiye gusubiza ku isoko imwe mu zakanyujijeho mu Rwanda mu myaka ya 2005 yari izwi nka ‘Bagorebeza’.

Nokia 3310 yamamaye nka Bagorebeza yashyizwe ku isoko bwa mbere tariki ya 1 Nzeri 2000, yari izwiho kubika umuriro ku buryo mu gihe yari igezweho mu Rwanda, uyitunze yamaraga iminsi irindwi atarayishyira ku muriro.

Iyi telefoni ku isi hose yabashije gukundwa ku rwego rwo hejuru inayobokwa cyane ndetse ubu burambe bwa batiri yayo ni kimwe mu byo Nokia igiye kugenderaho iyisubiza ku isoko.

Iyi telefoni mu gihe yabicaga bigacika, wasangaga itunzwe n’abagore b’abasilimu cyane ab’i Kigali kandi iyo umugabo yayihaga umugore nk’impano yasigaraga amwirahira.

Nokia 3310 zamenyekanye nka 'Bagorebeza' mu Rwanda, ni zimwe mu zakunzwe ku buryo bukomeye hamwe n'izindi zari zariswe Merci 'Cheri'

Inshya izajya ku isoko izaba igura ama-euro 59 asaga gato ibihumbi 50 by’amafaranga y’u Rwanda ndetse byitezwe ko ishobora kuzagurwa cyane n’abantu basanzwe bafite smartphone ariko bakeneye indi ya kabiri yo kwifashisha.

Muri uku kwezi mu nama yiga ku bijyanye na Telefoni, Mobile World Congress, izabera i Barcelone muri Espagne kuva kuwa 27 Gashyantare kugera kuya 2 Werurwe 2017 nibwo ibya Bagorebeza bizatangazwa.

Nokia yagowe cyane no kwinjira mu isi ya telefoni zigezweho kubera inkundura y’andi makompanyi akomeye nka Apple na Samsung byatumye igurwa na Microsoft ya Bill Gates ihita itangira gushyira ku isoko izizwi nka Lumia.

Gusa mu myaka ibiri ishize yakoze amateka igurisha telefoni ihendutse aho yakoze ubwoko bushya bwa Nokia 215 irimo na internet, hanyuma iyigurisha amadolari 29 asaga gato ibihumbi 20 by’amanyarwanda ikaba yarabikaga umuriro nibura iminsi 29.

Iyi telefoni ikoranye porogaramu zirimo Opera Mini, Facebook Messenger, Twitter n’izindi.

Nokia 215 ni imwe muri telefoni zihendutse uru ruganda ruherutse gushyira ku isoko

Telefoni za Nokia kuri ubu zicuruzwa n’ikompanyi yo muri Finland yitwa HMD Global . Mu minsi iri imbere, Nokia izashyira ahagaragara izindi telefoni zirimo Nokia 3,5 na 6 zose zizaba zigezweho gusa zizagumana umwihariko wo guhenduka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244