NASA yongeye gushimangira ko Mars ifite amasoko y’amazi ahagije

Yanditswe na Mukaneza M.Ange
Kuya 12 Mutarama 2018 saa 08:46
Yasuwe :
0 0

Ikigo cy’Abanyamerika gikora ubushakashatsi ku bumenyi bwo mu kirere n’isanzure, NASA, cyashyize hanze amafoto agaragaza urubura mu misozi ya Mars, abahanga bashimangira ko ari ikimenyetso cy’uko uyu mubumbe ushobora kuba ufite amasoko y’amazi.

Abahanga mu bijyanye n’ubumenyi bw’ikirere bagaragaje ko uru rubura ruturuka mu butaka bwa Mars, ari andi mahirwe yo kongera kwiga ku bijyanye n’ubuzima kuri uyu mubumbe, bizagira uruhare mu kumenya uburyo abazajya kuhatura bazabona amazi.

Colin Dundas, umuhanga mu birebana n’amazi yagaragaje ko aya mafoto ari undi muryango ufungutse ku rubura ruvugwa mu butaka bwa Mars.

National Geographic dukesha iyi nkuru ivuga ko kuva mu myaka yashize, abantu batandukanye bagaragaje ko kuri Mars hari amazi ariko ntibabashe gusobanukirwa ingano yayo, ubushakashatsi bwakozwe na Dundas akaba aribwo bubisobanura neza.

Umuhanga witwa Bethany Ehlmann yatangaje ko ariya mafoto agaragaza neza urubura ruvugwa kuri Mars rwagiye rukunda kugarukwaho mu magambo gusa, kandi ashobora kwifashishwa mu kwiga ibijyanye n’imihindagurikire y’ibihe kuri uyu mubumbe nk’uko babikora ku isi.

Aya mafoto kandi ashobora kwifashishwa mu kwiga uburyo abazajya kuri Mars bazashira inyota, binyuze mu gucukura uru rubura bakarubika, ku buryo babasha kubona amazi yo kunywa no gukora umwuka mwiza wo guhumeka.

Nubwo ubushakashatsi bwakozwe na NASA mu 2016 bwagaragazaga ko kugira ngo umuntu agere kuri aya mazi byasaba gucukura ukagera hasi cyane, aya mafoto yo yashimangiye ko uru rubura rutari mu metero nyinshi.

Ikigo cy’Abanyamerika gikora ubushakashatsi ku bumenyi bwo mu kirere n’isanzure, NASA, cyashyize hanze amafoto agaragaza urubura mu misozi ya Mars

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza