Abadepite barasaba MINEDUC gukura kode muri za mudasobwa zihabwa abana

Abadepite barasaba MINEDUC gukura kode muri za mudasobwa zihabwa abana


Yanditswe kuya 1er-03-2013 - Saa 08:32' na Izuba Rirashe

Abadepite barasaba Minisiteri y’Uburezi (MINEDUC) gukura kode (code/password) muri za mudasobwa zahawe ibigo by’amashuri bitandakunye muri gahunda ya mudasobwa imwe kuri buri mwana (one laptop per child).

Uyu ni umwe mumyanzuro yemejwe kuzagezwa kuri Guverinoma ubwo Komisiyo y’uburezi, umuco, ikoranabuhanga n’urubyiruko yagezaga ku Nteko Ishinga Amategeko umutwe w’abadepite raporo y’ibyavuye mu bushakashatsi bwakozwe mu gihugu hose kuri gahunda ya one laptop per child ndetse n’amashuri yigisha amasomo y’ubumenyi ngiro (TVET).

Iyi komisiyo ivuga ko basanze hari icyo abana bakoresha izo mudasobwa bazi muri rusange, ndetse ko bifuza kumenya byinshi kuri mudasobwa ariko inagaragaza n’ibibazo bikomeye yasanze aho yasuye.

Ku bigo 20 byasuwe mu Turere 20 tw’igihugu mu minsi 12 yo muri Nzeri 2012, iyi komisiyo ivuga ko yasanze hamaze gutangwa mudasobwa 12, 102 ariko muri izo zose mudasobwa 8,141 zikaba zidakoreshwa kubera kode zirimo, cyangwa zikibitse mu bubiko bw’ibigo by’amashuri, hari n’izindi zibwe n’izamenetse zigera 230.

Iyi komisiyo ivuga ko abayobozi b’ibigo bavuze ko impamvu zimwe muri izi mudasobwa zikibitse ari uko ahanini baba bazi ko zirimo kode kandi bagomba gutegereza umuntu uzaturuka i Kigali muri MINEDUC kuza kuyikuramo.

Ariko nanone ngo hari abayobozi nabo ubwabo batazi akamaro ka mudasobwa bigatuma bazigerekera muri za stock.

Urugero rwatanzwe ni nko kuri Groupe Scolaire ya Nyanza, aho basanze abana batinya kwegera mudasobwa kuko kuri mudasobwa 586 bahawe hakoreshwa 36 gusa.

Iyi komisiyo ivuga ko kubera ibi bibazo bya kode ziri muri mudasobwa n’izikibitse ndetse n’ubuyobozi bumwe na bumwe budaha agaciro iri somo ; bituma usanga mudasobwa 1 iri gukoreshwa n’abana bagera kuri 5 cyangwa 10.

Abarimu bigisha kuri ibi bigo, bavuze ko badashobora gukura iyi kode muri za mudasobwa kuko ari ibanga ry’abakozi ba MINEDUC gusa, nyamara iyi komisiyo ivuga ko aba bakozi ari bake ku buryo bibagora kuzenguruka igihugu cyose ; bityo bigatuma hari abamara amezi 6 bategereje umukozi wa MINEDUC uzaturuka i Kigali aje gukuramo kode.

Usibye kuba kode ziri muri za mudasobwa zitangwa na MINEDUC, nta n’integanyanyigisho iteganyijwe yo kuyigisha, buri mwarimu [ubwe cyangwa umuyobozi w’ishuri] ugomba gushaka umwanya yigishamo iri somo ; ibyo nabyo bigaterwa n’uko nawe ubwe akunda cyangwa yumva akamaro ka mudasobwa.

Abadepite bavuga ko kugira ngo abana bashobore kugira ubumenyi buhagije kuri za mudasobwa, MINEDUC ikwiye gukura kode muri za mudasobwa zose kandi igahugura umwarimu kuri buri kigo uzaba ufite ubushobozi bwose kuri izo mudasobwa ziba ziri ku bigo byabo.

Ibindi abadepite basaba, nuko MINEDUC yashyiraho integanyanyigisho inoze y’isomo rya mudasobwa aho kubirekera ibigo by’amashuri, ndetse bakanoza imikoranire yabo n’ubuyobozi bw’Uturere.

Iyi komisiyo yavuze ko yagejeje ibyifuzo bitandukanye ku bayobozi ba MINEDUC birimo ko abana bifuza kujya batahana izo mudasobwa ndetse n’abarimu bagahabwa mudasobwa.

Komisiyo y’uburezi, umuco, ikoranabuhanga n’urubyiruko mu Nteko Ishinga Amategeko ivuga ko yasanze mu gihugu hose hamaze gutangwa mudasobwa 161.816 zahawe ibigo 325 mu gihe hari ibigo by’amashuri abanza angana na 2,594 kandi yose agomba kugerwaho na gahunda ya one laptop per child.

Inteko Ishinga Amategeko ivuga ko izagenzura ishyirwa mu bikorwa ry’iyi myanzuro yafashwe kuri gahunda ya one laptop per child.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO