Umuntu wa mbere ashobora kujya ku mubumbe wa Mars mu 2039

Yanditswe na IGIHE
Kuya 18 Gicurasi 2019 saa 07:15
Yasuwe :
0 0

Imyaka irenga 60 irashize abahanga basohora inyandiko zivuga ku igerageza ryo gushaka uko muntu yajya gutura ku mubumbe wa Mars, umwe mu yo mu isanzure ubonekaho ibintu bifitanye isano n’ibyo ku Isi.

NASA yiyemeje ko bitarenze 2024 umuntu wa mbere azaba yoherejwe ku Kwezi naho kuri Mars bikaba mbere ya 2033 ariko impuguke n’abakora mu inganda z’ubumenyi bw’ikirere n’isanzure bavuga ko mu 2033 ari hafi ugereranyije n’igihe umushinga wo kohereza icyogajuru cya Apollo ku kwezi watwaye.

Ikinyamakuru 7 sur 7 cyatangaje ko inyigo ku ishyirwa mu bikorwa ry’umushinga wo kohereza umuntu kuri Mars mu 2033, iheruka gutangazwa na NASA muri Gashyantare 2019, igaragaza ko bitazoroha, igihe gishoboka ari mu 2039.

Umwe mu bashinzwe Labolatwari icukumbura ku miturire y’ahazaza mu kigo Johnson de Houston, Robert Howard, aheruka gutangaza ko urwo rugendo rushobora kuzatangira mu 2027 ariko ko atabyizeye neza kuko umuvuduko ugaragaza ko byaba byiza rushyizwe mu 2037.

Ni urugendo rugaragara nk’aho atari urwa vuba kuko imyiteguro yarwo isa n’aho ntacyo iratanga. Kugira ngo umuntu agere kuri Mars, bishobora gutwara amezi nibura atandatu mu gihe kujya ku kwezi bitarenzi iminsi itatu.

Abagaragaza izo mpungenge bavuga ko gukorayo ubushakashatsi bishobora kuzatwara nibura igihe kitari munsi y’imyaka ibiri.

Umuyobozi w’ikigo cy’ubushakashatsi ku bumenyi bw’ikirere n’isanzure, ISS, Julie Robinson, avuga ko ari urugendo ruzaba rukeneye guteganyirizwa ubwirinzi budasanzwe bw’imirasire y’izuba.

Abazoherezwayo kandi ngo bazakenera ibikorwa by’ubuvuzi n’uko bakwitwara mu kibazo bagirirayo kuko bigoye kuba bahabwa ubundi butabazi.

Hari impungenge ko abantu bazajya kuri Mars bashobora kuhasanga ivumbi ryinshi hashingiye ku ryo icyogajuru cya Apollo cyoherejwe ku kwezi cyagarukanye.

Nta buryo buragaragazwa buzifashishwa abazoherezwaho bashakisha amazi, umwuka n’ibindi bintu by’ingenzi bifasha ikiremwamuntu kubaho bidahari.

Impungenge ni zose kandi ukuntu abantu bazoherezwayo, bakamara imyaka ibiri yose bari mu muhezo, bari mu buzima bwa bonyine ndetse batabasha gutanga amakuru y’urugendo rwabajyanye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza