Kwamamaza

Politiki y’ubumenyi n’ikoranabuhanga ihagaze ite mu myaka isaga 10 yemejwe?

Yanditswe kuya 1-12-2016 saa 22:55' na Jean Louis Uwishyaka


Nyuma y’aho mu 2005 u Rwanda rwemeje politiki yo guteza imbere ubumenyi, ikoranabuhanga, guhanga udushya n’ubushakashatsi mu iterambere ry’igihugu, ni byinshi byagiye bikorwa muri izo nzego, ari nako bigira uruhare mu kuzamura ubukungu bw’igihugu.

Ibi byatangarijwe mu nama y’iminsi ibiri, yatangiye kuri uyu wa 1 Ukoboza, ihuje inzego zinyuranye zirimo Minisiteri y’Ubucuruzi, Inganda n’Ibikorwa by’Umuryango wa Afurika y’u Burasirazuba (MINEACOM), Ishami ry’Umuryango w’Abibumbye rishinzwe Ubucuruzi n’Iterambere (UNCTAD), Komisiyo y’Igihugu ishinzwe Ubumenyi n’Ikoranabuhanga (NCST) n’Ikigo cy’Igihugu gishinzwe guteza imbere Inganda( NIRDA), n’abandi, barebera hamwe ibyagezweho mu gushyira mu bikorwa ibiteganywa n’iyo politiki imaze hafi imyaka 11 yemejwe ndetse n’indi ntambwe yifuzwa kugira ngo izi nzego zibashe gutera imbere.

Izi nkingi eshatu (Ubumenyi, Ikoranabuhanga no guhanga udushya) zifatwa nk’inkingi za mwamba mu iterambere ry’igihugu no gufasha inzego zitandukanye kugera ku cyerekezo 2020 u Rwanda rwiyemeje.

Muri Mata uyu mwaka, impuguke ziturutse muri UNCTAD bakoze isesengura kuri izi politiki n’akamaro zigira mu guteza imbere ubukungu bw’igihugu. Abitabiriye iyi nama kandi bunguranye ibitekerezo ku bibazo bigaragara mu nzego zishinzwe ubumenyi n’ikoranabihanga mu Rwanda, harimo ubushakashatsi n’ibindi.

Nkuko bigaragazwa na Komisiyo y’Igihugu yo guteza imbere Ubumenyi n’Ikoranabuhanga(NCST), ngo kuva iyo politiki yemezwa, hari intambwe imaze guterwa cyane muri izo nzego uko ari eshatu, bijyanye n’ubushake bwa politiki mu kubiteza imbere.

Dr Ignace Gatare uyobora iyo Komisiyo, yagize ati “Inyigo yerekana ko hari ubushake bwa politiki nk’inkingi ikomeye cyane dushobora kubakiraho, kuko biciye muri gahunda ya mudasobwa imwe ku mwana (One Laptop Per Child), kubyaza umusaruro ibyo dufite bijyanye n’amashanyarazi, byose birerekana ko hari ubushake, hariho n’ingamba zifatika ariko hakenewe gusa kunoza imikoranire hagati y’abantu.”

Ikoranabuhanga ryateye intambwe…

Kuva hashyirwaho iyi politiki, urwego rw’ikoranabuhanga mu gihugu rwagiye rutera imbere, ari nako ryifashishwa mu bikorwa binyuranye birimo ubuhinzi, ubumenyi, ubucuruzi n’ibindi. Ikoranabuhanga kandi uko ritera imbere, ntirisiganwa n’izamuka ry’abakoresha telefoni ngendanwa muri gahunda zitandukanye.

Inyigo yakozwe na CNST yifashishije ibyegeranyo byagiye bisohorwa n’ibigo bitandukanye mu Rwanda no hanze yarwo, igaragaza ko mu 2005 abanyarwanda bakoreshaga telefoni bari kuri 2%, mu gihe mu mwaka ushize (2015), uyu mubare wazamutse cyane ugera kuri 77.8%, bivuze ko mu myaka icumi gusa byari bimaze kuzamukaho 75%.

Ibi bisa n’ukuri kuko imibare yashyizwe ahagaragara n’Ikigo cy’igihugu gishinzwe imirimo imwe n’imwe ifitiye igihugu akamaro(RURA), muri Nyakanga uyu mwaka,igaragaza ko hafi abanyarwanda miliyoni icyenda muri 11 sizaga, batunze telefoni. Ibyo byose bijyana n’umubare w’abazikoresha mu bikorwa bitandukanye birimo kohereza no kwakira amafaranga ugenda wiyongera n’ibindi.

Ikoranabuhanga ntiryagarukiye mu itumanaho gusa kuko no mu nzego zinyuranye nk’ubuhinzi naho ryahinduye byinshi cyane binyuze muri gahunda yo kuhira imyaka mu bice binyuranye bikunda kwibasirwa n’izuba rikabije hifashishijwe ibikoresho bigezweho.

Mu rwego rw’ubumenyi, CNST igaragaza ko hari intambwe yatewe, aho hashyizweho amashuri y’ubumenyingiro (TVET), afasha abanyarwanda by’umwihariko urubyiruko kwihangira imirimo no guhanga udushya n’ibindi. Iyi Komisiyo kandi igaragaza ko umubare w’abanyeshuri biga amasomo y’ubumenyi na wo ugenda uzamuka bitewe n’uko leta yayashyizemo ingufu zigaragara.

Gusa bagaragaza ko nubwo bimeze bityo, hakiri byinshi byo gukora mu rwego rwo kugeza inzego z’ubumenyi, ikoranabuhanga no guhanga udushya ku rwego rushimishije.

Dr Gatare avuga ko iyo urebye imibare y’abiga amashuri ya kaminuza yiyongereye, bityo ngo igikenewe no kongera ireme ry’uburezi hagamijwe guhuza ibyo biga n’ibikenewe kugira ngo bigirire akamaro umurimo mu Rwanda.

Gatare avuga kandi ko ahantu u Rwanda rugifite inzitizi ari mu rwego rw’inganda, agaragaza ko zikiri nke, bityo agasaba ko ubumenyi bukwiye gufasha izo nganda kwiyongera no kuzamura ubushobozi zibasha guhangana ku masoko yo hanze.

Abateraniye muri iyi nama bavuga ko hakwiye gushyirwa ingufu mu kubaka ubufatanye n’abikorera ku giti cyabo mu rwego rwo kuzamura urugero rw’izi nzego.

Dr Ignace Gatare avuga ko kuva hashyirwaho iyi politiki y'ubumenyi n'ikoranabuhanga hari umusaruro byatanze
Minisitiri Kanimba ari mu bitabiriye iyi nama
Abitabiriye iyi nama baturutse mu nzego zinyuranye batanze ibitekerezo kuri iyi gahunda
Felly Kalisa, umusesenguzi muri NCST

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved