Zealandia ishobora kwemezwa nk’umugabane wa munani ugize Isi

Yanditswe na Rabbi Malo Umucunguzi
Kuya 9 Werurwe 2017 saa 06:01
Yasuwe :
0 0

Abahanga mu bumenyi bw’imiterere y’Isi, bakomeje gusaba ko igice cya Zealandia giherereye mu Nyanja ya Pasifika cyemerwa nk’umugabane ukwawo, kikaba cyahita kiba uwa munani ugize Isi.

Zealandia niyemezwa izaba ariwo mugabane muto kuruta indi kuko ifite kilometero kare (km2) miliyoni 4.9, igice kingana na 94% kikaba kiri munsi y’amazi. Uzaba ukomatanyije Nouvelle-Zélande, Nouvelle-Calédonie, Ikirwa cya Norfolk, uruhurirane rw’ibirwa byitiriwe Lord Howe n’ibindi bice biri munsi y’amazi bya Elizabeth na Middleton.

Ubusanzwe Isi igizwe n’imigabane ya Afurika, u Burayi, Aziya, Amerika y’Epfo, Amerika ya Ruguru, Oceanie na Antarctique.

Abahanga bavuga ko icyo gihe giherereye mu Majyepfo ashyira Iburengerazuba bw’inyanja ya Pasifika gihura neza ku buryo cyakwitwa umugabane, kuruta uko cyafatwa nk’uruhurirane rw’ibirwa.

Abahanga 11 bari inyuma y’ubu busabe, babigaragaje mu nyigo bise ‘Zealandia, umugabane w’Isi uhishe’ cyangwa "Zealandia: Earth’s Hidden Continent" iza no gusohorwa mu Kinyamakuru ‘Geological Society of America’.

Umwanditsi mukuru wabwo akaba ari n’umuhanga mu miterere y’Isi muri Nouvelle-Zélande witwa Nick Mortimer, yavuze ko abahanga mu bumenyi bamaze imyaka isabga 20 bashakisha ibimnyetso bigaragaza umwihariko wa Zealandia.

Ati “Agaciro ko kwemeza Zealandia nk’umugabane karakomeye mu birebana na siyansi, kurusha uko ryaba ari irindi zina ryiyongeye ku migabane isanzwe.”

Izina Zealandia ryatekerejwe n’umunyabugenge Bruce Luyendyk mu 1995, ubwo byatekerezwaga ko icyo gice cy’Isi gishobora kuba gifite umwihariko uyihesha kwitwa umugabane nk’isi yose. Ni ibintu byaje kwemezwa hifashishijwe ikoranabuhanga ry’ibyogajuru.

Nouvelle-Zélande n'uturwa tuyikikije nitwo tuzaba tugize Zealandia niramuka yemejwe nk'umugabane

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza