Minisitiri w’urubyiruko n’ikoranabuhanga, Nsengimana Jean Philbert, ubwo yafunguraga ku mugaragaro igikorwa cyo kwandikisha SIM cards za telefone bigahuzwa n’umwirondoro wa nyirayo mu kigo cy’itumanaho akorana nacyo, yamaze impungenge abaturage ko nta nyungu Leta yaba ifite mu kumviriza amabanga kuri telefone zabo kubakeka ko aricyo kigamijwe.
Minisitiri Nsengimana yatangije igikorwa cyo kwandikisha SIM card yiheraho, yandikishije ize mu bigo by’itumanaho bya TIGO, MTN na Airtel nk’umufatabuguzi wabo.
Mu ijambo rye atangiza iki gikorwa n’ikiganiro yagiranye n’abanyamakuru yavuze ko bikwiriye kumvikana neza ko bitari mu rwego rwo kumviriza telefoni z’abaturage.
Yagize ati “Ntawe ufite inyungu mu kumviriza telefoni z’abaturage, hari ababifata uko bitari murumva Leta yakumviriza telefoni z’abaturage bose ?”
Yavuze ko amategeko igihugu kigenderaho bitemewe kumenya amabanga ya buri muntu, gusa avuga ko iyo hari amakuru akenewe kumenyekana ku muntu runaka bitewe n’amakosa yaba yakoreye kuri telefoni, ubwo buryo bushobora kwifashishwa bitangiwe uburenganzira na Minisitiri w’umutekano.
Usibye na Leta, Nsengimana amara impungenge abaturage ko n’ikigo cy’itumanaho runaka kidafite uburenganzira bwo kumva amabanga y’abakiriya babo kitabisabiye uburenganzira.
Minisitiri yavuze ko igikorwa cyo kwandika SIM cards bidatangiriye mu Rwanda gusa, ahandi cyatangiye kera nko mu bihugu by’i Burayi n’ibyo muri karere ko byatangiye kwandika SIM card n’umwirondoro wa nyirayo, ati “ Ibi si ibintu bishya ku isi, birasanzwe gusa, twe nko mu Rwanda ni amateka atazibagirana mu gutangiza iki gikorwa, kuko mu bihugu byo muri Afurika turi mu bambere batangiye kubishyira mu bikorwa kandi bigakora neza.”
Uko kwandikisha SIM card bigenda
Umuyobozi w’Ikigo cy’igihugu ngenzuramikorere gishinzwe imirimo imwe n’imwe ifitiye igihugu akamaro (RURA) , François Régis Gatarayiha, yavuze ko igikorwa cyateguwe neza, yaba ku bafite ibyangobwa, abatabifite n’abanyamahanga baba mu Rwanda.
Ku muntu ufite indangamuntu ayitanga k’ushinzwe kwandika SIM card ku kigo cy’itumanaho akorana nacyo, bakareba umwirondoro we urimo izina, italiki yavukiyeho n’umwaka, bakandika numero ya telefoni, na nimero y’indangamuntu, ushinzwe kumwandika akabona ubutumwa bugufi buvuga ko umukiriya we yamaze kwandikwa. Uwanditwse nawe ahita abona ubutumwa bumubaza niba nimero yanditswe ari iye koko.
K’udafite indangamuntu bitewe n’uko atarageza igihe cyo kuyifata, ashaka umwishingira yaba umubyeyi we cyangwa undi muntu umurera. Icyo gihe yandikwa mu izina ry’uwo mwana. Uyu mwirondoro.
No ku banyamahanga baba mu Rwanda, nabo basabwa ibyangobwa by’aho baturuka.
Uwandika SIM card agenzura niba umwirondoro n’ifoto bya nyiri ukubitanga bihura neza n’isura ye, kugira ngo hatagira ababikora mu rwego rw’ubujura bwo kwiba SIM cards z’abandi.
Inyungu mu kwandikisha SIM card
Gatarayiha avuga ko uzarenza taliki ya 31 Nyakanga 2013, atarayandikisha SIM card ya telefoni ye, izakurwa ku murongo.
Avuga kandi ko bifitiye akamaro abaturage, kuko bizabarinda abajura bakunze kwiba amatelefoni yabo. Ikindi kandi bizafasha amabanki mu gufata abahinduzaga za SIM card (swap) zitari izabo, bagasinyisha amafaranga ku makonti y’abandi.
Indi nyungu ni uko hari n’abagira ingeso mbi yo gutukanira ku matelefoni batera abandi ubwoba, ngo iyi gahunda izabikemura byose kuko ushobora gufatwa kubera ikoranabuhanga, uwo ututse akureze.
Ikindi ngo bizafasha Leta mu kumenya abashaka guhungabanya umutekano w’igihugu bakoresheje telefoni.
Iyi gahunda ihuriweho n’umushinga w’indangamuntu NIDA, RURA, MTN, TIGO na Airtel ndetse na Polisi y’igihugu, ibi bigo byose biriyambazwa mu kumenya umwirondoro w’uwashaka guhungabanya umutekano yifashishije telefoni igendanwa.
Amafoto/ Steven Ndizeye
IKINYARWANDA
IKIRUNDI
ENGLISH
FRANÇAIS
Ahabanza
Abo Turibo
Serivisi
Twandikire
Ibirimo
